Anweba Banyike Nanchi Mubena Kukomenako ku Mupashi Nyi?
HIDEO byoavuluka kimye kyoajinga ku sekondale sukulu, uvuluka kuba’mba: “Nangwa natanwanga ku kupwila kwa bwina Kilishitu, kechi nakebanga kwingijila Yehoba ne. Javula navulukanga byonaendanga kintanka na bakwetu kwenda na kwitota pamo na mukambwe wami. Kechi nalangulukanga kubapo kintu ne, nangwatu kukeba kukomenako ku mupashi ne.” Nobe Hideo, banyike bavula balubilamo, kechi bakeba kubapo kintu kyakine nangwa kukoma ku mupashi ne.
Umvwe mwi banyike, kampe musangalala bingi kukayapo kisela kimo. Pano umvwe mwauba’mba mwingileko mingilo imo ya ku mupashi, ne ku muchima bwii. Nga kwibikila bikonkwanyi bya ku mupashi kuba kwimusangajika ne nyi? Akilangulukai bino byambo byaambile nyimbi wa masalamo: ‘Mulaye wa Yehoba wa kine, upana maana ku bantutu. . . . Mukambizho wa Yehoba wawama, utokesha pa meso.’ (Masalamo 19:7, 8) Byambo bya Lesa byakonsha kutangijila ‘bantutu’ kwingila na maana, ‘akwibatokesha pa meso.’ Kine, bintu bya ku mupashi byakonsha kusangajika muchima wenu. Pano mwakonsha kuba byepi pa kuba’mba mwikale basangalala? Mwakonsha kutatwila pepi?
Tundaikwai Kwingijila Lesa
Patanshi mwafwainwa kutundaikwa. Monai byokyajinga kwi Mfumu Yosiya wa Bayudea. Buku wa Mizhilo ya Yehoba byobamutaine mu nzubo ya Lesa, watangilwe ku meso a Yosiya kabiji byoaumvwine bino byambo byamufikile bingi pa muchima. Ne kyafuminemo, “Yosiya wibifumishemo byonse bya bunya mu byalo byonse bya bena Isalela.” (2 Byambo bya Moba 34:14-21, 33) Kutangiwa kwa Byambo bya Lesa kwatundaikile Yosiya kuba byavula mu kutundaika mpopwelo ya kine.
Ne anwebatu mwakonsha kwikala na kizaku kya kwingijila Yehoba inge ke mutange Baibolo ne kulangulukapo pa byomwatanga. Akino kyo kyatundaikile Hideo. Watatwile kupwañana na painiya wakikulumpe, Kamonyi wakwa Yehoba wingila mwingilo wa kimye kyonse. Painiya watanganga bingi Baibolo ne kweseka kwingijisha mafunjisho ayo mu bwikalo bwanji. Byoamwenejile kwi painiya, Hideo watundaikilwe kwikala byonka byajinga painiya kabiji wakebele bingi kwingijila Lesa ne kwingijila bantu bakwabo. Bintu bya ku mupashi byoayukile byamukwashishe bingi kwikala bwikalo bwawama.
Kutanga Baibolo juba ne juba kwakonsha kutundaika banyike. Takahiro waambile’mba: “Nangwa kyakuba nalaala kala pa mwanya, inge navulukatu’mba kechi natanga mu Baibolo jojo juba ne, mbuuka ne kutanga. Ne mujino jishinda ntangijilwa na Yehoba. Kutanga Baibolo juba ne juba kwankwasha bingi kukoma ku mupashi. Aku mpwishatu sukulu wa ku sekondale natatwile bupainiya bwa kimye kyonse mambo nakebelenga kwingila bingi mu mwingilo wa Yehoba. Kabiji nji bingi na lusekelo pa kwingilako uno mwingilo.”
