Lufunjisho lwa Lesa Lwakila mu Kunema
‘Nebitela bintu byonse ke byatu na mambo a kuwama kwine kwa maana a kuyuka Kilishitu Yesu.’—FILI. 3:8.
1, 2. Bena Kilishitu bamo bafuukulapo ka, kabiji mambo ka?
KUFUMATU ku bwanyike bwanji, Robert wajinga bingi na maana pa sukulu. Byo afikizhe myaka ya kusemwa itanu na isatu, mufunjishi wanji waishile ku nzubo ko aikalanga ne kumwambila kuba’mba wakonsha kuba kyonse kyo akeba. Wajinga na luketekelo lwa kuba’mba juba jimo Robert ukekala dokotala. Kufunda kwanji kufika palepa kwakonsheshe kumulengela kuya ku masukulu akatampe ajinga mu kyalo mo aikalanga. Bino Robert wafuukwilepo kubula kuba kintu bantu bavula kyo bamonanga kwikala kyakilamo kunema pa kuba’mba afikizhe kikonkwanyi kyanji kya kwikala painiya wa kimye kyonse.
2 Byonka byajinga Robert, ne bena Kilishitu bavula, ko kuba’mba banyike ne bakulumpe baji na mashuko a kuyilako palutwe mu buno bwikalo bujipo. Bamo bafuukulapo kubula kwingijisha ano mashuko, pa kuba’mba bafikizhe bikonkwanyi bya ku mupashi. (1 Ko. 7:29-31) Ki ka kitundaika bena Kilishitu na biji Robert kwingila mwingilo wa kusapwila? Bengila na ngovu kusapwila mambo awama mambo bamutemwa bingi Yehoba, kabiji bayuka buneme bwa kwibafunjisha kwi aye. Nanchi mwakilangulukapo kala byo mwakonsheshe kwikala umvwe kechi mwayukile bukine nenyi? Kulanguluka pa mapesho amo awama o twiyowa na mambo a kwitufunjisha kwi Yehoba kuketukwasha kusanchila mambo awama ne kwikala na kizaku kya kubulako bantu.
Jishuko Jikatampe ja Kwitufunjisha kwi Lesa
3. Mambo ka o twafwainwa kusumininwa kuba’mba Yehoba wipana kufunjisha bantu bambulwa kulumbuluka?
3 Na mambo a buwame bwanji, Yehoba wipana kufunjisha bantu bambulwa kulumbuluka. Bungauzhi bwa mu Isaya 54:13 bwaamba pa bena Kilishitu bashingwa na mupashi amba: ‘Baana bobe bonse bakebafunjisha kwi amiwa Yehoba; kabiji bakekala na mutende wa kine kine.’ Bino byambo bingila ne ku ‘mikooko ikwabo’ ya kwa Kilishitu. (Yoa. 10:16) Kino kishinka kyamwekana kwesakana na bungauzhi bubena kufika mu moba etu. Isaya wamwene mu kimwesho bantu saka bafuma mu mikoka yonse ya bantu ne kwiya ku mpopwelo ya kine. Wibalumbulwile saka beambila bene na bene amba: “Twayai, tuye ku mutumba wa Yehoba, ku nzubo ya Lesa wa Yakoba; namba aketufunjishe mwa kwendela, twendenga mu mashinda anji.” (Isa. 2:1-3) Byo jaikalapo jishuko jikatampe kwitufunjisha kwi Lesa!
4. Yehoba ukeba ka ku boba bo afunjisha?
4 Twafwainwa kuba ka pa kuba’mba tutambwile lufunjisho lwa Yehoba? Kintu kyakilamo kunema ke kwikala bakimote ne kuswa kufunda. Nyimbi wa masalamo Davida wanembele’mba: “Yehoba ye wawama, ye waoloka. . . . Bakimote ukebafunjisha jishinda janji.” (Sala. 25:8, 9) Kabiji Yesu waambile’mba: ‘Tata, Mwine wa mwiulu ne panshi, nemupopwela byo mwafile bino ku bajimuka ne ba maana, kabiji mwibisolola ku twana twa lukeke.’ (Luka 10:21) Nanchi kechi mwiumvwa kufwenya kwipi ne Lesa “upana bupe ku bepelula” nenyi?—1 Pe. 5:5.
