Ñanyi Kintu Kyafwainwa Kwimukwasha Kutwajijila Kufundanga Baibolo?

Kufunda Baibolo kwawama bingi. Pano bino, kechi kyapeela ne. Mukamwenamo ñanyi bintu inge mwatwajijila kufunda Baibolo? Ñanyi kintu kyafwainwa kwimukwasha kutwajijila kufundanga Baibolo nangwa kya kuba mubena kupita mu makatazho?

1. Kufunda Baibolo kwafwainwa kwimukwasha byepi?

“Mambo a Lesa o omi kabiji aji bingi na bulume.” (Bahebelu 4:12) Baibolo wawama bingi mambo witubuula bintu bikeba Lesa ne byo emutemwa. Musakufunda bintu byavula bingi mu Baibolo bisakwimukwasha kwikala bwikalo bwawama ne kuketekelatu mwi Lesa kwapwa. Kabiji Baibolo usakwimukwasha kwikala mulunda ne Yehoba. Kufunda Baibolo kusakwimukwasha kupimpula byubilo byenu ne kwikala bwikalo bwawama.

2. Mambo ka o kyanemena kuyuka bukine buji mu Baibolo?

Bukine buji mu Baibolo bujitu byonka biji bya buneme. O ene mambo Baibolo o etutundaikila kuba’mba “pota bukine kabiji kange wibupotolweshe ne.” (Byambo bya Maana 23:23) Inge twayuka kyanemena bukine buji mu Baibolo, tukebikako bingi kufundanga Baibolo nangwa kya kuba tubena kupita mu makatazho.​—Tangai Byambo bya Maana 2:4, 5.

3. Yehoba wafwainwa kwimukwasha byepi kutwajijila kufunda Baibolo?

Byo aji Mulenga wa bulume bonse kabiji mulunda nenu, Yehoba wimuyuka bingi bulongo kabiji ukeba kwimukwasha’mba mumuyuke. Wafwainwa kwimupa “kizaku ne bulume bwa kwingila.” (Tangai Filipai 2:13.) Inge kya kuba mubena kukeba kwikala na kizaku kya kufunda pe Yehoba ne kwingijisha bintu byo mubena kufunda, winengezha kwimukwasha. Kabiji inge mwamulomba, aye ukemupa bulume bwa kushinda makatazho nangwa lumanamo. Onkao mambo, lombainga kwi Yehoba kimye kyonse kwimukwasha kutwajijila kufunda Baibolo.​—1 Tesalonika 5:17.

FUNJILAIPO BIKWABO

4. Mwafwainwa kuba byepi kumwesha’mba kufunda Baibolo kwanema bingi kwi anweba?

Bimye bimo, tupayankana bingi kya kuba tukankalwa ne kwikalapo na kimye kya kufunda Baibolo. Ñanyi kintu kyafwainwa kwitukwasha? Tangai Filipai 1:10, ne kwisamba ano mepuzho:

• Mwalanguluka’mba ñanyi “bintu byanemesha” mu bwikalo bwa muntu?

• Mwafwainwa kuba byepi pa kuba’mba mutemwe kufundanga Baibolo?

1. Inge mwatendekelapo kubika busenga panshi mu mbekete, bino amba mubikemo mabwe, musakutwelatu mabwe acheche.

2. Inge mwatendekelapo kubikamo mabwe patanshi mu mbekete, ko kuba’mba mukekala mpunzha mwa kubika busenga bwavula. Kyo kimotu, inge mwatangizhako “bintu byanemesha” mu bwikalo bwenu, mukengila bulongo ne kwikala na kimye kya kubilamo bintu bikwabo

Kufunda Baibolo kwitukwasha kuyuka Lesa ne kumwingijila ne kwikala mulunda nanji. Tangai Mateo 5:3, ne kwisamba buno bwipuzho:

• Ñanyi bintu byo tumwenamo inge twatemwa kufunda Baibolo?

5. Chinchikai inge ke bemumanyike

VIDYO: Byawama Byafuma mu Kutwajijila Kufunda Baibolo (5:22)

• Mu vidyo ye mwatamba, balunda ba ba Francesco ne kisemi kyabo baubile byepi ba Francesco byo bebabuujile bintu byo bafunjilenga mu Baibolo?

• Ñanyi bintu byo bamwenejilemo byo batwajijile kufundanga Baibolo?

Tangai 2 Timoti 2:24, 25, ne kwisamba ano mepuzho:

• Balongo benu ne balunda nenu bomvwa byepi ku muchima kwimumona na kufunda Baibolo?

• Kwesakana na bino byepelo, mwafwainwa kuba byepi inge mukwenu kechi watemwa’mba anweba mufundenga Baibolo ne? Mambo ka o mwakumbwila byobyo?

6. Ketekelai mwi Yehoba kwimukwasha

VIDYO: Yehoba Witukwashishe Kupimpula Byubilo Byetu (3:56)

• Mu vidyo ye mwatamba, ñanyi bintu byalekele kuba ba Jim pa kuba’mba batokeshe Yehoba ku muchima?

• Ñanyi bintu byo mwatemwa byaubile ba Jim?

Tangai Bahebelu 11:6, ne kwisamba ano mepuzho:

• Ñanyi bintu Yehoba byo akobila bantu “bamukebesha” ko kuba’mba bebikako kuba’mba bamuyuke ne kuba bintu bimutokesha ku muchima?

• Kwesakana na kino kyepelo, nanchi Yehoba utemwa byo mwibikako kufunda Baibolo nyi? Mambo ka o mwaambila byobyo?

ÑANYI BISHINKA BYO MWAFUNDA?

Nangwa kya kuba kechi kyapeela kufunda Baibolo ne, bino kufunda Baibolo kukemukwasha kwikala na bumi bwa myaka ne myaka. Twajijilai kuketekelatu mwi Yehoba kabiji ukemupesha.

Mepuzho a kupitulukamo

• Mambo ka o mwatemenwa bukine buji mu Baibolo?

• Mwafwainwa kumwesha byepi amba mwanemeka bingi bintu byo mubena kufunda mu Baibolo?

• Mambo ka o mwafwainwa kulombelanga kwi Yehoba kwimukwasha kutwajijila kufunda Baibolo?

KEBAI BISHINKA BIKWABO

Monai ano mashinda ana akwasha bantu bavula bya kwingijisha kimye bulongo.

“Byo Mwakonsha Kwingijisha Bulongo Kimye Kyenu” (Labainga!, March 2014)

Monai Yehoba byo akwashishe mwanamukazhi umo wajinga na mwatawanji wabujile kuyuka kyakwashishe mukazhanji kubanga bintu bitokesha Lesa ku muchima.

Yehoba Witukwasha Kusenda Bisendwa Byetu (5:05)

Monai mwanamulume umo byo amwenejilemo mu byubilo byawama bya mukazhanji watwajijile kufunda Baibolo.

Nakebele’mba Ngyuke Bukine (6:30)

Bakamonyi ba kwa Yehoba bimye bimo bebapamo mambo a kuba’mba babena kwabanya bisemi. Nanchi bino bya kine?

“Nanchi Bakamonyi ba kwa Yehoba Baleta Mabano mu Bisemi nyi, Inyi Bakwatankanya Bisemi?” (Kibaaba kiji pa jw.org)