Ketekelai mwi Lesa ne Kwikala Balusekelo mu Masongola

Yehobaa Lesa ye wasongweshe bantu babiji batanshi. Tutanga mu Baibolo amba Lesa walengele mwanamukazhi mutanshi ne ‘kumuleta ku mwanamulume.’ Adama wasekejile bingi. Waambile’mba: “Uno ye kikupa kya ku bikupa byami. Ye mubiji wa ku mubiji wami.” (Ntendekelo 2:22, 23) Yehoba ukeba baji mu masongola kwikala balusekelo.

Umvwe mwatwela mu masongola mwakonsha kulanguluka’mba mukekalangatu bulongo moba onse. Bino kwambatu kine, baji mu masongola betemwa nabo bekala na makatazho. (1 Kolinda 7:28) Mu uno buloshuwa muji mafunde a mu Baibolo akonsha kwimukwasha mu masongola enu inge mwi alondela.—Salamo 19:8-11.

1 INGILANGA MWINGILO WIMUPELE YEHOBA

BYAMBA BAIBOLO: Mwanamulume ye mutwe wa kisemi.—Efisesa 5:23.

Yehoba ukeba’mba anweba banabalume mulamenga bakazhi benu na kifyele. (1 Petelo 3:7) Lesa walengele mwanamukazhi kwikala nkwasho wimufwainwa kabiji ukeba’mba mu munemekenga ne kumutemwa. (Ntendekelo 2:18) Mwafwainwa kutemwa bakazhi benu na muchima yense, kwipana kwibobila kyo bakeba patanshi, kechi kuba kintu kyo mukeba anweba ne.—Efisesa 5:25-29.

Yehoba ukeba’mba anweba banabakazhi, mwikale na mushingi mukatampe ku bamwatawenu. (1 Kolinda 11:3; Efisesa 5:33) Mutundaikenga ne kukwasha bamwatawenu, kwakubula kunyinyita ne. (Kolose 3:18) Yehoba ne bamwatawenu bakemunemeka bingi umvwe saka muba bino.—1 Petelo 3:1-6.

BYO MWAKONSHA KUBA:

• Ipuzhai benakwenu bintu byo basaka’mba mwibobilenga. Telekeshai byo babena kwimubula ne kwibobilabyo

• Ikalai batekanya. Papita moba pa kuba’mba bonse babiji muyuke bimusangajika

2 NEMEKAINGA BYATEMWA BENAKWENU

BYAMBA BAIBOLO: Mwafwainwa kuyuka bintu byatemwa benakwenu. (Filipai 2:3, 4) Nemekainga benakwenu. Vulukainga’mba Yehoba ukeba bapopweshi banji ‘kwikala ba lusa.’ (2 Timoti 2:24) “Byambo bya kupulumukatu byasañana nobe mpoko, Pakuba byambo bya muntu wa maana bibukañana.” Onkao mambo, langulukilanga jimo saka mu kyangye kwamba. (Byambo bya Mana 12:18) Mupashi wa Yehoba ukemukwasha kwamba na lusa ne na butemwe.—Ngalatiya 5:22, 23; Kolose 4:6.

BYO MWAKONSHA KUBA:

• Lombai’mba Lesa emukwashe mubule kuzhingila ne kuteleka kwa kubula lupata pa kwisamba bintu byanema na benakwenu

• Langulukilai jimo bintu byo musakwamba ne byo mu sa kwibyamba

3 YILAINGA MUMO

BYAMBA BAIBOLO: Inge mwatwela mu masongola, mwikala “mubiji umo” na benakwenu. (Mateo 19:5) Nangwa byonkabyo mukiji bantu babiji kabiji mulanguluka bintu byapusana. Onkao mambo mwafwainwa kufunda kuyilanga mumo mu byonse byo muba. (Filipai 2:2) Kuyila mumo kwanema bingi pa kufuukula bintu. Baibolo waamba’mba: “Bintu byo balangulukila jimo bilumbuluka” inge mwisambapo. (Byambo bya Mana 20:18) Londelainga mafunde a mu Baibolo kimye kyo mubena kufuukwila pamo bintu byanema.—Byambo bya Mana 8:32, 33.

BYO MWAKONSHA KUBA:

• Bulainga benakwenu byo mubena kulanguluka

• Isambai na benakwenu saka mukyangye kuswa kuba bintu bimo.