5. Ki ka kyalengejile kuba’mba tumuyuke Lesa?
5 Byo tuji bakalume ba kwa Yehoba, nanchi twakonsha kwinemeka atweba bene byo twayuka maana a kutana bukine nyi? Ine. Kya kine, pa bunke bwetu, kechi twakonsha kumuyuka Lesa ne. Yesu waambile’mba: “Kafwako wakonsha kwiya kwi amiwa ne, poso abo Batata bantuma bamukoka.” (Yoa. 6:44) Kupichila mu mwingilo wa busapwishi ne mupashi wazhila, Yehoba ubena kukoka bantu bapasha mikooko ne “bya buneme byabo [ba mu mikoka yonse].” (Hagai 2:7) Nanchi kechi mwi balusekelo pa kwikala pa boba Yehoba bo akokela ku Mwananji nenyi?—Tangai Yelemiya 9:23, 24.
Bulume bwa Kupimpula Bantu
6. ‘Maana a kumuyuka Yehoba’ alengela bantu kwikala byepi?
6 Bungauzhi bwa kwa Isaya bwaingijisha byambo byawama byaamba pa bantu byo babena kupimpula byubilo byabo mu ano moba etu. Bantu bajinga bambanzhi pano baikala ke ba mutende. (Tangai Isaya 11:6-9.) Aba bajinga balwanyi na mambo a kupusana kwa bikoba, mutundu, mulaka, nangwa nkomeno yapusana pusana bafunda kwikala bakwatankana. Kiji nobe ‘babunda mapoko abo ne kwialula ke bya kujimako.’ (Isa. 2:4) Ki ka kyalengela kuba’mba luno lupimpu lwikaleko? Bantu bafunda ‘maana a kumuyuka Yehoba’ kabiji babena kwiengijisha mu bwikalo bwabo. Nangwa kya kuba bakalume ba Lesa bambulwa kulumbuluka, baikala ke banabankazhi ba kine ba ntanda yonse. Mambo awama abena kusapwilwa ntanda yonse ne kipangwa kyawama kyafumamo byamwesha buneme bwa lufunjisho lwa Lesa.—Mat. 11:19.
7, 8. Lufunjisho lwa Lesa lwakasulula bantu ku ñanyi “masakwa akosa” amo? (b) Ki ka kimwesha kuba’mba lufunjisho lwa Lesa luleta lutotelo kwi Yehoba?
7 Mutumwa Paulo waesakenye mwingilo wa bakalume ba Lesa ku nkondo ya ku mupashi. Wanembele’mba: ‘Byela bya bulwi bwetu kechi byo bya buntunshi ne, nanchi byo bya bulume bukatampe bufuma kwi Lesa bwa kukundula masakwa akosa. Mambo tukundula milanguluko ingi, ne byonse byalepa byaimikwa mu kukanya maana a Lesa.’ (2 Ko. 10:4, 5) Lufunjisho lwa Lesa lwakasulula bantu ku ñanyi “masakwa akosa” amo? Bya kumwenako bimo bicheche ke bisendwa bya mafunjisho a bubela, bingelekezha ne butemwamaana bwa bantu. (Kolo. 2:8) Lufunjisho lwa Lesa lukwasha bantu kushinda byubilo byatama ne kwikala na bipangwa bitokesha Lesa ku muchima. (1 Ko. 6:9-11) Luwamishako bwikalo bwa kisemi. Kabiji lulengela boba babula luketekelo kwikala na nkebelo ya kine mu bwikalo. Luno lo lufunjisho lwafwainwa lelo jino.