Kununga pa kutanga Baibolo, kika kikwabo kyakonsha kwimukwasha kukosesha kizaku kyenu kya kutota Yehoba? Tomohiro bamufunjishe kwi bainanji bukine bwa mu Baibolo. Waamba’mba: “Byonafunjile buku wa Life Does Have a Purpose sankiji na myaka ya kusemwa 19 naishile kuyuka namba Yehoba wantemwa bingi ne kuyuka kitapisho kya bukuzhi bwa kwa Yesu. Lusanchilo lwami lwa kusanchila butemwe bwa Lesa lolwantundaikile kwingila javula mu mwingilo wa Yehoba.” (2 Kolinda 5:14, 15) Byonka byajinga Tomohiro, banyike bavula batundaikwa kukomenako ku mupashi kupichila mu kwikala na lufunjisho lwabo lwa Baibolo.
Ibyepi umvwe mufwakyo kizaku kya kukeba kumwingijila Yehoba? Ñanyi wakonsha kwimukwasha? Mutumwa Paulo wanembele’mba: “Mambo ye Lesa wingila mwi anweba mu kwimusakisha kuba ne kwimwingijisha.” (Filipai 2:13) Umvwe mwalomba bukwasho kwi Yehoba, ukemupatu kyatu mupashi wanji wazhila ne aye ukemulengela kwikala na bulume kechi bwa ‘kwingilatu’ konkane, bino ne bwa ‘kuba.’ Kino kibena kulumbula’mba mupashi wazhila wa Lesa ukemutundaika kwingila bulongo mu mwingilo wa Yehoba ne kwimukwasha kukoma ku mupashi. Mu bintu byonse samuketekela bulume bwa Yehoba ne kulamawizha muchima wenu.
Kulangulukapo Bimo Byakuba
Panyuma yakuba mwafuukula kumwingijila Yehoba kyakine, mwafwainwa kulangulukapo mingilo imo yakonsha kwimukomesha bulongo ku mupashi. Mwina Kilishitu kashimbi wa jizhina ja Mana,, waambile’mba: “Bintu bimo byonalangulukilepo kuba byankwashishe bingi kashika. Mu kifulo kya kubwela kunyuma, nakomejilengakotu na kuchinchika. Sambena kulanguluka pa ino mingilo yonasajilepo kuba, nalombele na mukoyo kwi Yehoba kuba namba antangijile nkomeneko ku mupashi kwakubula bya kundabika ne.”
Bintu bimo byo mukeba kuba byafwainwa kwikala byakine kabiji byomwakonsha kuba. Kutanga kyapitala kimo mu Baibolo juba ne juba ke kintu kimo kyomwakonsha kuba. Kabiji mwakonsha ne kupesapesa bintu bimo. Kampe mwakonsha kwingijisha buku wa Kizungu wa Watch Tower Publications Index kupesapesa byubilo bya Yehoba byanembwa mu ndonda panshi ya ka mutwe ka kuba’mba “Qualities by Name” pa mutwe mukatampe waamba’mba “Jehovah.” Paji bishinka 40 byomwakonsha kulangulukapo, kwibipesa bulongo ne kuba bino kwakubula nangwa kuzhinauka ne, kwakonsha kwimufwenyesha kwi Yehoba ne kwimutundaika kumubila byavula. Mwakonsha ne kukumbulapo nangwa jimotu pa kupwila konse kwa bwina Kilishitu kukebewa kukumbulapo, yukaipotu nangwa muntu umo pa kupwila kumo kumo kwa kipwilo, ne kulomba kwi Yehoba pa juba pa juba apa bino ne kubulako bakwenu byo aji.
Umvwe mukyangye kutatula kwamba majashi mu Sukulu ya Mwingilo wa Teokalasi, kyawama bingi kutatulako lonka luno. Nanchi muya mu mwingilo wa busapwishi nyi? Umvwe kechi muyamo ne, mwakonsha kwibikako kuba’mba mwikale musapwila wabula kubatizwa. Kikwabo, ikalai balunda na Yehoba ne kwipana anweba bene. Banyike bavula beseka na ngovu kwingila mwayila kwipana kwabo pa kwikala wa mwingilo wa kimye kyonse.
Nangwa kyakuba kyawama kwibikila bikonkwanyi mu bwikalo, kyafwainwa kuchinuzhuka muchima wa kwikyombesha. Mukamona bingi lusekelo mu byomuba inge ke mubule kwiesakanya na bakwenu.—Ngalatiya 5:26; 6:4.
