Bantu Kechi Babena Kunemeka Bakwabo ne

“Byonse byaubiwenga mu kampu byamwesheshenga amba bantu kechi banemekwa ne.”—MAGDALENA KUSSEROW REUTER, KIPULUKA WA MU KALEYA KA BA NAZI.

MALWA ajinga mu kaleya ka ba Nazi kimye kya Nkondo ya kibiji ya Ntanda yonse kechi yo yajinga ntendekelo nangwa mpelo ya kumanyika bantu ne. Umvwe twamona byaubiwenga kunyuma ne bibena kubiwa ano moba, kibena kumwekatu patoka amba: “Bantu babena kumanama bingi kabiji kechi banemekwa ne.”

Kubula kunemeka bantu kechi byo byonkatu bibena kubiwa mu bwikalo bwa bantu ne. Kubula kunemeka bantu kubena kubiwa ne mu mashindatu akwabo a bujimuku. Akilangulukai pa mwana yebendatu na kwendeleka mambo a mwekelo yanji. Nangwa muntu wikala mu kyalo kingi yebendeleka na mambo a kumwesha bisho “bingi.” Nangwa kumanama na mambo a misalululo. Aba bendeleka bakwabo bakonsha kulanguluka amba babena kusekatu, pano bino aba bo babena kwendeleka kibakola bingi ku muchima.—Byambo bya Mana 26:18, 19.

Kunemeka Bantu ko ku Ka?

Buku uno walumbulula munema amba ke ‘kyubilo kya kwiumvwa wafwainwa, wanemekwa nangwa kushingikwa.’ Onkao mambo, mu kunemeka bantu mwavwangwa byo twimona atwe bene kabiji ne bakwetu byo boba ne atweba. Nangwa kya kuba kimye kimo atwe bene twakonsha kwiumvwa babula kunema, pano bino bakwetu byo betumona ne byo boba kwi atweba kyo kyakilapo kunema mu bwikalo bwa juba ne juba.

Mu mapunzha onsetu muji bantu bayanji ne babula wa kwibalamwinako. Nangwa kya kuba bwikalo bwa muntu bwakonsha kwikala bino, kechi kilumbulula’mba wafwainwa kubula kunemekwa ne. Bintu byuba bakwabo byo byakonsha kulengela muntu kwiumvwa amba kechi wanemekwa ne. Kya bulandatu ke kya kuba’mba, bantu bayanda javula bo babula kunemekwa. Javula tumvwa byambo byamwenga nabiji amba “kileya,” “kideñenya,” ne “kinangwa” bya kunena bakote, bayanji, nangwa aba balemana.

Mambo ka bantu kyo bamanyikila bakwabo bantu? Abya kine bantu bakanemekwapo nyi? Mutwe walondelapo wakumbula bulongo kufuma mu Baibolo, Mambo a Lesa.