Kwiketekela Kwanema Bingi mu Kwikala Bwikalo bwa Lusekelo
KAJO kakozhañana munda katama bingi. Muntu uyandakana munda javula wafwainwa kuyuka kajo kamufwainwa. Bino kuleka kuja kajo kechi jo jishinda jawama ja kwizhikijilamo ku lukatazho lwa munda ne. Kuba kino kwakonsha kuletatu makatazho akwabo mu kifulo kya kwiapwisha. Kafwako muntu wakonsha kwikala mumi moba avula kwakubula kajo ne.
Popamotu ne bantu, kikola bingi ku muchima inge muntu ye baketekela wibakozha ku muchima. Umvwe bakwetu bo twaketekela saka betukozhatu ku muchima kikupu, kyafwainwa kwitukwasha kuyuka bulongo bakwetu bo twakonsha kwikala nabo. Onkao mambo, kukana kwikala na bakwenu amba bakemukozha ku muchima kechi ko kupwisha lukatazho ne. Mambo ka? Mambo kubula kuketekela bakwetu kwitulengela kubula kwikala na lusekelo. Pa kuba’mba twikale ba lusekelo mu bwikalo, kikebewa kwiketekela na bakwetu.
Buku wa Jugend 2002 waamba’mba: “Luketekelo nakyo ke kintu kimo kyanema kilengela kumvwañana bulongo na bakwetu pa juba pa juba.” Pepala wa byambo wa Neue Zürcher Zeitung washimwine amba: “Muntu yense ukeba mukwabo ye akonsha kuketekela. Luketekelo lulengela kwikala bwikalo bwawama,” kufika ku kipimo “kyanema kya lupulukilo.” Ino pepala ya byambo yatwajijila’mba, kwakubula luketekelo, “muntu wakonsha kushupikwa bingi mu bwikalo.”
Byo twayuka kuba’mba kyafwainwa kwikalapo na muntu ye waketekela, ñanyi ye twakonsha kuketekela wakonsha kubula kwitukozha ku muchima?
Ketekela mwi Yehoba na Muchima Wobe Yense
Baibolo itubula’mba: “Ketekela mwi Yehoba na muchima wobe yense.” (Byambo bya Mana 3:5) Kya kine, Byambo bya Lesa javula bitutundaika kuketekela Mulenga wetu, aye Yehoba Lesa.
Mambo ka o twafwainwa kuketekela mwi Lesa? Kintu kitanshi ke kya kuba’mba, Yehoba Lesa wazhila. Ngauzhi Isaya wanembele’mba: “Wazhila, wazhila, wazhila, Yehoba.” (Isaya 6:3) Nanchi byo mwayuka kuba’mba aye wazhila kechi mukebulwa ne nyi? Kino kyafwainwa kwimukebula mambo buzhile bwa Yehoba bulumbulula kuba’mba waoloka, kechi uba bilubo ne, kabiji wafwainwa kuketekelwa na muchima yense. Kechi witongola atweba nangwa kwitukozha ku muchima ne, kabiji kechi ukeba konauna luketekelo lwetu ne.
Kabiji twakonsha kuketekela mwi Lesa mambo uji na bulume kabiji ukeba kukwasha boba bamwingijila. Kyakumwenako, ngovu yanji imulengela kuba bintu. Bololoke bwanji bwalumbuluka ne maana bimukwasha mu ñiñijilo yanji. Ne butemwe bwanji bukatampe bumulengela kwingila bintu. Mutumwa Yoano wanembele’mba: “Lesa ye butemwe.” (1 Yoano 4:8) Butemwe bwa Lesa bumweka mu kyonse kyo oba. Buzhile bwa Yehoba ne byubilo byanji bikwabo byamulengela kwikala Shetu wawama, ye twakonsha kuketekela na muchima yense. Kafwako kintu nangwa muntu wafwainwa kuketekelwa kukila Yehoba ne.
Ketekelai mwi Yehoba ne Kwikala na Lusekelo
Kishinka kikwabo kyanema kya kuketekela mwi Yehoba ke na mambo akuba wituyuka bulongo kukila muntu uji yense. Wayuka kuba’mba muntu yense ukeba bulunda bwa kine, bwa kikupu, kabiji bwaketekelwa na Mulenga. Aba baji na bulunda bwa uno mutundu bakasuluka bingi. Mfumu Davida waambile’mba: “Ye mwine wa lusekelo awa waketekela mwi Yehoba.” (Masalamo 40:4) Bantu bavula ano moba betabizha byambo byaambile Davida.
