Bapulukile Na Mambo A Kumvwina Lujimuno
YESU KILISHITU waambijile jimo lujimuno lwa mpelo ya bwikalo bwa Bayudea lwashinkamene pa nzubo ya Lesa mu Yelusalema. Kechi waambilepo juba ne. Bino walumbulwile biyukilo bya kwiya kwa luno lonaiko. Wakambizhe baana banji ba bwanga kulaba ne kukenkenta ne kunyemamo mu muzhi.
Yesu waambijile jimo amba: “Kabiji byo mukamona Yelusalema sa bamuzhokoloka ku mazhita, kepo mukayuka’mba, lonaiko lwanji ke luji pepi.” Kabiji waambile’mba: “Kabiji pa kwikimona akya kya bunya kileta lonaiko . . . sa kyaimana mwazhila, . . . ponkapo ba mu Yudea bakanyemene ne ku mitumba.” Yesu wakambizhe baana banji ba bwanga kubula kubwelako na kukeba bintu bya ku mubiji. Kunyemamo bukiji bukiji kwakebewenga bingi pa kuba’mba bapulushe myeo yabo.—Luka 21:20, 21; Mateo 24:15, 16.
Pa kuba’mba bapwishe bunsatuki, Cestius Gallus watangijile nzhita ya bena Loma kulukuka Yelusalema mu 66 C.E. Wakatwelele monka mu muzhi mukatampe ne kuzhokoloka nzubo ya Lesa. Muzhi yense mwajinga kiwowo kya mama nafwa. Aba batwajijile kulaba ne kukenkenta bamwene kuba’mba lonaiko lwaya lufike. Nanchi kyakonshekele kunyemamo nyi? Kwakubula nangwa kuketekelatu ne, Cestius Gallus ne nzhita yanji balupukilemo. Bayudea bantuntwamishinko bapupijile. Kino kyo kyajinga kimye kya kunyemamo mu Yelusalema ne mu Yudea monse!
Mu mwaka walondejilepo, nzhita ya bena Loma yatangijilwenga na Vespasian ne mwananji Titusa yaishile jikwabo. Mu kyalo kyonse mwakumbene nkondo. Kuntatwilo ya 70 C.E., bena Loma bazhokolokele Yelusalema. Kino kyalengejile kukatazha kulupukamo. (Luka 19:43, 44) Bipanyi bipachikilenga monka mukachi ka muzhi bitapile abyo bine na bine. Bashajilepo baipaiwenga ku bena Loma nangwa kutwalwa mu buzha. Muzhi mukatampe ne nzubo yanji byaonawinwetu byonse pelu. Kwesakana na byaambile Muyudea wa mu myaka kitota kitanshi shayuka wa mpito aye Josephus, Bayudea kukilaila pa milyonyi umo bayanjile ne kufwa. Aya nzubo ya Lesa kechi bakiishimukululapo jikwabo ne.
Inge bena Kilishitu bakijinga monka mu Yelusalema mu 70 C.E., nabo bakonsheshe kwipaiwa nangwa kutwajilwa pamo mu buzha na bantu bonse bajinga mu yewa muzhi. Nangwa byonkabyo bashayuka ba mpito bakala baambile kuba’mba bena Kilishitu baumvwijile lujimuno lwa Lesa ne kufumamo monse mu Yelusalema ne mu Yudea ne kunyemena ku mitumba ya kumusela wa Mukola wa Yodano. Bamo baikele mu Pela, mu kibunji kya Pelia. Bamusankijilepo Yudea kabiji kechi babweleleko ne. Kumvwina lujimuno lwa kwa Yesu kwibapulwishe.
Nanchi Kine Mumvwina Lujimuno Lufuma ku Bantu Baketekelwa Nyi?
Panyuma ya kumvwa ku masawakya avula a lujimuno lwa bintu bikyangye kumwekanapo, bantu bavula belusujile. Nangwa byonkabyo, kumvwina lujimuno kwakonsha kwimupulusha.
Mu China mu 1975, lujimuno lwapanyiwe lwa kuba’mba kitentanshi kikobiwa. Babinemanga baubilepo kimo. Bantu baumvwijile. Kabiji bavula bapulukile.
Mu April 1991 mu Philippines, bangikazhi baikejile munshi ya Mutumba wa Pinatubo bapaine sawakya wa kuba’mba luya ne buto byatupaukilenga kufuma mu mutumba. Panyuma ya kwikipalanguzha kino pa bañondo babiji, kije kya Philippine Institute of Volcanology and Seismology kyajimwañeneko pa kizumba kyajingatu pepi na kubiwa. Bukiji bukijitu bantu makumi a biumbi bebafuminyemo mu yoya mpunzha. Kuntatwilo ya June 15, mutumba watubikile kabiji maloba atusukile mwiulu kukilaila pa makilomita atanu na asatu abwela anyemukila mu mpunzha imo ya muzhi. Kumvwina lujimuno kwapulushishe myeo yavula.
Baibolo wajimunako na mpelo ya buno bwikalo bujipo bwa bintu byonse. Tubena kwikala mu moba apelako. Mpelo byo ibena kufwenya pepi, nanchi mubena kulaba ne kukenkenta nyi? Nanchi mubena kubapo kimo kuba’mba mufume mu mpunzha yatama nyi? Byo mwaikala bajimuka, nanchi mubena kujimunako bakwenu nabo kuba kintutu kimo nyi?
[Kipikichala pa peja 20]
Kumvwina lujimuno kwapulwishe myeo yavula kimye Mutumbu wa Pinatubo kyoatubikile ne kufumya buto bwakaba
[Kipikichala pa peja 21]
Bena Kilishitu baumvwijile lujimuno lwa kwa Yesu bapulukile kimye Yelusalema kyo bamonawine mu 70 C.E.