8 Kyubilo kimo Yehoba kyo akwasha bantu kwikala nakyo ke bukishinka, byonka byaamba kya kumwenako kyalondelapo. (Hebe. 13:18) Mwanamukazhi umo ku India waswile lufunjisho lwa Baibolo kabiji mu kuya kwa kimye waikele musapwishi wabula kubatizwa. Juba jimo byo abwelelenga ku nzubo kufuma ku nkito ya buntungi bwa Nzubo ya Bufumu, wataine munyololo wa ngolode panshi wafwainwe kupotwa na mali afika ku madola 800 a kina America ku bwipi na kilata kya masakya. Nangwa kya kuba wajinga muyanji, watwajile yewa munyololo ku ofweshi wa bakapokola kuba’mba bakebe mwine mwinaye. Kapokola wakuminye bingi! Palutwe kacheche, kapokola mukwabo wamwipwizhe’mba, “Wabwezhezha ka munyololo?” Mwanamukazhi walondolwele’mba, “mafunjisho a mu Baibolo o andengela kupimpula byubilo byami ne kwikala muntu wakishinka.” Kapokola byo atemenwe, waambijile mukulumpe mu kipwilo washinjikinyeko yewa nyenga amba “Mu uno muzhi muji bantu kukila pa 38 milyonyi. Umvwe mwakwasha bantu jikumi kwikala nobe uno mwanamukazhi, kyakonsha kuwama bingi.” Umvwe twamona bantu bavula bapimpula bwikalo bwabo pa mambo a lufunjisho lwa Lesa, nanchi kechi kitulengela kwikala na bishinka byavula byakonsha kwitulengela kumutotanga Yehoba nenyi?
9. Kyakonsheka byepi bantu kupimpula bwikalo bwabo?
9 Bulume bwa Mambo a Lesa bwa kupimpula bantu, pamo ne bukwasho bo apana Yehoba kupichila mu mupashi wanji wazhila, bilengela bantu kupimpula bwikalo bwabo. (Loma 12:2; Nga. 5:22, 23) Kolose 3:10 waamba’mba: ‘Vwalai bumuntu bupya, bo bubenakusangulwa ke bupya mu kumona maana monka mwayila kipasha kya yewa wibulengele.’ Byambo bitanwa mu Mambo a Lesa, Baibolo, biji na bulume bwa kusolola biji mu muchima wa muntu, kabiji byakonsha kupimpula milanguluko ya muntu ne byo amona bintu. (Tangai Bahebelu 4:12.) Kupichila mu kwikala na maana alumbuluka a kuyuka Binembelo kabiji ne kulondela mizhilo ya Yehoba yaoloka, muntu wakonsha kwikala mulunda na Lesa, ne kwikala na luketekelo lwa kwikala myaka ne myaka.
Lunengezho lwa Kulutwe
10. (a) Mambo ka o kyaikela kuba’mba Yehoba bunke bwanji ye wakonsha kwitukwasha kunengezha bwikalo bwetu bwa kulutwe? (b) Lupimpu ka lukobiwa katataka panopantanda ponse?
10 Yehoba ye yenka wakonsha kwitukwasha kunengezha bwikalo bwetu bwa kulutwe mambo wayuka byakonsha kwitumwekela kulutwe. Wayuka bwikalo bwa bantu byo bukekala kulutwe. (Isa. 46:9, 10) Bungauzhi bwa mu Baibolo bumwesha kuba’mba, “juba jikatampe ja Yehoba jijitu pepi.” (Zefwa. 1:14) Pa mambo a joja juba, Byambo bya mana 11:4 bikekala bya kine kuba’mba: “Bya bunonshi kechi bikwasha muntu mu juba ja bukaji ne; pa kuba bololoke bupokolola muntu ku lufu.” Umvwe kimye kyafika kya buchibamambo bwa Yehoba kya konauna ntanda ya kwa Satana, kintu kikanema ke bulunda bwetu ne Lesa. Mali akekala ke atutu. Mambo ne Ezikyo 7:19 waamba’mba: “Bakatayanga siliva wabo mu mikwakwa, ne ngolode yabo ikekala kwi abo nobe kintu kya bunya.” Kuyukila jimo bino bintu kwakonsha kwitukwasha kuba bintu na maana.
