Ñanyi Uketwabanya na Butemwe bwa Lesa?
“Atweba tutemwañana mambo aye witutemenwe patanshi.”—1 YOANO 4:19.
1, 2. (a) Mamboka okyanemena kuyuka’mba betutemwa? (b) Butemwe bwakwa ñanyi botukebesha?
NANCHI kyanema byepi kwianweba kuyuka’mba bemutemwa? Bantu bebatemwa bingi kufuma kubulukeke kufikatu nebyo bakoma. Nanchi mwamonapo kala kaana kobafumbata kwibainako nabutemwenyi? Nangwa pobiwe kintu kyabyepi nangwa kyabyepi, mwana yebafumbata kwibainanji byoamona sabasangalala uyuka nekuyuka’mba bintu bijitu bulongo. Abya kana muvuluka byomwajinga muyoya myaka yabwanyike yakatezhenga kimye kimonyi? (1 Tesalonika 2:7) Kimo kimye kampe kechi mwayukile kyomwakebelenga nangwa kumvwisha kimulengejile kukeba kyokyo kintune, pano bino byokyanemapo kuyuka’mba bashenu nebainenu bemutemenwe! Nanchi kechi kyawamine byomwibasolomokanga nekwibabula lukatazho lonse lomwajinga nalo nangwa kwibepuzha nenyi? Kyakine, atweba bonse mubwikalo bwetu, tukeba bingi kwitutemwa, mambo kwitutemwa kwauno mutundu kumwesha’mba nanchi netuwa twanema.
2 Butemwe bwajinga nabansemi yetu kimye kyonse bobwalengejilenga kukoma bulongo. Onkao mambo, kuketekela kuba’mba Tata wetu wa mwiulu, Yehoba witutemwa kekintu kyanema bingi mubwikalo nemumilanguluko yetu yakumupashi. Bamo batanga ino magazini kampe kechi bajinga nabansemi bebalamanga bulongone. Umvwe nenuwa byomwajinga, kine kekintu kyakwimukosesha. Nangwa kyakuba bansemi yenu kechi bemulaminenga bulongone nangwa bakankelwe kwimulama, butemwe bwakishinka bwa Lesa bukemulama.
3. Yehoba wakosesha byepi bantu banji’mba wibatemwa?
3 Yehoba kupichila mwingauzhi wanji Isaya waambile’mba mwanamukazhi wakonsha ‘kuvulama’ mwananji ukyamwa, bino aye kechi ukavulama bantu banjine. (Isaya 49:15) Byonkabyo, Davida naye waambile naluketekelo’mba: “Batata ne bamama umvwe bandekelela, ponkapo Yehoba ukantola.” (Masalamo 27:10) Byo kibena kukoseshapo! Nangwatu muji mubwikalo bwamutunduka nangwa mutunduka, umvwe kyakuba mwipana kwi Yehoba Lesa, kimye kyonse mwafwainwa kuvulukanga’mba butemwe boemutemwa kuba bwaesakanatu nangwa pacheche nabobwa bwabantune!
Ilamai Mubutemwe bwa Lesa
4. Bena Kilishtu batanshi bakosejileko byepi’mba Lesa wibatemwa?
4 Kimyeka kyomwayukile butemwe bwa Yehoba? Kampe kyomwapitamo kipasha nakyokya kyapichilemo nebena Kilishitu bamu kitota-myaka kitanshi. Kyapitala kyabutanu munkalata yakwa Paulo yoanembejile bena Loma kyalumbulula bingi bulongo bandengamambo bepatwile kwi Lesa, byobaishile kwikala balunda na Yehoba. Mu vesi 5 tutangamo’mba: “Butemwe bwa Lesa bebukumbanya mu michima yetu ku Mupashi Wazhila, ye twapewa.” Paulo wanungapo muvesi 8 amba: “Lesa witumwesha butemwe bwanji mwine boetutemenwamo, mambo, byo twakijinga bandengamambo, Kilishitu witufwijile.”
