Kukwatankana mu Butemwe—Sawakya wa Kupwila kwa pa Mwaka

ABA bashonkenejile ku Nzubo ya Kupwilamo Kukatampe ya Bakamonyi ba kwa Yehoba mu Muzhi wa New Jersey, ku U.S.A basangalele bingi. Pa October 3, 2009, bantu bakila pa 5,000 bashonkenejile ku kupwila kwa nambala 125 kwa Watch Tower Bible and Tract Society of Pennsylvania. Bantu bakwabo bavula batelekele ku kuno kupwila kupichila mu mavidyo o basokankenye mu ma Betele asatu a mu United States ne Betele wa mu Canada. Bonse 13,235, bakwatankene pamo mu kumwesha butemwe bwabo pe Yehoba, basekejile pa kwikala na kupwila kwa maola asatu.

Geoffrey Jackson wa mu Jibumba Jitangijila ye wajinga wa kumupando. Watendekeshe kupwila kupichila mu kwita jibumba ja banyimbi ba pa Betele abo baimbile nyimbo iji mu buku wetu wa nyimbo wakatataka. Mukwabo mulongo wa mu Jibumba Jitangijila, aye David Splane, watangijilenga jibumba ja banyimbi waambileko pacheche pa buneme bwa kwimba nyimbo mu mpopwelo ya kine. Bonse batainweko bebambijile kwimba nyimbo isatu yakatataka pa kuno kupwila. Patanshi jibumba ja banyimbi jo jatendekejilepo kwimba, apa bino ne bonse ba mu luonde bevwangamo mu kwimba. Abano banyimbi bajingatu ba kwimba pa kuno konka kupwila, pano bino kechi kibena kulumbulula amba byo byo kyafwainwa kwikala pa kupwila kwa kipwilo, kwa mwanzo, kubuñana kwa juba jimo nangwa kushonkena kwa nkambi ne.

Masawakya Kufuma ku Misampi

Ba mu Kavoto ka Musampi baishile pa kuno kupwila baambile masawakya a mu misampi itanu. Mulongo Kenneth Little waambile’mba musampi wa mu Canada katataka akatendeke kupulinta magazini avula a kwingijisha mu United States ne mu Canada, kino kikamwesha kuyilako bingi palutwe mu mingilo ya pa uno musampi. Pa kuba’mba kino kikobiwe, munkinyi wa kupulintilako mabuku ukengilanga maola 16 pa juba.

Mulongo Reiner Thompson wapaine sawakya pa mambo a mwingilo wa Bufumu mu Dominican Republic, kabiji mulongo Albert Olih waambile pa mingilo ibena kwingijiwa mu Nigeria. Mulongo Emile Kritzinger wafumine ku Mozambique walondolwele kuba’mba byo papichile myaka yavula ya lumanamo, Bakamonyi ba kwa Yehoba bebaswishishe kwingila mingilo yabo mu 1992. Mu byalo byonse bisatu, bibelengelo bya basapwishi byayilako bingi palutwe. Mulongo Viv Mouritz wafumine ku musampi wa mu Australia, waambile pa kuyilako palutwe kwa mwingilo ku Musela wa Timor ubena kwingila balongo ba ku Australia.

Tuvoto twa Jibumba Jitangijila

Mu 1976, mingilo yonse ya Bakamonyi ba kwa Yehoba yatangijilwenga na tuvoto tutanu na kamo twa Jibumba Jitangijila. Mu kuya kwa kimye, ba mu jibumba ja mikooko ikwabo bebatongwele kuba’mba bakwashengako. Pa kino kimye ba mu jibumba ja mikooko ikwabo 23 babena kukwasha mu mwingilo ubena kwingijiwa. Batanu na umo ba mu bano babena kukwasha, bebepwizhe. Myaka yabo yonse pamo yo baingila mu mwingilo wa kimye kyonse yafika ku 341, ko kuba’mba avaleji ke myaka 57 pa muntu pa muntu.

Mulongo Don Adams wayile na kwingila pa Betele mu 1943 walondolwele kuba’mba Kavoto ka Lutangijilo kalengwa na bakwatankanya mingilo ya tuvoto tukwabo tutanu, kamona kuba’mba tonse tuvoto tutanu tubena kwingila bingi bulongo mu kukwatankana. Kabiji kano kavoto ko kaji na mutembo wa kukwasha mu makatazho eyatu kya kubazhimukila, lumanamo, bije bya mambo, bya malwa, ne bintutu bikwabo bya bukiji bukiji byalamata Bakamonyi ba kwa Yehoba mwaya ntanda.

