LUFUNJISHO 7
Bya Kufunjisha Mwanenu
“Bino byambo byo mbena kwimukambizha ja lelo byafwainwa kwikala mu muchima wenu, kabiji mwafwainwa kwibifunjishanga na mukoyo baana benu.”—Mpitulukilo ya mu Mizhilo 6:6, 7
Yehoba wabikileko lunengezho lwa kisemi ne kupa bansemi mwingilo wa kulama baana babo. (Kolose 3:20) Anweba bansemi muji na mwingilo wa kufunjisha baana benu kutemwa Yehoba pa kuba’mba bakekale na maana inge bakoma. (2 Timoti 1:5; 3:15) Mwafwainwa kuyuka biji ku muchima wa mwanenu. Kabiji byubilo byenu nabyo byanema bingi. Mwakonshatu kufunjisha bulongo baana bene Mambo a Lesa umvwe anweba bene emufika pa muchima.—Salamo 40:8.
1 KASULUKILAINGA BAANA BENU PA KWISAMBA NABO
BYAMBA BAIBOLO: “Muntu yense wafwainwa kupelawizha kumvwa kabiji abande kwamba.” (Yakoba 1:19) Musaka baana benu kwimukasulukila pa kwisamba nabo. Bafwainwa kuyuka’mba musakuteleka inge baji na bya kwimubula. Kasulukilainga baana benu pa kuba’mba nabo bakasuluke pa kwisamba nenu. (Yakoba 3:18) Baana benu kechi bakakasulukanga pa kwisamba nabo ne, inge bayuka’mba musa kwibatataukila nangwa kwibazhachisha. Batekenyainga baana benu ne kwibabula’mba mwi batemwa.—Mateo 3:17; 1 Kolinda 8:1.
BYO MWAKONSHA KUBA:
Telekainga inge baana benu baji na bya kwimubula
Isambainga jonse na baana benu, kechi kwisambatu inge paikala lukatazho ne
2 KWATAKANYAI KYO BABENA KWAMBA
BYAMBA BAIBOLO: “Awa ulangulukishapo pa bintu ukamona byawama.” (Byambo bya Mana 16:20) Kimye kimo mwafwainwa kutelekesha bibena kwamba baana benu pa kuba’mba muyuka biji ku muchima. Banyike javula batemwa kubaisha bintu pa kwamba nangwa kufya biji ku muchima. “Muntu inge wakumbula saka akyangye kumvwa bishinka, ko kukosama.” (Byambo bya Mana 18:13) Kuzhingilanga bukiji ne.—Byambo bya Mana 19:11.
BYO MWAKONSHA KUBA:
Balekai baana benu bambe, kwibachibikizhanga nangwa kuzhingila ne
Saka muvuluka byo mwaubanga pa jifumbi jo bajipo ne bintu byo mwamonanga’mba byanema
3 ANWEBA BENE BANSEMI KWATANKANAI
BYABO BAIBOLO: “Mwanami, umvwa mafunde a bashobe, kabiji kange ulengulule bikufunjisha bainobe ne.” (Byambo bya Mana 1:8) Yehoba wapa bansemi bonse luusa lwa kulama baana babo. Mwafwainwa kufunjisha baana benu kwimunemeka ne kwimukokela. (Efisesa 6:1-3) Baana bayuka inge bansemi babo kechi ‘bakwatankana na muchima umo’ ne. (1 Kolinda 1:10) Inge mwabula kuyila mumo, kange mumweshenga bino pa baana benu ne. Kubula kuyila mumo kulengela baana benu kukankalwa kwimunemeka.
BYO MWAKONSHA KUBA:
Isambai na benakwenu bya kufunjisha baana benu
Inge mwabula kuyila mumo pa bya kufunjisha baana, telekeshai bibena kwamba benakwenu
4 IKALAI NA MUTANCHI WA KUFUNJISHA BAANA
BYAMBA BAIBOLO: “Funjishai mwana jishinda jo afwainwa kwendamo.” (Byambo bya Mana 22:6) Kechi mwakonsha kufunjisha bulongo baana kwakubula mutanchi ne. Mwafwainwa kwikala na mutanchi wa kufunjisha baana benu ne kwibajimunako. (Salamo 127:4; Byambo bya Mana 29:17) Kujimuna baana kechi kulumbulula kwibakabisha ne. Kulumbulula kwibakwasha kumvwisha mizhilo. (Byambo bya Mana 28:7) Kabiji funjishai baana benu kutemwa byambo bya kwa Yehoba ne kulondela mafunde anji. (Salamo 1:2) Kino kikebalengela kwikala na jiwi ja mu muchima jawama.—Bahebelu 5:14.
BYO MWAKONSHA KUBA:
Kwashai baana benu kuyuka’mba Lesa koaji kabiji bafwainwa kumuketekela
Bafunjishai bayukenga byubilo byatama nabiji bintu bitanwa pa intaneti ne balunda bakwisamba nabo pa intaneti. Bafunjishai kubula kwibyuba. Kabiji bafunjishai kubula kwipampata bantu bafwainwa kwibakuna
“Funjishai mwana jishinda jo afwainwa kwendamo”