Lufunjisho Lulengela Kumona Bumi bwa Myaka
1 Byo kisangajikapo pa kumona meso a bantu saka alaba na mambo a kumvwisha bukine bwa Mambo a Lesa! Kufunjisha bantu maana a Lesa ne nkebelo yanji ku bantu kine kusangajika bingi. Lufunjisho lwa uno mutundu lulengela muntu kumona bumi bwa myaka ne myaka.—Yoa. 17:3.
2 Ene Mambo o Lwanemena: Ano moba lufunjisho lubena kufunjishiwa mu mashinda apusana pusana kabiji ne pa mitwe ya kukankalwa kubala. (Sapwi. 12:12) Bino ano maana konsha anema kwesakana pamo na “mingilo ikatampe ya Lesa” ne. (Byubilo 2:11) Abya lufunjisho lufunjisha ino ntanda lwalengela bantu kufwenya kwi Mulenga ne kuyuka nkebelo yanji nyi? Abya lwakwasha bantu kumvwisha kyubiwa umvwe twafwa nangwa ene mambo o kwaikela makatazho avula nyi? Abya lwalengela bantu kwikala na luketekelo nyi? Nanchi lwakwasha bantu kwikala na bisemi byawama nyi? Ine. Kanatu lufunjisho lupana Lesa lo lwakonsha kupana mikumbu yawaina ku mepuzho etu anema a mu bwikalo bwetu.
3 Lufunjisho lupana Lesa lufunjisha bintu byakankalwa ino ntanda—nabiji byubilo byawama. Mambo a Lesa afumyamo kikupu misalululo ya bikoba, milaka ne byalo mu michima ya boba bafunda ne kwingijisha bintu byo afunjisha. (Hebe. 4:12) Lwakwasha bantu kusankilapo byubilo byonse bya bukapondo ne ‘kuvwala bu muntu bupya.’ (Kolo.3:9-11; Mika 4:1-3) Kabiji lufunjisho lwa Lesa lwalengela bantu bavula kushinda mikika ne bintu byabula kufwainwa bibula kusekesha Lesa pa muchima.—1 Ko. 6:9-11.
4 Ene Mambo o Lubena Kukebewa Lonka Luno: Mufunjishi wetu Mukatampe witujimunako pa kimye kyo tubena kwikalamo. Bungauzhi bwanji bwa buchibamambo mwavwangiwa byambo bingila luno byafwainwa kusapwilwa ntanda yonse. (Lum. 14:6, 7) Kilishitu ubena kutangijila mwiulu, bufumu bwa ntanda yonse bwa bupopweshi bwa bubela katatakatu bakebwangatepo, kabiji Bufumu bwa Lesa bwinengezha konauna makafulumende onse a panopantanda. (Da. 2:44; Lum. 11:15; 17:16) Onkao mambo, kyanema bingi bantu lonka luno kuyuka Mfumu wa Lesa ubena kutangijila, kufuma mu Babilona Mukatampe, ne kwita pa jizhina ja Yehoba mu bukishinka. (Sala. 2:11, 12; Loma 10:13; Lum. 18:4) Twayai atweba bonse twingilenga na bulume bonse kufunjisha bantu lufunjisho lulengela kumona bumi.