Nanchi Neyuka Bulongo byo Nji Nyi?

WAKONSHA KUBA BYEPI?

Fwanyikizha bino: Karen uji ku kijiilo, kabiji aku ufikatu, mulunda nanji wamwipuzha’mba:

Karen byo aaluluka, wamona mulunda nanji Jessica saka aji na mabotolo a malwa abiji mu maboko. Jessica wapa Karen botolo umo ne kumwambila’mba: “Kechi ukiji mwanyike kya kuba ke ubule kusangalala ne, tomako kamo.”

Karen ukeba kukana, bino Jessica ke mulunda nanji ye atemwa. Kabiji Karen ukeba kutokesha mulunda nanji ku muchima. Kunungapo, inge kya kuba Jessica, mulunda nanji wawama, ubena kutoma, ko kuba’mba malwa kechi atama ne. Karen walanguluka’mba, ‘Ke botolotu umo wa malwa. Kechi mbena kutoma michi ipendañana ne.’

Umvwe yobe wajinga Karen, inge waubile byepi?

AKITULUMANA NE KULANGULUKAPO!

Pa kuba’mba ufuukulepo bulongo inge kino kintu kyakumwekela, wafwainwa kwiyuka bulongo byo uji ne kuyuka byo ukeba kuba mu bwikalo bobe. Inge wauba bino, ukefuukwilanga bintu mu bwikalo bobe, kechi ukaleka bantu kukufuukwila bya kuba mu bwikalo ne.—1 Kolinda 9:26, 27.

Wakonsha kwikala byepi na buno bulume bwa kwifuukwila bintu? Patanshi mona inge wakonsha kukumbula mepuzho alondelapo.

1 ÑANYI BINTU BYO NGUBA BULONGO?

Kuyuka bintu byo uba bulongo ne byubilo byawama byo uji nabyo kukakukwasha kubula moyo pa kuba bintu.

MUNTU YE BAAMBAPO MU BAIBOLO: Mutumwa Paulo wanembele’mba: “Nangwa kya kuba kechi nayuka kwamba bulongo ne, bino maana nji nao.” (2 Kolinda 11:6) Na mambo a kuba Paulo wayukile binembelo, kechi wachinanga inge bakwabo babena kwamba byatama ne. Kechi waubile moyo na mambo a bintu byatama byo baambanga ne.—2 Kolinda 10:10; 11:5.

YUKA BYO UJI: Nemba mwingilo ye wayuka nangwa kya bupe kyo uji nakyo.

Pano eseka kulumbulula byubilo byawama byo uji na byo. (Nanchi uta bantu muchima nyi? Wi mpanyi nyi? Bantu ba kuketekela nyi? Uba bintu bukiji nyi?)

2 MWEPI MO MBULA KUBA BULONGO?

Inge chenyi wa ku nkinga wachibika bino wabula kumunungakanya bulongo, ukakyofwakotu pacheche wachibika jikwabo. Kyo kimotu, ne obewa inge wabula kuwamishako mumo mo ubula kuba bulongo, kechi ukafika palepa mu bwikalo ne.

MUNTU YE BAAMBPO MU BAIBOLO: Mutuma Paulo wayukile bukoke bo ajinga nabo. Wanembele’mba: “Mu muchima wami nsekela bingi mu mizhilo ya Lesa, bino namona mu mubiji wami muji muzhilo mukwabo ubena kulwa na muzhilo wa mu muchima wami ne kuntwala mu buzha ku muzhilo wa bundengamambo.”—Loma 7:22, 23.

YUKA BYO UJI: Ñanyi bintu byo ubula kuba bulongo byo wafwainwa kuwamishako?

3 ÑANYI BINTU BYO NKEBA KUBA?

Nanchi wakonsha kukanjila takisi ne kwambila dalaivwa amba akuzhokoloshe muzhi yense kufikatu ne manyi byo asakupwamo mu motoka nyi? Kuba bino ke konaunatu mali ku kintu kyabula nkito.

Wafunjilako ka? Kuyuka byo ukeba kuba, kukakukwasha kubula kutaya kimye pa bintu byatutu. Ukebikila bikonkwanyi ne kwibifikizha.

MUNTU YE BAAMBPO MU BAIBOLO: Paulo wanembele’mba: “Amiwa kechi nyema kinyemenyemetu ne.” (1 Kolinda 9:26) Paulo kechi waikele bwikalo bwa kubula kuyuka byo akeba kuba ne, pakuba aye wibikijile bikonkwanyi ne kwibifikizha.—Filipai 3:12-14.

YUKA BYO UJI: Nemba bikonkwanyi bisatu byo ukeba kufikizha mu mwaka ubena kwiya.

4 ÑANYI BINTU BYO NAITABILAMO?

Inge kechi wayuka byo waitabilamo ne, kechi ukafuukulanga bintu bulongo ne. Byonkatu longolo byo alaula misombelo, ukalulanga milanguluko yobe kwesakana na bikeba bakwenu. Kechi ukayuka byo ukeba kuba obe mwine mu bwikalo ne.

Bino inge wayuka byo waitabilamo, kechi ukalondelangatu byamba bantu ne. Ukobanga bintu byo waitabilamo.

MUNTU YE BAAMBPO MU BAIBOLO: Saka akijitu mwanyike, ngauzhi Danyela “wafuukwilepo mu muchima wanji” amba usakukookela mizhilo ya Lesa, nangwatu kya kuba wajinga kwalepa na kisemi kyanji. (Danyela 1:8) Kino kimwesha’mba wiyukile aye mwine byo ajinga, kabiji wayukile byo akebelenga mu bwikalo.

YUKA BYO UJI: Ñanyi bintu byo waitabilamo? Kya kumwenako: Nanchi waitabila mwi Lesa nyi? Umvwe ibyo, mambo ka? Ñanyi bintu bikulengela kushiinwa’mba Lesa koaji?

Nanchi waitabila kuba’mba mafunde a Lesa etukwasha mu bwikalo nyi? Inge ibyo, mambo ka?

Nanchi uji nobe jibula jo balelaulatu na mwela nyi, inyi uji nobe kichi kyatwezha mizhazhi kyakonsha kubula kutupuka na kinkunkwila kikatampe? Inge wayuka byo ukeba kuba, ukekala nobe kichi kyatwezha mizhazhi. Kabiji kino kikakukwasha kutana mukumbu wa buno bwipuzho bwa kuba’mba, Nanchi neyuka bulongo byo nji nyi?