5. Kika kimukwashishe kumvwisha nekusanchila kubaya kwabutemwe bwa Lesa?
5 Byonkabyo, kimye kyomwatambwijile bukine bwamu Byambo bya Lesa nekutatula kwikala nalwitabilo, mupashi wazhila wa Yehoba watatwile kwingila mumuchima wenu. Mu jino jishinda mwatatwile kumvwisha nekusanchila mubuwame bwa Yehoba pakutuma Mwananji yenka yeatemwisha kwiya nakwimufwila. Yehoba wimukwashishe kuyuka byoatemwa bantu. Byomwayukile’mba nangwa kyakuba mwasemekelwe bandengamambo bepatwile kwiaye, Yehoba washinkwijile bantu jishinda jakwikelamo baoloka naluketekelo lwabumi bwamyaka nemyaka, nanchi kechi kimuletejile lusekelo nenyi? Abya kechi mwatundaikilwe kumutemwa Yehoba nenyi?—Loma 5:10.
6. Mamboka kimye kimo otwakonsha kulangulukila’mba kampe tuji kwalepa ne Yehoba?
6 Butemwe bwa Shenu wamwiulu byobwimukokele kabiji nebyo mwapimpwile bwikalo bwenu’mba emutambule, mwapaine bumi bwenu kwi Lesa. Pakino kimye mubena kwiyowa mutende na Lesa. Bino nangwa byonkabyo, nanchi kimye kimo mulanguluka’mba muji kwalepa ne Yehoba nyi? Muntutu yense wakonsha kulanguluka byonkabyo. Bino kimye kyonse mwafwainwa kuvulukanga’mba Lesa kechi walukane. Butemwe bwanji bwakimye kyonse, byonka biji juba jibula kuleka kusamisha mintetenga yajo yakyeya kyatwa kyuya panopantanda. (Malakai 3:6; Yakoba 1:17) Bino atweba twakonsha kwalukako nangwa pacheche. Ntanda byoizhokoloka, lubaji lwayo lumo lwikala mumfishi kebufuku. Byonkabyo, neatweba inge twafuma kwi Lesa nangwa pachechetu, twakonsha kulanguluka’mba tuji kwalepa ne aye. Pano twakonsha kubapo byepi kuba’mba tupwishe luno lukatazho?
7. Kwitalatala atweba bene kwakonsha kwitukwasha byepi kwikala mubutemwe bwa Lesa?
7 Umvwe twamona’mba twipatulako pacheche nabutemwe bwa Lesa, twafwainwa kwiipuzha’mba: “Nanchi amiwa mwine yami nelekelela mambo’mba kyaikelaka nji nabutemwe bwa Lesa? Nanchi pajiko mumo mombena kufumina pachepache kwi Lesa mumi wabutemwe, nekumwesha mumashinda avula bukoke bwalwitabilo lwaminyi? Nanchi nata muchima ku “bya buntunshi” mukifulo kyakuta muchima ku “bya Mupashi”? (Loma 8:5-8; Bahebelu 3:12) Inge twipatula kwi Yehoba atweba bene, twafwainwa kwingijilapo bukiji-bukiji kuwamisha bintu pakuba’mba tubwele kubulunda bwetu bwawamisha ne aye. Yakoba witukambizha’mba: “Fwenyai kwipi ne Lesa, kabiji ne aye ukafwenya kwipi ne anweba.” (Yakoba 4:8) Umvwinai byambo byakwa Yuda byakuba’mba: “Anweba batemwe, kasa mwikomesha anwe bene mu lwitabilo lwenu lwazhila, ne kulomba mu Mupashi Wazhila, ne kwilama monka mu butemwe bwa Lesa.”—Yuda 20, 21.
Kwaluka kwa Bwikalo Kechi Kupwisha Butemwe bwa Lesa Ne
8. Ñanyi lupimpu lwakonsha kubiwa mubwikalo bwetu kwakubula kuketekela?
