Yesu Kilishitu—Byambo Byanji byo Byafikile Bantu pa Michima
“Jashi jaya nkuwa jaambile mwanamulume wa maana wa ku Kapenama, ne luno jibena kufika bantu pa michima ne mu milanguluko na mambo a mo ejambijile.”a—AUTHOR GREGG EASTERBROOK.
BYAMBO biji na bulume. Byambo bya maana byasalululwa bulongo bifika bingi bantu pa michima, kwibalengela kwikala na lwitabilo ne kupimpula bwikalo bwabo. Kafwako muntu waambanga byambo biji nobe byaambanga Yesu ne. Muntu umo waumvwine ku Jashi ja pa Mutumba jaambile Yesu wanembele’mba: “Yesu byo apwishishe kwamba bino, mabumba akuminye mo afunjishenga.”—Mateo 7:28.
Ne lelo jino byambo byaambile Yesu byayukanyikwa ku bantu ntanda yonse. Monai bino byambo byanema byo aambile.
“Kechi mukonshe kwingijila Lesa ne nsabo pamo ne.”—Mateo 6:24.
“Byonkabyo, bintu byonse byo musaka’mba, bantu betubile, ne anweba sa mwibobila byonkabya.”—Mateo 7:12.
“Lubulai kwi Kesala bya kwa Kesala; ne kwi Lesa bya kwa Lesa.”—Mateo 22:21.
“Lusekelo lo bamona aba bapana lwakila lo bamona aba batambula.”—Byubilo 20:35.
Bino Yesu kechi waambiletu bino byambo byanema ne. Byambo byo asapwijile byajinga bingi na bulume mambo byaambilenga pe Lesa, byalengejile bantu kufunda nkebelo ya kine mu bwikalo, kabiji byaambishetu patoka kuba’mba Bufumu bwa Lesa bo bukapwisha makatazho apitamo bantu. Byo tusakutanganga mitwe yalondelapo, tusakuyuka ene mambo byambo bya kwa Yesu ne lelo jino o bibena kufikila “bantu pa michima ne mu milanguluko na mambo a mo ebyambijile.”
[Tubyambo twa mushi]