Mulongo Dan Molchan walumbulwile mwingilo wingila Kavoto Katala pa ba Mwingilo ba Kimye Kyonse, katangijila mwingilo wa kulama bulongo ba mu kisemi kya pa Betele bafika ku 19,851 mwaya ntanda yonse, kwibakwasha ku mupashi ne ku mubiji. Mulongo David Sinclair waambile pa Kavoto ka Kusampanya katala pa bipe byakwingijisha mu misampi. Kabiji mulongo Robert Wallen waingila pa Betele pepi na myaka 60, wabulañene Kavoto ka Mwingilo byo katangijila mwingilo wa bantu ba Yehoba wa mu bujimi ne mu bipwilo. Mulongo William Malenfant waambile pa mwingilo mukatampe wingila Kavoto ka Lufunjisho wa kunengezha mutanchi wa kushonkena kwa nkambi. Mulongo wapeleleko aye John Wischuk walumbulwile Kavoto ka Kunemba byo katangijila bulongo lunengezho lwa kunemba mabuku etu.a

Kinembelo kya Mwaka wa 2010 Kyaamba pa Butemwe

Majashi akwabo asatu alondejilepo beambile ku ba mu Jibumba Jitangijila. Mulongo Gerrit Lösch watendekele jashi janji na bwipuzho bwa kuba’mba: “Nanchi mukeba kwimutemwa ku bakwenu nyi?” Walumbulwile kuba’mba butemwe ke kintu kikebewa ku bantu, ne atweba tukeba kwibumwesha. Tukeba kumwesha butemwe mambo Yehoba witulengele na mambo a butemwe bwanji bukatampe. Kintu kikatampe kitulengela kusapwila ne kufunjisha ke butemwe bwetu bo twatemwa Yehoba.

Tumwesha butemwe bwaimena pa mafunde kechi ku bakwetu bonkatu ne, bino ne ku balwanyi betu. (Mat. 5:43-45) Luonde belutundaikile kulanguluka pa bintu byapichilemo Yesu bya kumupuma, kumukosamika, kumushipila mate ne kumwasa jifumo. Nangwa kya kuba wapichile mu bino bintu, walombejileko bashilikale bamupopele. Nanchi kino kechi kitulengela kukizhamo kumutemwa nenyi? Mulongo Lösch wabijikile kinembelo kya mwaka wa 2010 kya 1 Kolinda 13:7, 8, kyaamba’mba: ‘Butemwe butekanya mu byonse. Butemwe kechi bupwa ne.’ Tuji na luketekelo kechi lwa kwikalatu myaka ne myaka ne, bino ne kwitemwa atwe bene na bene myaka ne myaka.

Nanchi Mubena Kwendesha Motoka Saka Mwashalatu Tumafuta Tucheche Nyi?

Mulongo Samuel Herd watatwile jashi janji na kyakumwenako. Waambile’mba, fwanyikizhai mukwenu wimwambila amba muye nanji pa lwendo lwalepa makilomita 50. Byo muji mu motoka mwamona kuba’mba mafuta apwamo kala. Mwamubula mukwenu amba mu motoka mwashalatu tumafuta tucheche. Bino aye wimwambila amba kwakamwa ne, mu tanki mwakishala galoni umo wa mafuta. Kwakubula nangwa kupitapo kimye kyabaya ne, mafuta aumamo ne shau. Nanchi kyawama kutwajijila kwendesha motoka saka mwashalatu tumafuta tucheche bino saka wayuka amba katatakatu apwemo nyi? Kyakonsha kuwama bingi kuyuzha tanki na mafuta. Mu ñambilo ya kifwanyikizho, twafwainwa kuyuzha tanki na mafuta, mambo mafuta abena kwimenako maana etu a kuyuka Yehoba.

Pa kuba amba tube bino, twafwainwa kuyuzha mafuta mu tanki wetu kimye kyonse. Kuji mashinda ana o tubilamo bino. Jitanshi, lufunjisho lwa pa bunke, kuyuka Baibolo kupichila mu kumutanga pa juba pa juba. Kabiji kechi kutangatu ne, bino twafwainwa ne kumvwisha mwatala byo tubena kutanga. Ja bubiji, kwingijisha bulongo kimye kyetu kya Kupopwela kwa Kisemi. Nanchi tuyuzha mafuta mu tanki wetu mulungu ne mulungu nyi, inyi tubikamotu tucheche? Ja busatu, lufunjisho lwa kipwilo ne kutanwa ku kupwila. Ja buna, kulanguluka langulukanga pa mashinda a Yehoba. Salamo 143:5 waamba’mba: ‘Mbenakuvuluka moba a kukala; Ndanguluka languluka byubilo byenu byonse.’