8 Bwikalo bwetu mubuno bwikalo botujimo bwalauka-alaukatu. Mfumu Solomone waambile’mba, “bimye ne bintu bisolomokatu bi[tu]fikila bonse.” (Musapwishi 9:11) Kyubatu nobe kukopa kwa jiso bwikalo bwetu bwaalukatu nobe kanaka. Juba jimo twakonsha kwikala batuntulu, kabiji juba jikwabo twakonsha kukolwa bingi. Nkito yetu yakumubiji yotwingila yakonsha kumweka nobe kechi ikapwane, bino kesha mingilo yapwa. Lufu nalo lusolomokatu nekwipaya mutemwe wetu. Bena Kilishitu mukyalo kimo bakonsha kwikala mutende pakimye kyabayakotu, kabiji namba bekalekotu byonkabyo, malwañano atendeka kekwibatupanya. Kampe betubepelatu bubela, twamanama kyatu. Kyakine, bwikalo kechi bujitu bwantentente nekumatwi nzoone.—Yakoba 4:13-15.
9. Mamboka okyawamina kulanguluka byambo bimo biji mu Loma kyapitala 8?
9 Umvwe kyakuba bintu byamalwa, bitumwekela, twakonsha kutatula kwiumvwa’mba tuji bunke nekulanguluka’mba butemwe bwa Lesa boetutemwa bwapwa. Atweba bonse byotuponenwa nabintu bya uno musango, twafwainwa kuvuluka byambo byalutekenesho byamutumwa Paulo biji mu Loma kyapitala 8. Bino byambo wibyambile kubena Kilishitu bashingwa namupashi. Pano bino, bino byambo bingila neku mikooko ikwabo yabingishiwa kwikala balunda ba Lesa baoloka, byonka byajinga Abalahama kimye bwina Kilishitu kasa bukyangye kufika.—Loma 4:20-22; Yakoba 2:21-23.
10, 11. (a) Bubelaka balwanyi kimo kimye bobabepela bantu ba Lesa? (b) Mamboka abo bubela kyo bwabujila kunema kubena Kilishitu?
10 Tangai Loma 8:31-34. Paulo washikisha’mba: “Umvwe Lesa tuji nanji, ñanyi uketwimena?” Kyakine, Satana nebademona banji betwimena. Balwanyi betu bakonsha kwitubepela nekwitutwala kubije. Bansemi bamo babwina Kilishitu bebabepela’mba bashikwa baana babo mambo akukana kubukilwa mujishinda jizhilulula mizhilo ya Lesa, nangwa namambo akubula kwibaswisha kusekelelako bintu bimo byakupopwela bankishi. (Byubilo 15:28, 29; 2 Kolinda 6:14-16) Bena Kilishitu bakwabo bakishinka bebabepela’mba bansatuki mambo akubula kulwako nkondo nekwipaya bantu bakwabo nangwa kubula kwivwanga mubya bumulwila ntanda. (Yoano 17:16) Bantu bamilengulwila bamo basampanya bingi bubela pamawaileshi, mumapepala abyambo, nepa televizhonyi, kasa babepela Bakamonyi bakwa Yehoba amba bupopweshi bwatama bingi.
11 Bino kange mulubengako kuba’mba nangwatu mumoba a batumwa, baambilenga’mba: “Mambo twayuka namba luno lwipatulo lunenwa bibi konse, konse” ne. (Byubilo 28:22) Nga abyo bintu byabubela byakonsha kunema byepi? Lesa yewayuka bololoke bwabena Kilishitu bakine bobaji nabo pamambo alwitabilo lwabo mukitapisho kya Kilishitu. Ñanyi mambo Yehoba oakonsha kushikilwa bapopweshi banji saka ebapa nekyabupe kyanema kya Mwananji yeatemwisha? (1 Yoano 4:10) Yesu byoasangwilwe kufuma kubafu nekwikala kukilujo kya Lesa, ukwashako bena Kilishitu. Ñanyi uji nalūsa lwakukana’mba Kilishitu kechi ukwasha bantu bamukokela nangwa kukana’mba Lesa kechi ulamawizha bantu banji bakishinkane? Kafwako nangwa umo wakonsha kukanane!—Isaya 50:8, 9; Bahebelu 4:15, 16.