Kimo kimye mwilangulukila kuba’mba mwi bantutu, kafwapo kintu nangwa kimo kyalumbuluka kyomwakonsha kuba ne. Londelai luno lujimuno luji mu Baibolo lwa kuba’mba: ‘Kunyikai kutwi, muteleke byambo bya ba maana.’ (Byambo bya Mana 22:17) Lombai bansemi yenu nangwa mwina Kilishitu wakoma ku mupashi kwimukwasha. Bansemi ne bantu bakwabo bafwainwa kulangulukishapo bulongo ne kwikala bakukoseshañana mu luno lubaji. Kukanjikizha banyike ne kwibafuukwila byakuba kwakonsha kwibapwishisha lusekelo kabiji kwakonsha ne kwibalengela kukankalwa kwifuukwila byobakeba kuba abo bene. Akye kyo kyamwekejile kashimbi umo waambile’mba: “Bansemi yami bambujile kwingijila pa bintu byavula bingi, bambujile kuba’mba nafwainwa kunembesha mu Sukulu ya Mwingilo wa Teokalasi, kuyanga mu mwingilo wa mu bujimi, kubatizwa ne kwikala painiya. Kashika kyankosejile bingi kuba’mba ngube bino bintu. Naubanga inge naingijila pa kintu kimo, bansemi kechi bantakaikanga ne, po pene ne pene pobañambilanga ne kuba kintu kikwabo. Namwene kuba’mba bankanjikizhengatu kuba bino bintu. Byankokeshe bingi kyakuba kechi namwenepo ne kine kintu kyonebyubijilenga ne.” Kika kyatamine? Mingilo yonse yajingatu bulongo, bino kechi yoakebelenga kuba ne. Pa kuba’mba mwingile, mwafwainwa kutundaikwa kwimwena mingilo yomwafwainwa kuba anweba bene.
Akilangulukai Yesu Kilishitu. Kimye kyoaishile panopantanda, wayukile kine kintu Shanji, aye Yehoba kyo amukebejile kuba. Wafwainwe ne kuba kyaswa muchima wa Yehoba, kechi ke mwingilo wa byonkabyotu ne, bino ke mwingilo ye apewe kuba’mba engile. Nga Yesu wamwenenga byepi uno mwingilo? Waambile’mba: “Kajo kami ko kuba kyaswa muchima wa aye wantuma, ne kupwisha mwingilo wanji.” (Yoano 4:34) Yesu wasekejile kuba kyaswa muchima wa Yehoba ne kwingijila monka mwakebejile Shanji. Ko kajinga kajo ka kwa Yesu, watainemo lusekelo mu kupwisha mwingilo yeaketekejilwe kwingila. (Bahebelu 10:5-10) Ne anweba mwakonsha kwikala na lusekelo umvwe bansemi yenu bemutundaika kwingila bulongo mwingilo.
Kukoka mu Kuba Byawama Ne
Umvwe mubena kukeba kwingilako mwingilo umo, ibikaiko mu mwingile. Ngalatiya 6:9 waamba’mba: “Kechi tukoke mu kuba byawama ine: mambo mu kimye kyafwainwa tukanowa umvwe ne kupungila ne.” Kechi mwafwainwa kwiketekela anweba bene ne. Mambo kimye kimo mwakonsha kufikilwa na makatazho akonsha kwimulengela kukankalwa kwingila mwingilo. Bino Baibolo itulaya’mba: “Umuvulukenga [Lesa] konse konse ko uya ne aye ukakolwela mashinda obe.” (Byambo bya Mana 3:6) Yehoba ukemukwasha byo mubena kwingila mingilo yenu ya ku mupashi.
Kine, umvwe mwaikala na kizaku kya kwingijila Yehoba ne kwingila mingilo yenu ya ku mupashi yo mufuukula kuba, ‘kuya palutwe kwenu kukamweka ku bonse.’ (1 Timoti 4:15) Kabiji umvwe sa mwingijila Lesa mukekala bingi bulongo.
[Kipikichala pa peja 31]
Kutanga Baibolo ne kulangulukapo pa byomwatanga kukemutundaika kwingijila Yehoba
[Kipikichala pa peja 32]
Yesu waingijile monka mwakebejile Shanji