Ene Mambo o Twafwainwa Kumuyukila Antikilishitu

Kala kene mutumwa wanembele’mba: “Mwaumvwine’mba, antikilishitu wiya.” (1 Yoano 2:18) Bino byambo byo bilengesha moyo! Myaka yavula yapitapo, bantu baeseka kuyuka mwatala bino byambo. Nanchi antikilishitu ye ñanyi? Ukeya kimye ka? Ki ka kyo akoba umvwe waiya?

KUJI bantu bavula bingi bo batela’mba baantikilishitu. Kala aba bo batelanga’mba “baantikilishitu” bajinga Bayudea, Bakatolika, ne bamfumu ba bena Loma. Kya kumwenako, Mfumu Frederick II (1194-1250) byo akaine kwivwanga mu nkondo ya kuzhikijila chechi, Pope Gregory IX wamutelele amba antikilishitu ne kumupanga mu chechi. Kabiji Innocent IV waishile kupingakena pe Gregory naye waishile kumupanga mu chechi. Bino Frederick naye watelele uno Innocent amba antikilishitu.

Mutumwa Yoano ye yenkatu nembi wa Baibolo waingijisha kyambo kya “antikilishitu.” Mu mabuku abiji atelwa pa jizhina janji, kino kyambo kitanwamo jitanu, pamo kyanembwa kulumbulula muntu umo pakwabo napo bavula. Byepelo muji bino byambo byanembwa mu kabokoshi kaji pa peja yalondelapo. Mu bino byepelo, antikilishitu ke muntu wa bubela, kabiji mujimbijimbi, ukeba konauna bulunda bwa muntu na Kilishitu ne Lesa. Mutumwa watundaikile bena Kilishitu bakwabo amba: “Anweba batemwe, kechi mwitabe mipashi yonse ne, nanchi esekai mipashi kana yo ya kwa Lesa; mambo bangauzhi ba bubela bavula bapalañena panopantanda.”—1 Yoano 4:1.

Kabiji Yesu naye wajimunañene ku bantu babujimbijimbi, nangwa’mba bangauzhi ba bubela, amba: ‘Beya ko muji na biseba bya mikooko, kabiji munda mwabo bo bamisuka bakaji. Mukebayukila ku bipangwa byabo.’ (Mateo 7:15, 16) Nanchi Yesu wajimwinenga baana banji ba bwanga kuchinuzhuka antikilishitu wa kifwanyikizho nyi? Twayai tumone byo twakonsha kumuyuka uno mujimbijimbi.