12, 13. (a) Bintuka byakonsha kubula kwitwabanya nabutemwe bwa Lesa? (b) Ñanyi mulanguluko Diabola yeaji nanji pakwituletela malwa auno mutundu? (c) Mamboka bena Kilishitu kyobakonshesha kushinda ano makatazho?
12 Tangai Loma 8:35-37. Atweba bonse pamuntu pamuntu, abya kujipo muntu nangwa kintu kyakonsha kwitwabanya nabutemwe bwa Yehoba ne Mwananji, Yesu Kilishitu? Satana wakonsha kwingijisha bantu banji bapanopantanda kumanyika bena Kilishitu. Pamyaka yavula yapitapo, mubyalo byavula balongo nebanyenga yetu bavula bebamanyikilenga bingi. Nangwatu lelo jino mumapunzha amo, balongo betu pajuba pajuba bayanda bingi. Bamo baji mubipowe byanzala nangwa kuvwala misakila. Mulangulukoka Diabola yeaji nanji pakuleta malwa auno mutundu? Mulanguluko wanji umo ke wakukeba kulekesha bupopweshi bwakine bwa Yehoba. Satana ukeba’mba twitabile’mba Lesa kechi watwajijila kwitutemwane. Pano nanchi ano omambo enenyi?
13 Byonka byajinga Paulo watongwele Masalamo 44:22, twafunda Byambo bya Lesa byanembwa. Twayuka kuba’mba bino bintu bibena kwitumwekela atweba ‘mikooko’ yanji mambo ajizhina ja Lesa. Kuzhijikwa kwajizhina ja Lesa nekutumbijikwa kwa bumfumu bwanji nakyo kyokibena kulengela. Bino byobintu byalengela Lesa kuswisha meseko kutwajijila, kechi’mba waleka kwitutemwane. Nangwa kyakuba pekale malwa abyepi nangwa abyepi, twayukishatu kuba’mba butemwe Lesa boatemwa bantu banji, neatweba umo umo, kechi bwaalukane. Lukatazho lonse lotwakonsha kupitamo, lukashinjiwa inge twatwajijila kusunga bulumbuluke bwetu. Butemwe bwa Lesa bubula kwaluka bwitukosesha nekwitukwasha.
14. Mamboka Paulo kyoashiinwe pamambo abutemwe bwa Lesa nangwa kyakuba bena Kilishitu bapita mumakatazho?
14 Tangai Loma 8:38, 39. Kika kyalengejile Paulo kushiinwa’mba kafwako nangwa kimo kyakonsha kwabanya bena Kilishitu nabutemwe bwa Lesa? Kwakubula nangwa kuzhinaukatune, bintu mwine Paulo byoapichilemo mumwingilo wanji byobyamukoseshe kuba’mba, makatazho kuba etwabanya nabutemwe bwa Lesa ne. (2 Kolinda 11:23-27; Filipai 4:13) Kikwabo, Paulo wayukile nkebelo ya Yehoba yamyaka nemyaka, kabiji wayukile nebyoaubijile bantu Banji kunyuma. Nanchi lufu lwakonsha kupwisha butemwe bwa Lesa kuboba bamwingijile nabukishinkanyi? Ine! Bantu bakishinka bauno mutundu inge bafwa Lesa wibavuluka kimye kyonse, kabiji ukebasangula mukimye kyafwainwa.—Luka 20:37, 38; 1 Kolinda 15:22-26.
