Funjishainga Baanu
Kimye kyo Twafwainwa Kutwajijila Kwikala Balaba
MWAKONSHA kwitaba amba kyanema bingi kwikala balaba kimye kyo muji ku sukulu. Bavula bakunuka kimye kyo babena kufunda, bino pa kuba’mba mufunde bulongo, mwafwainwa kutwajijila kwikala balaba. Kampe ne anweba muya ku kipwilo ko mufunda Baibolo.
Walanguluka amba wakonsha kuba byepi pa kuba’mba utwajijile kwikala walaba?—a Kintu kimo kyanema ke kulaala bukiji. Kampe kulaalako pacheche mute nako kwakonsha kukwasha. Twayai tumone byo twakonsha kufunjilako ku kyamwekejile wakyanyike umo wakupukijilwe mu tulo kimye kya bufuku mutumwa Paulo byo aambilenga jashi. Zhikulai mu Baibolo pa Byubilo kitango 20, byepelo 7 kufika ku 12, mumone kyaubiwe.
Paulo wafwakashijile kipwilo kyajinga mu muzhi wa Toloasa waikejile ku kitulu. Baibolo wamba’mba Paulo “wayukile amba kesha ukaya” na bwato. Onkao mambo, “waambilengatu kufika ne pakachi ka bufuku.” Tutanga amba: “Nsongwalume umo aye Yutikusa waikele pa kipenze kimye Paulo kyo afunjishenga, byo aponejile mu tulo.” Pano ki ka kyamwekele?—
Yutikusa “waponene panshi kufuma pa kibamba kya busatu kya peulu.” Paulo ne bo ajinga nabo bakunkulukijile panshi bukiji. Batainetu Yutikusa wafwa. Abya wakonsha kufwanyikizha bantu bonse byo beumvwine nyi?— Baibolo wamba’mba Paulo wamukumbachile Yutikusa. Ponkapo Paulo wabijikile na lusekelo amba: ‘Kwakamwa ne, ujitu bulongo!’ Lesa wasangwile Yutikusa!
Twakonsha kufunjilako ka pe Lesa ku kyamwekejile Yutikusa?— Kintu kimo ke kya kuba’mba Yehoba, Shetu wa mwiulu wakonsha kusangula bafwa, kubikakotu ne banyike. Yehoba wimuyuka kabiji wimutemwa kukila ne bimutemwa bansemi benu. Yesu byo ajinga pano pa ntanda, wamwesheshe Shanji byo aji kupichila mu kwibatambula baana ne kwibapesha. Kabiji wasangwile ne bakyanyike bakwabo, kubikakotu ne nsongwakazhi wa myaka 12.
Kuyuka amba Shetu wa mwiulu wakutemwa kukulengela kumvwa byepi?— Ee, kitulengela ne atweba kumutemwa Yehoba ne kumukokela mu bintu byo amba. Abya wayuka byo twakonsha kuba pa kuba’mba tumweshe amba twamutemwa nyi?— Kupichila mu kwamba amba ee twamutemwa. Yesu waambile’mba: “Natemwa Batata.” Bino Yesu waubile bintu byavula kukila kwambatu amba watemenwe Lesa. Wamwesheshe kino kupichila mu byo aubile.
Yesu wakokejile Lesa. Waambile’mba: “Nguba bintu bimutokesha pa muchima.” Ne atweba pa kuba’mba tutokeshe Yehoba pa muchima ne Mwananji Yesu, twafwainwa kwibikako na ngovu kutwajijila kwikala balaba.
Tangai mu Baibolo wenu
[Tubyambo twa mushi]
a Kimye kyo mubena kufunjisha mwanyike inge mwafika pa kakishilwa, kabena kwimuvululako kutulumanako ne kupembela mwana wakumbula.