Nanchi Jibumba Jitangijila ja Bakamonyi ba kwa Yehoba bo Bañanyi?

Jibumba Jitangijila ke jibumba jicheche ja banabalume bena Kilishitu baji na bulunda bwakosa ne Yehoba batangijila Bakamonyi ba kwa Yehoba mwaya ntanda yonse. Mingilo yo bengila ke ino:

• Batala pa mwingilo wa kunengezha mabuku alumbulula Baibolo, kupwila ne kunengezha masukulu a Bakamonyi ba kwa Yehoba.—Luka 12:42.

• Batangijila mwingilo wa Bakamonyi ba kwa Yehoba mwaya ntanda yonse wa kusapwila pa mvula bantu, kutala pa bipe byo bapana ne kutala pa mwingilo wa kutongola balongo bafikilamo bakwingila mingilo mu jibumba jetu.

Ba mu Jibumba Jitangijila balondela byaubanga “batumwa ne bakulumpe bajinga mu Yelusalema” mu myaka kitota kitanshi, bafuukwilepo kintu kyanema bingi kwimenako kipwilo kyonse kya bena Kilishitu. (Byubilo 15:2) Byonka byajinga boba banabalume bakishinka, ba mu Jibumba Jitangijila kechi bo bene bena jibumba jetu ne. Bintu byonse byo bafuukulapo bifuma mu Baibolo mambo bayuka’mba Yehoba Lesa watongola Yesu kwikala Mutwe wa kipwilo kya Bwina Kilishitu.—1 Kolinda 11:3; Efisesa 5:23.

Bañanyi baji mu jibumba jitangijila?

Baji mu Jibumba Jitangijila ke: ba Kenneth Cook, Jr., ba Gage Fleegle, ba Samuel Herd, ba Geoffrey Jackson, ba Jody Jedele, ba Stephen Lett, ba Gerrit Lösch, ba Jacob Rumph, ba Mark Sanderson, ba David Splane ne ba Jeffrey Winder. Bengijila pa ofweshi wetu mukatampe wa ntanda yonse ku Warwick, New York, U.S.A.

Jibumba Jitangijila jingila byepi?

Jibumba Jitangijila jalenga tuvoto tutanu na kamo tutala pa mingilo yapusa pusana kabiji baji mu jino jibumba bengijila mu tuno tuvoto.

• Kavoto ka Lutangijilo: Katala pa bya mambo ne kumona bya kukwasha baponenwa na bya malwa, kuvwangakotu ne kukwasha balongo betu bo bamanyika na mambo a bintu byo baitabilamo ne bintu bikwabotu bimwekela Bakamonyi ba kwa Yehoba mwaya ntanda.

• Kavoto Katala pa ba Mwingilo ba Kimye Kyonse: Katala pa ba mu kisemi kya pa Betele.

• Kavoto ka Kusampanya: Katala pa kunengezha mabuku alumbulula Baibolo ne kushimika bishimikwa mwa kupwijila, maofweshi a bantuntuluzhi ne bishimikwa bya pa misampi.

• Kavoto ka Mwingilo: Katala pa mwingilo wa kusapwila “mambo awama a Bufumu.”—Mateo 24:14.

• Kavoto ka Lufunjisho: Katala pa kupana mikambizho ya ku mupashi kupichila mu kupwila, masukulu ne kukopa byambo pa maselechi ne mavidyo.

• Kavoto ka Kunemba: Katala pa kunemba kajo ka ku mupashi kupichila mu kunemba pa keyala wetu ne kutala pa mwingilo wa bantuntuluzhi.

Kununga pa mingilo yo bengila mu tuno tuvoto, ba mu Jibumba Jitangijila basambakana mu mulungu jimo na kwisamba pa bintu bibena kukebewa mu jibumba jetu. Umvwe basambakana, ba mu jino jibumba besamba pa byaamba Binembelo, kabiji balondela lutangijila lwa mupashi wazhila wa Lesa, ne kuyila mumo pa kufuukula bintu.—Byubilo 15:25.

Bañanyi bakwashako ba mu Jibumba Jitangijila?

Bano ke bena Kilishitu bo baketekela bingi bakwashako ba mu Jibumba Jitangijila mu tuvoto twapusana pusana. (1 Kolinda 4:2) Bano bayuka bya kwingila mingilo mambo baingila pa moba avula mu tuvoto mo bengijila, kabiji batanwako kimye byo basambakana mu mulungu. Nangwa kya kuba kechi bafuukulako bintu ne, bino bano bankwasho bambapo pa bintu bimo ne kubulañanako bya kuba pa kuba’mba byo bafuukula mu tuno tuvoto bingile bulongo ne kumona kuba’mba byo bafuukula bibena kubiwa. Kabiji bebatuma ku ba mu Jibumba Jitangijila kuya na kutundaika balongo ne banyenga mwaya ntanda. Bambako ne majashi pa kupwila kwa pa mwaka nangwa pa kupwila kwa bapwisha sukulu wa Gileada.