15, 16. Tongaulai bintu bimo byakonsha kubula kulengela Lesa kuleka kutemwa bakalume banji bakishinka.
15 Kintu kiji kyonse kyakonsha kwitusolomokela, kana mapuso, kikola kikatampe nangwa buyanji bwabaya—kafwapo nangwa kimo kyakonsha kupwisha butemwe bwa Lesa boatemwa bantu banjine. Bamalaika bangovu, nabiji yewa malaika wasatukile nekwikala Satana, kuba bajimbaika Yehoba kuleka kutemwa bakalume banji bepanane. (Yoba 2:3) Makafulumende akonsha kukanya bakalume ba Lesa, kwibataya mutuleya, kwibayanjisha kampe nekwibatela’mba: “mapipo a bintu byonse.” (1 Kolinda 4:13) Luno lupato lwakubula mambo luba makafulumende lwakonsha nekutundaika bantu kwitwalukilamo, bino kechi lulengela Kalama mwine wakila walengele byonse kwitusankilapone.
16 Byotuji bena Kilishitu kechi twakonsha kuchinapotu nangwa kimo pabyobya byatongwele Paulo amba “bintu bya katataka” bibena kumweka mubuno bwikalo bujipone, nangwa ‘bintu bikeya’ kulutwe kuba’mba byakonsha kupwisha butemwe bwa Lesa kubantu banjine. Nangwa kyakuba bamalaika babi betulwishe , butemwe bwakishinka bwa Lesa bwitukwasha. Byonka byakonkomwenepo Paulo, “nangwa bula bwa mwiulu, nangwa bula bwa panshi,” kafwapo kikanya butemwe bwa Lesa ne. Ee kine, kafwapo kyakonsha kwitulefula, nangwa kwitujimukila, kyakonsha kwitwabanya nabutemwe bwa Lesa ne; kabiji kafwapo kilengwa kyakonsha kuvulañanya bulunda bwa Mulenga nabakalume banji bakishinkane. Butemwe bwa Lesa kechi bupwane; bwamyaka nemyaka.—1 Kolinda 13:8.
Nemekai Kifyele kya Lesa Myaka Nemyaka
17. (a) Mamboka kwikala nabutemwe bwa Lesa kyokwakijila “bumi mu kuwama”? (b) Tumwesha byepi kuba’mba twanemeka kifyele kya Lesa?
17 Butemwe bwa Lesa bwanema byepi kwianweba? Nanchi mwiumvwa nobe Davida wanembele’mba: ‘[Kifyele, NW] kyenu byokyakila bumi mu kuwama, kyakanwa kyami kikemutotanga. Byonkabyo nkemutotanga byonakikala na bumi: Nkasuntula maboko ami mu jizhina jenu.’ (Masalamo 63:3, 4) Kwambatu kine, abya nanchi kujipo kiji kyonse mubwikalo bwaino ntanda kyawamisha kukila butemwe bwa Lesa nebulunda bwanji bwakishinka nyi? Kyakumwenako, nanchi kwikala mutende mumilanguluko nelusekelo namambo akwikala balunda bakine ne Lesa, kuji pamo nakutwela nkito yakufola mali avulanyi? (Luka 12:15) Bena Kilishitu bamo batalañanapo kala nalweseko lwakusalapo; kana kukanako Yehoba nyi, nangwa kufwa. Kino kyokyapichilemo Bakamonyi bakwa Yehoba bavula bajinga mumakampu alumanamo aba Nazi kimye kya Nkondo ya kibiji ya Ntanda yonse. Mwavulatu, balongo betu babwina Kilishitu basajilepo kukelwa mubutemwe bwa Lesa, nekufwilamotu inge kyakonsheka. Aba bakelwa mubutemwe bwanji mubukishinka bakonsha kuketekela Lesa kukebapa bumi bwamyaka nemyaka kulutwe nalwendo, bwabula muino ntanda. (Mako 8:34-36) Bino kuji nebikwabo kechi bumi bwamyakatu bonkane.