“Baoloka Bakasama”

Mulongo John Barr ye waambile jashi ja busatu kabiji japeleleko, jalumbulwilenga kishimpi kya kwa Yesu kya kajo ne bincha. (Mat. 13:24-30, 38, 43) Kino kishimpi kyalumbulwilenga ‘kunowa’ mu kimye ‘baana ba mu bufumu’ kyo bakebakonkanya ne kusalululamo bincha ne kwibisoka mu mujilo.

Mulongo Barr watokesheshepo bulongo kuba amba kukonkanya kechi kukatwajijila ne. Watazhizhe ku Mateo 24:34, waamba amba: “Kisemi kino kechi kikapite ne, poso bino byonse bikafike.” Watangile bimye bibiji byambo bya kuba amba: “Kyamweka Yesu walumbulwilenga kuba’mba bamo bashingwa bajingako kimye kyatendekele kumweka kiyukilo mu 1914 bakekala bomi kimye kikashingwa bakwabo bakamonako malwa akatampe byo akatendeka.” Kechi twayuka bulongo kulepa kukekalako ‘kino kisemi’ ne, pano bino kyavwangamo ano onka mabumba abiji. Nangwa kya kuba bashingwa bapusana pusana mu myaka, bano bonse ba mu ano mabumba abiji balenga kino kisemi bonse baikalako mu ano moba a kupelako. Kitekenesha bingi kuyuka amba, kechi bonse bashingwa bajiko ano moba mulwabo na boba bamweneko byatendekele kiyukilo mu 1914 bakafwa ne, bino—bamo bakamonako ne malwa akatampe byo akatendeka.

‘Baana ba mu bufumu’ bapembelela mfweto yabo ya mwiulu, pano bino ne atweba bonse tutwajijila kwikala bakishinka ne kusama kufika ne ku mpelo. Twashukwa bingi kumona “kajo” byo babena kwikabungizha mu kino kimye kyetu.

Byo baimbile lwimbo wa kupezhako, mulongo Theodore Jaracz wa mu Jibumba Jitangijila walombele lulombelo lwa kupezhako. Kuno kupwila kwa pa mwaka byo kwawaminepo!

[Tubyambo twa mushi]

[Kitenguluzha pa peja 5]

SUKULU WA BAKULUMPE MU KIPWILO

Pa kuno kupwila kwa pa mwaka, mulongo Anthony Morris wa mu Jibumba Jitangijila wabijikile kuba’mba kukekala kutwajijila kufunjisha bakulumpe mu kipwilo. Sukulu wa bakulumpe mu bipwilo mu United States watendekele kwikalako kuntatwilo ya 2008 mu Patterson, ku New York. Bajinga mu kalashi wa bunambala 72 po po bapwishishetu kufunda, kabiji pa kino kimye bakulumpe mu kipwilo bapita mu uno sukulu bafika 6,720. Bakulumpe bakwabo bavula nabo babena kukebewa kufunda uno sukulu. Mu United States monkatu, muji bakulumpe mu kipwilo 86,000. Onkao mambo, Jibumba Jitangijila jaitabizhe kuba’mba kwikalenga sukulu mukwabo mu Brooklyn, ku New York kutendeka pa December 7, 2009.

Bakalama benda bana bebafunjishe kwikala Bafunjishi ba uno sukulu mu Patterson pa bañondo babiji. Panyuma ya bino, bano bayile na kufunjisha ku Brooklyn, kabiji bakwabo bana bebafunjishe kwingila uno mwingilo. Bano bakafunjisha sukulu mu Brooklyn kabiji bakwabo bana bakaya na kufunjisha sukulu mu Mazubo a Kupwilamo Kukatampe ne Mazubo a Bufumu. Uno mutanchi watwajijile kufika ne kimye bafunjishi ba uno sukulu kyo bafikile 12 bakufunjisha makalashi atanu na imo pa mulungu pa mulungu mu mulaka wa Kizungu mu United States. Kabiji kukekala kufunjisha bafunjishi bana bakafunjishanga uno sukulu mu mulaka wa ki Spanish. Uno sukulu kechi ukekala wa kupingizha pa Sukulu wa Mwingilo wa Bufumu ubiwa ne, nkebelo ya uno sukulu ikekala ya kukomesha bumupashi bwa bakulumpe mu bipwilo. Maofweshi a misampi mwaya ntanda akanengezhanga uno sukulu kwikalako mu Mazubo a Kupwilamo Kukatampe ne Mazubo a Bufumu mu mwaka wa mwingilo wa 2011.

[Bipikichala pa peja 4]

Kupwila kwa pa mwaka kwatendekele na nyimbo iji mu buku wetu wa nyimbo wakatataka wa kuba’mba, “Mwimbilai Yehoba”