Monai bakumwenako bamo. Doris waikelepo mu Dominican Republic, mu Germany, mu Greece, ne mu United States waamba’mba: “Nji bingi na lusekelo byo naketekela mwi Yehoba. Wayuka bya kunsunga ku mubiji, ku mupashi, ne mu milanguluko. Ye mulunda wawamisha muntu ye afwainwa kwikala nanji.” Wolfgang, kiloolo ufundañana mu bya mizhilo, walumbulula’mba: “Kyawama bingi kuketekela muntu wa kuta muchima, muntu wakonsha kabiji uba bintu byawama kwi obewa.” Ham, wasemekejilwe ku Asia luno wikala mu Europe waamba’mba: “Naketekela namba Yehoba ye ulama bintu byonse, kabiji kechi uba bilubo ne, onkao mambo nji na lusekelo bingi kukinka manungo mwi aye.”
Pano bino, atweba bonse pa muntu pa muntu kechi twafwainwa kuketekelatu Mulenga wetu yenka ne, bino twafwainwa ne kuketekela bantu bakwetu. Onkao mambo, Yehoba mulunda netu wa maana kabiji wayuka bintu, witubulako kuyuka bantu bo twafwainwa kuketekela. Mu Baibolo mo motwakonsha kutana byambo byanji bya kwitubulako kuyuka bantu bo twafwainwa kuketekela.
Bantu bo Twakonsha Kuketekela
Nyimbi wa masalamo wanembele’mba: ‘Kechi muketekele mu baana ba bamfumu ne, nangwa mu mwana wa muntutu, mwabula bukwasho ne.’ (Masalamo 146:3) Abye byambo byanembeshiwa na mupashi wazhila bitukwasha kuyuka kuba’mba kechi bantu bonse bafwainwa kuketekelwa ne. Nangwatu ‘baana ba bamfumu,’ bantu ba ino ntanda banemekwa, nabiji bantu bafunda, nangwa bayukapo mingilo imo kechi twafwainwa kwibaketekelatu mambo a byo baji ne. Javula maana abo atwala bantu mungi kabiji luketekelo mu ‘baana ba bamfumu’ ba uno mutundu kechi lukulaila ne.
Nangwa byonkabyo, kino kechi kyafwainwa kwitulengela kulanguluka’mba nanchi bantutu bonse kechi bafwainwa kuketekelwa ne. Bino, twafwainwa kujimuka pa kusala bantu bo twafwainwa kuketekela. Jishinda ka jo twakonsha kuyukilamo bantu bo twafwainwa kuketekela? Kyakumwenako kya mukoka wakala wa bene Isalela kyakonsha kwitukwasha. Kimye byo kyafikile kya kuba’mba batongole bantu bakwikala bakulumpe mu bena Isalela, Mosesa bamubujile amba: “Salululai mu bantu bonse banabalume ba munkonsha, bonka baakamwa Lesa, bantu ba kishinka bashikwa mazhikakanwa.” (Kulupuka 18:21) Twakonsha kufunjilako ka ku kino?
Banabalume batongwelwe bajinga bantu bamwesheshe byubilo bya Lesa saka bakyangye kutongolwa kwingila mingilo yafwainwa kwingila bantu baketekelwa. Bamwesheshe jimo kuba’mba baakaminwe Lesa; bajinga na moyo wa kine wa kunemeka Mulenga kabiji bachinanga kumufichisha ku muchima. Kyamwekeshetu patoka ku bantu bonse kuba’mba abe banabalume bebikilengako bingi kulama mafunde a Lesa. Bashikilwe mazhikakanwa, kabiji kino kimwesha kuba’mba nanchi bajinga na byubilo byawama bibakanyishenga kuba bintu byatama mambo a kuba’mba bo bakulumpe. Kechi bajinga bantu bakonsheshe kwingijisha luketekelo lwabo mu jishinda jabula kufwainwa na kukebelamo bintu byabo nangwa bya balongo babo nangwa balunda nabo ne.
Nanchi ne atweba kuba twaingijisha jije jishinda kusajilamo bo twakonsha kuketekela ne nyi? Abya twayukapo bantu baji na byubilo bimwesha kuba’mba bakamwa Lesa nyi? Nanchi bamweka kuba’mba bakonsha kutwajijila kulama mafunde anji a byubilo byawama nyi? Nanchi baji na bulumbuluke bwa kuchinuzhuka kuba bintu byatama nyi? Abya bakishinka kya kuba kechi bakonsha ke bobe bintu monka mo bakebela abo bene ne nyi? Kwakubula nangwa kuzhinaukatu ne, banabalume ne banabakazhi baji na bino byubilo bo botwafwainwa kuketekela.