11. Mu ñanyi jishinda jimo lufunjisho lwa Lesa mo lwitukwashisha kwinengezha pa bwikalo bwa kulutwe?
11 Jishinda jimo lufunjisho lwa Lesa mo lwitunengezhezha ku juba jibena kwiya ja Yehoba ke kupichila mu kwitukwasha kwibikila bikonkwanyi byawama. Mutumwa Paulo wanembejile Timoti amba: “Wibakambizhe banonshi ba panopantanda amba, kechi bekale na muchima wa kwitumbijika ne, nangwa kuketekela bunonshi bwa kubulwa ne mwa kwibuketekejila ne, kana mwi Lesa.” Nangwa kya kuba kechi tuji na mali avula ne, twakonsha kumwenamo mu luno lujimuno lufuma kwi Yehoba. Kino kyavwangamo ka? Mu kifulo kya kukebeshanga kwikala na bintu bya ku mubiji byavula, twafwainwa kwibikangako ‘kuba byawama’ kabiji “ne kwikala banonshi ba mu mingilo yawama.” Kupichila mu kutangizhako bintu bya ku mupashi mu bwikalo bwetu, ‘twitujila jimo kitendekesho kyawama kya myaka ikeya.’ (1 Timo. 6:17-19) Buno bwikalo bwa kwipana bumwesha maana alumbuluka, byonka byo aambile Yesu amba: “Ukajilamo ka muntu nangwa ukanonka ntanda yonse umvwe wataya mweo wanji?” (Mat. 16:26, 27) Na mambo a juba ja Yehoba jibena kufwenya pepi, atweba bonse twafwainwa kwiipuzha’mba: ‘Kwepi ko mbena kwibikila nsabo? Nanchi mbena kwingijila Lesa nyi, inyi nsabo?’—Mat. 6:19, 20, 24.
12. Mambo ka o twafwainwa kubula kulefulwa umvwe bamo balengulula mwingilo wetu?
12 Kyakilamo kunema pa “mingilo yawama” yatongolwa mu Mambo a Lesa ku bena Kilishitu ke mwingilo wa kupulusha bantu wa kusapwila pa mambo a Bufumu ne kulenga baana ba bwanga. (Mat. 24:14; 28:19, 20) Byonka byo kyajinga mu myaka kitota kitanshi, bamo bakonsha kulengulula mwingilo wetu. (Tangai 1 Kolinda 1:18-21.) Pano kino kechi kipimpula buneme bwa mwingilo wetu ne, kabiji kechi kipwisha buneme bwa kupa muntu yense jishuko ja kwitabila mambo awama saka kukiji kimye ne. (Loma 10:13, 14) Byo tukwasha bakwetu kumwenamo mu lufunjisho lwa Lesa, tukatambwila mapesho avula.
Yehoba Upesha Bantu Banji Bepana
13. Kwipana ka mutumwa Paulo ko aubile pa mambo a mambo awama?
13 Saka akyangye kwikala mwina Kilishitu, mutumwa Paulo bamufunjishe byo akonsheshe kuba mu bwikalo bwa Bayudea. Byo afikizhe myaka ya kusemwa nobe 13, wafumine mu muzhi mo asemekejilwe wa Talasusa ne kuya ku Yelusalema na kufunda kwi Ngamaliela wajinga mufunjishi wa Mizhilo wanemekelwe bingi. (Byu. 22:3) Mu kuya kwa kimye, Paulo watendekele kuyukanyikwa ku bantu ba mu yoya myaka, kabiji umvwe waji watwajijile na luno lufunjisho, inge watumbalele bingi mu Bayudea. (Nga. 1:13, 14) Byo atambwijile mambo awama ne kutendeka mwingilo wa kusapwila, walekele bino byonse. Nanchi Paulo wilangulwishe pa byo afuukwilepo nyi? Ine. Wanembele’mba: ‘Nebitela bintu byonse ke byatu na mambo a kuwama kwine kwa maana a kuyuka Kilishitu Yesu Nkambo yami: ye ye nabujilwamo bintu byonse, ne kwibitela namba, binchatu.’—Fili. 3:8.