18. Mamboka bumi bwamyaka kyotwibukebela?
18 Byotwayuka’mba kuba twaikala myaka nemyaka kwakubula Yehoba ne, pano akyesekai kufwanyikizha buno bumi byobwafwainwa kwikala kwakubula Mulenga wetu. Bwafwainwa kwikala bwavulañana, kwakubula nkebelo yakinene. Yehoba wapa bantu banji kwingila mwingilo uleta lusekelo muano moba apelako. Onkao mambo, twafwainwa kuketekela’mba Yehoba aye Wankebelo Mukatampe byoaketupa bumi bwamyaka nemyaka, bukekala bwalusekelo, satufunda bintu byawama nekwibingila bulongo. (Musapwishi 3:11) Nangwatu tukebifunde myaka yavula byepi, kechi tukapwishe kuyuka byonse ‘byazhika bunonshi, ne maana, ne kuyukisha Lesa’ ne. —Loma 11:33.
Batata Bemutemwa
19. Ñanyi byambo byaluketekelo byakwishajikapo Yesu Kilishitu byoabujile baana banji babwanga?
19 Pajuba ja Nisani 14, 33 C.E., mabanga abufuku kimye Yesu kyoajinga nabatumwa banji bakishinka 11, waambile bintu byavula bingi byakwibakosesha pamambo abintu byakijinga kulutwe yabo. Bano bonse bobakelelwe pamo ne Yesu mumeseko anji, kabiji bemwenejile bene byoebatemenwe. (Luka 22:28, 30; Yoano 1:16; 13:1) Kepo Yesu ebalaile jibiji’mba: “Batata bemutemwa.” (Yoano 16:27) Bino byambo byobyakwashishepo baana babwanga kuvuluka amba Shabo wamwiulu wibatemwa!
20. Kika kyomukeba kuba, kabiji mwakonsha kuketekela mukika?
20 Bantu bavula bomi pakino kimye baingijila Yehoba nabukishinka pamyaka yavula bingi. Kwakubula nangwa kuzhinaukatune, buno bwikalo bubi kasa bukyangye kupwa, tupitanga mumeseko avula bingi. Nangwa byonkabyo, kechi mwafwainwa kuleka ano meseko nangwa bintu byamalwa kwimuzhinausha’mba Lesa kechi wimutemwane. Kuba twaamba byavula pakinone, kine Yehoba wimutemwa anweba. (Yakoba 5:11) Twayai atweba bonse pamuntu pamuntu twingile lubaji lwetu kasa tubena kukokela mikambizho ya Lesa nabukishinka. (Yoano 15:8-10) Twayai twingijishe kakimye konse kotuji nako kutota jizhina janji. Twafwainwa kukosesha mfuukwilo yetu yakutwajijila nakufwenya kwipi ne Yehoba mululombelo nekufunda Byambo byanji. Nangwatu paji kyonse kyakonsha kwitusolomokela, umvwe tubena kwingila papela bulume bwetu mukuba byawama kwi Yehoba, tukatwajijila bamutende nekuketekela butemwe bwanji bubula kupwa kyakine kine.—2 Petelo 3:14.
Musakukumbula’mba Ka?
• Pakuba’mba tutwajijile kwikala bakosa kumupashi kabiji balusekelo, kikatakata twafwainwa kwikala nabutemwe bwa ñanyi?
• Bintuka byakonsha kubula kulengela Yehoba kuleka kutemwa bakalume banji?
• Mamboka kwikala nabutemwe bwa Lesa kyokwakijila “bumi mu kuwama”?
[Bipikichala pa peja 8]
Umvwe ketwiumvwe’mba twaabana nabutemwe bwa Lesa, twafwainwa kwingijilapo bukiji nekupwisha lolo lukatazho
[Kipikichala pa peja 9]
Paulo wayukile kyoamanamijilenga