Nanchi Bakamonyi ba kwa Yehoba Baleta Mabano mu Bisemi nyi, Inyi Bakwatankanya Bisemi?

Bakamonyi ba kwa Yehoba tukosesha bisemi byetu ne bya bakwetu. Tunemeka Lesa Mulenga wetu byo abikako kisemi. (Ntendekelo 2:21-24; Efisesa 3:14, 15) Mu Baibolo muji mafunde a Lesa akwasha bantu bavula baji mu masongola ne kwibaletela lusekelo.

Bakamonyi ba kwa Yehoba Bakwasha Bisemi Kwikala Bulongo

Twibikako bingi Kulondela mikambizho ya mu Baibolo mambo ilengela banabalume, banabakazhi ne bansemi kwikala bawama. (Byambo bya Maana 31:10-31; Efisesa 5:22–​6:4; 1 Timoti 5:8) Maana a mu Baibolo akwasha ne bisemi byaabenamo mu mpopwelo kukwatankana. (1 Petelo 3:​1, 2) Akimonai byaambapo bantu baji na benakwabo baya mu bupopweshi bwa Bakamonyi ba kwa Yehoba:

• Ba Clauir bekala ku Brazil baambile’mba “byo twisongweletu kechi twaikele bulongo ne, pa myaka itanu na umo twatobokanga bingi ne kwizhingijisha. Pano ba Ivete byo baikele Bakamonyi ba kwa Yehoba, baikele na byubilo byawama nabiji butemwe ne kutekanya. Kino kitulengejile kwikala bulongo mu masongola.”

• Ba Agness bekala mu Zambia baambile’mba: “Ba mwatawami ba Chansa byo batendekele kufunda Baibolo na Bakamonyi nebakanyanga mambo nalangulukanga’mba Bakamonyi baleta mabano mu bisemi. Kufunda Baibolo kwitulengela kwikala bulongo mu masongola etu.”

Mu mwingilo wa kusapwila tubuula bantu maana a mu Baibolo byo akonsha kwibakwasha:

• Kusala wa kutwela nanji mu masongola

• Bya kwikala na lusekelo mu mwaka mutanshi ye mwisongwelamo

• Bya kwikala na bena buko

• Bya kwingijisha mali

• Bya kuleka kwipachika

• Bya kwilekelako mambo

• Bya kufunjisha baana

Nanchi mu kisemi mwikala makatazho umvwe umo mu masongola waikala kamonyi nyi?

Kimye kimo makatazho ekalamo. Byo byaambile ne sawakya wa mu 1998, kampanyi kapesapesa ka Sofres kataine kuba’mba kisemi kimotu kyo kikala na makatazho pa bisemi 20 umvwe umo waikala kamonyi.

Yesu waambile’mba aba balondela mafunjisho anji kimye kimo bakekalanga na makatazho mu bisemi byabo. (Mateo 10:32-36) Shayuka wa bya mpito aye Will Durant waambile’mba mu bukalama bwa bena Loma, “Bena Kilishitu bebapanga mambo amba bo balengela bisemi kwikala na makatazho,”a ne Bakamonyi bamo lelo jino bebapamo mambo. Nanchi kino kilumbulula’mba Bakamonyi bo baleta ano makatazho mu kisemi nyi?

Kochi Mukatampe wa mu Europe Utala pa Luusa lwa Bantu pa kuchiba mambo o babepejile Bakamonyi ba kwa Yehoba, waambile’mba bakilongo babula Bakamonyi bo baleta mabano mu bisemi mambo “kechi bebaswisha nangwa kunemeka byo byaitabilamo balongo babo ne.” Kochi wanungilepo’mba “bino bintu kechi bibena kumwekelatu Bakamonyi ne, bibena kumwekelatu ne bonse baji na benakwabo baya mu bupopweshi bungi.”b Nangwa kya kuba Bakamonyi ba kwa Yehoba bapita mu ano makatazho, bebikako bingi kulondela jifunde ja mu Baibolo ja kuba’mba: “Kange mushinkanyenga kibi na kibi ku muntu nangwa umo ne. . . . Umvwe kyakonsheka, monka mwayila bulume bwenu, ikalainga mu mutende na bantu bonse.”​—Loma 12:17, 18.

Mambo ka Bakamonyi ba kwa Yehoba o Besongwelatu Mulwabo?

Bakamonyi ba kwa Yehoba balondela mukambizho wa mu Baibolo wa kuba’mba kusongolatu “kana monka mwi Nkambo.” Ko kuba’mba kusongolatu muntu waitabila byonka byo baitabilamo. (1 Kolinda 7:39) Uno mukambizho wa mu Baibolo wanema bingi. Byo byaambapo ne Kibaba kimo kya mu 2010 kya mu buku wa kuba’mba, Journal of Marriage and Family amba “bulunda bwa bantu baji mu masongola bukosa kya kine kine umvwe bonse babiji baitabila mu bintutu bimo.”c

Nangwa byonkabyo, Bakamonyi kechi batundaika bakwabo kwikana na benakwabo babula Bakamonyi ne. Baibolo waamba’mba: “Umvwe mulongo uji na mukazhi wabula kwitabila, bino mukazhanji waswa kwikala nanji, kechi abane nanji ne; kabiji umvwe mwanamukazhi uji na mwatawanji wabula kwitabila, bino mwatawanji waswa kwikala nanji, kechi abane nanji ne.” (1 Kolinda 7:12, 13) Bakamonyi ba kwa Yehoba balondela uno mukambizho.