Kange Mulefulwe na Mambo a Kwimukozha ku Muchima Jimo Jimo Ne
Twafwainwa kutekanya pa kusala muntu ye twakonsha kuketekela, mambo papita kimye kuba’mba muntu aketekelwe. Kyawama ke kutendeka kuketekela muntu pachepache. Mu ñanyi jishinda? Twafwainwa kuba saka tubena kumona byubilo bya muntu mu kupita kwa kimye, ne kumona byo oba mu bintu bimo. Nanchi awo muntu wa kishinka mu tubintu tucheche nyi? Kyakumwenako, inge bamwashima kintu nanchi wikibwezha mu juba jonka jo alaile kubwezha nyi, kabiji awo muntu umvwe walayañana na mukwabo kuba kintu kimo, abya wikyuba pa kyonkakyo kimye kyo balayañene nyi? Umvwe twamona kuba’mba awo muntu byo byo aji, twakonsha kulanguluka kumuketekela ne mu bintu byavula. Akye kyayila mu jifunde jaamba’mba: “Awa waikala wa kishinka mu tucheche ye waikala wa kishinka ne mu byavula.” (Luka 16:10) Kuyuka bya kusala ne kwikala batekanya kwakonsha kwitukwasha kuchinuzhuka kwitukozha ku muchima.
Ibyepi, inge muntu witukozha ku muchima? Bafunda Baibolo bakonsha kuvuluka kuba’mba bufuku bwa juba jo bamukwachile Yesu Kilishitu, batumwa banji bamusankijilepo. Yudasa Isakaliota wamusolwe, bakwabo nabo baubile moyo ne kunyema. Petelo aye wamukaine Yesu jisatu. Bino Yesu wamwene kuba’mba Yudasa ye yenka waubijilemotu kya nshiji. Yesu byo bamusankijilepo pa kyokya kimye kyakatezhe kechi kyamulengejile kubula kuketekela jibiji batumwa 11, mu milungu yalondejilepo ne. (Mateo 26:45-47, 56, 69-75; 28:16-20) Byonkabyo, umvwe muntu ye twaketekela witukozha ku muchima, kyawama kulangulukishapo bulongo ne kukeba kuyuka kana wamwesha muchima wa kubula kuketekelwa nyi, inyi kana akyo kintu wikyubatu na mambo a bukoke bwa mubiji.
Nanchi Amiwa ne Muntu wa Kishinka Nyi?
Muntu usala ye akonsha kuketekela wafwainwa kwishikisha mwine amba: ‘Nanchi amiwa ne muntu wa kishinka nyi? Ñanyi bukishinka bonji nabo amiwa mwine kwesakana na byo mbena kukeba kuketekela bakwetu?’
Kine muntu wa kishinka javula wamba bya bukine. (Efisesa 4:25) Kechi wamba na mulambisha ku bantu boabena kwisamba nabo kuba’mba amwenemo byanji mwine ne. Kabiji umvwe walayañana na muntu weseka na ngovu yonse kufikizha kyo kyo kintu. (Mateo 5:37) Umvwe muntu wamusolomoka na lukatazho, ulamatu byobyo bintu mu nkama kabiji kechi wibilolobwela ku bangi ne. Muntu waketekelwa wikala wa kishinka ku mukwabo wa mu masongola. Kechi utamba bipikichala bya mulekese ne, kechi uba bintu bibindankanya muchima ne, kabiji kechi uba kusengula kubi ne. (Mateo 5:27, 28) Muntu waketekelwa wingila na ngovu kwimwena mwine ne kisemi kyanji bintu bya mu bwikalo kabiji kechi uba bintu mu kujimukila bakwabo kuba’mba amwenemo mali bukiji bukiji ne. (1 Timoti 5:8) Kulabijila ano mafunde a mu Binembelo kuketukwasha kuyuka bantu bo twakonsha kuketekela. Kabiji, kulamachila ku onka ano mafunde a byubilo byawama kuketukwasha atweba bonse pa muntu pa muntu kuketekelwa ku bakwetu.
Lukekala lusekelo lwa kine kwikala mu ntanda mukekalatu bantu bakishinka mukabula bya kwikozha ku muchima! Nanchi jino jishimikilatu nyi? Bantu baketekela milaye ya mu Baibolo kechi balanguluka’mba jino jishimikilatu ne, mambo Byambo bya Lesa byalaya “ntanda ipya” yawama mukabula bujimbijimbi, bubela, kuja bya lunkanankana, kabiji mukabula bya bulanda, misongo ne lufu! (2 Petelo 3:13; Masalamo 37:11, 29; Lumwekesho 21:3-5) Nanchi kechi kyawamisha kukeba kuyuka byavula pa mambo a kimye kya kulutwe ne nyi? Bakamonyi ba kwa Yehoba bakatemwa kwimukwasha kuyuka byambo byavula ne mitwe ikwabotu yanema.
[Kipikichala pa peja 4]
Kubula kuketekela bantu kwakonsha kwitulengela kubula kwikala na lusekelo
[Kipikichala pa peja 5]
Yehoba ye wafwainwa kuketekelwa kukilamo
[Bipikichala pa peja 7]
Atweba bonse twafwainwa kwikala na bulunda bwaimena pa kwiketekela