14, 15. Twikala na ñanyi mapesho byo tuji “ba mu mwingilo umo ne Lesa”?
14 Byonka byajinga Paulo, bena Kilishitu lelo jino nabo bepana na mambo a mambo awama. (Mako 10:29, 30) Nanchi twilangulusha na mambo a kuba bino nyi? Byonka biji bantu bavula, Robert watongolwa kuntatwilo naye waambile’mba: “Kechi nelangulushapo nangwa jimotu ne. Mwingilo wa kimye kyonse undetela bingi lusekelo, kabiji wandengela ‘kumutompa, ne kumona byo awama aye Yehoba.’ Umvwe nabula kuta muchima ku bintu bya ku mubiji, pano bino nafikizha bikonkwanyi bya ku mupashi, Yehoba kimye kyonse umfweta kukila ne pa byonasha. Kikalatu nobe kechi nashapo ne bintu ne. Mwenamo byavula.”—Sala. 34:8; Mana. 10:22.
15 Umvwe ne anweba mwaingila mwingilo wa kusapwila ne kufunjisha pa kimye kyabaya, kwa kubula nangwa kuzhinaukatu ne, mwaikala na jishuko ja kumutompa ne kumona kuba’mba Yehoba wawama. Nanchi kwajingapo bimye bimo byo mwamwene bukwasho bwa mupashi wanji kimye kyo mwaambilenga pa mambo awama nyi? Abya mwakimonapo kala bantu bakwabo saka basangalala Yehoba byo ashinkwile michima yabo kuba’mba bate muchima ku mambo awama nyi? (Byu. 16:14) Nanchi Yehoba wimukwasha kushinda mikiika, kampe ne kwimushinkwila jishinda ja kubaishako mwingilo wenu nyi? Nanchi wimukwasha mu bimye bya malwa, ne kwimulengela kutwajijila na kumwingijila byo mwaumvwinenga kukoka nyi? (Fili. 4:13) Byo tumona bukwasho bwa Yehoba pa muntu pa muntu kimye kyo tuji mu mwingilo, wikala ke wa kine kine kwi atweba kabiji tufwenya kwipi ne aye. (Isa. 41:10) Nanchi kechi jishuko kwikala “ba mu mwingilo umo ne Lesa” mu mwingilo mukatampe wa lufunjisho lwa Lesa nenyi?—1 Ko. 3:9.
16. Mwiumvwa byepi pa mambo a mukoyo ne kwipana kwenu ku lufunjisho lwa Lesa?
16 Bantu bavula baketekela kuba bintu bya myaka mu bumi bwabo. Twamona kuba’mba nangwatu bintu bikatampe byuba bantu mu ino ntanda kechi babanda kwibilubamo ne. Nangwa byonkabyo, mu ano moba etu a lelo mingilo ibena kwingila bantu ba Yehoba ya kuzhijika jizhina janji ikekala kikupu. Ino mingilo bakeivulukanga kikupu. (Mana. 10:7; Hebe. 6:10) Twayai tunemeke jishuko jetu ja kwingilako mwingilo wa lufunjisho lwa Lesa.
Musakukumbula’mba Ka?
• Yehoba ukeba ka ku boba bo afunjisha?
• Lufunjisho lwa Lesa lupimpula byepi bwikalo bwa bantu?
• Betupesha mu ñanyi mashinda pa mambo a kukwasha bantu kumwenamo mu lufunjisho lwa Lesa?
[Kipikichala pa peja 23]
Aba bo bafunjisha kwi Yehoba bekala banabankazhi ba kine ba ntanda yonse
[Kipikichala pa peja 24]
Nanchi kechi jishuko kwikala “ba mu mwingilo umo ne Lesa” nenyi?