Katatakatu Buyanji Bukapwe!
Fwanyikizhai kuba’mba mubena kwikala mu ntanda mwabula buyanji, bumbanzhi, nkondo, kubela ne bya malwa biponakotu bine. Kabiji fwanyikizhai ne kuba’mba mubena kubuuka pa juba pa juba kwakubula bijikila bya mu bwikalo, misalululo nangwa kumanama. Nanchi mulanguluka amba bino bintu byakonsha kubiwa nyi? Kafwako muntu nangwa kipamo kyalengwa na bantu kyakonsha kuleta luno lupimpu ne. Bino Lesa walaya kupwisha buyanji bwa bantu, kuvwangakotu ne bobwa bwatongolwa mu kibaba kyafumako. Monai milaye yalondelapo iji mu Mambo a Lesa Baibolo:
◼ KAFULUMENDE WAWAMA BYO AKALAMANGA
“Kabiji ne mu moba a boba bamfumu aye Lesa wa mwiulu ukaleta bufumu bo bakabula konauna myaka ne myaka, nangwa pachechetu ne, kabiji abwa bufumu kechi bakebupana ku mutundu ungi ne. Kabiji bukalalaula buno bufumu bonse ne kwibupwishatu shata! Pakuba abo bukekala myaka ne myaka.”—Danyela 2:44.
Bufumu bwa Lesa ke kafulumende uji mwiulu. Mfumu wa buno bufumu ke Yesu Kilishitu, ye ukapingakena pa makafulumende onse a bantu kabiji ukamona kuba’mba kyaswa muchima wa Lesa kyaubiwa mwiulu ne pano pa ntanda. (Mateo 6:9, 10) Pa uno kafulumende kechi pakapingapo kafulumende wa bantu uji yense ne, mambo ke “bufumu bwa myaka ne myaka bwa Nkambo yetu kabiji Mupulushi aye Yesu Kilishitu.” Mutende ukekala myaka ne myaka.—2 Petelo 1:11.
◼ BUPOPWESHI BWA BUBELA KECHI BUKEKALAKO NE
“Mambo Satana watwajijila na kwibepekezha kwikala malaika wa kyeya. Onkao mambo, kechi kya kukumya kwi amiwa umvwe bamingilo banji bebepekezha kwikala nobe bamingilo ya bololoke ne. Bino mpelo yabo ikekala monka mwayila mingilo yabo.”—2 Kolinda 11:14, 15.
Bupopweshi bwa bubela bukayukanyikwa kuba’mba bwingila mingilo ya Diabola kabiji bakebonauna. Misalululo ya mu bupopweshi yonse ne kwiipaya bikapwa. Kino kikalengela bonse batemwa “Lesa mumi kabiji wakine” kumupopwela na “lwitabilo lumo” ne “na mupashi ne na bukine.” Ne kikafumamo ke mutende ne kukwatankana—1 Tesalonika 1:9; Efisesa 4:5; Yoano 4:23.
◼ BANTU BONSE BAKEKALA BALUMBULUKA
“Ne Lesa mwine ukekala nabo. Kabiji ukebashimuna mipolo yonse ku meso abo, ne lufu, mabingo, kujila nangwa misongo kechi bikekalako jibiji ne. Bintu bya kala byapichijila.”—Lumwekesho 21:3, 4.
Yehoba Lesa ukoba bino byonse kupichila mu mwananji Yesu wapaine bumi bwanji pa kuba’mba bantu bakapuluke. (Yoano 3:16) Kupichila mu bukalama bwa kwa Yesu, bantu bakekala balumbuluka jibiji. Kechi kukekala buyanji jibiji ne, mambo “Lesa mwine ukekala nabo” kabiji “ukebashimuna mipolo yonse ku meso abo.” Bumbulwakulumbuluka bwa bantu ne buyanji katatakatu bukapwe; “Baoloka bakaswana ntanda, Ne kwikalamo myaka ne myaka.”—Salamo 37:29.
◼ MIPASHI YATAMA KECHI IKEKALAKO NE
“Kabiji [Yesu Kilishitu] wakwachile awa nsuñunyi yenka muloolo wa kala, aye Diabola kabiji Satana ne kumukasa myaka 1,000. Kabiji wamwelele mu kalengwa kabula kupela ne kushinkapo ne kubikapo katetesho kuba amba abule kujimbaika jibiji bantu ba mu bisaka poso aya myaka 1,000 ikapwe. Panyuma ya kupwa ino myaka, wafwainwa kukasululwa pa kakimye kacheche.”—Lumwekesho 20:2, 3.
Byubilo byonse bya kwa Satana bikapwa kimye Satana ne bandemona kyo bakebakasa ne kwibataya “mu kalengwa kabula kupela” mo bakabulanga kwingila. Kechi bakekala na bulume bwa kulengela bantu kuba byubilo byatama ne. Byo kikawamapo kwikala mu ntanda yawama mukabula Satana ne bapashi batama balengela bantu kuba byubilo byatama!
◼ “MOBA APELAKO” AKAPWA
“Moba apelako” akapwa kimye kikafika “malwa akatampe” aambilepo Yesu. Waambile’mba: “Mambo kukekala malwa akatampe, akyangye kumwekapo kala kufumatu ku ntendekelo ya ba pano pa ntanda kufika ne buji lelo, kabiji kechi akamwekapo jibiji ne.”—Mateo 24:21.
Ano malwa akekala akatampe mambo kukamweka bya malwa bikyangye kubiwapo kala. Bino bikafika pa kankomo pa “juba jikatampe ja Lesa Wabulume Bonse,” jayukanyikwa amba “Amagedonyi.”—Lumwekesho 16:14, 16.
Bantu batemwa byawama babena kupembelela mpelo ya buno bwikalo bwatama. Monai mapesho amo o babena kupembelela mu bukalama bwa Bufumu bwa Lesa.
LESA UKOBA NE BINTU BIKWABO!
“Jibumba jikatampe,” bakapuluka ne kwikala mu ntanda ipya ya mutende: Mambo a Lesa amba kuba’mba “jibumba jikatampe” ja bantu bakukankalwa kubala ‘bakapita mu malwa akatampe’ kabiji bakazhikijilwa bomi ne kutwela mu ntanda ya katataka ya bololoke. (Lumwekesho 7:9, 10, 14; 2 Petelo 3:13) Bakasanchila Yesu Kilishitu pa lupulukilo lwabo, “Mwana mukooko wa Lesa ukafumyapo bundengamambo bwa ba pano pa ntanda.”—Yoano 1:29.
Bantu bakamwenamo bingi mu lufunjisho lwa Lesa: Mu ntanda ipya, “pano pa ntanda pakakumbana mana a kumuyuka Yehoba.” (Isaya 11:9) Lufunjisho lwa Lesa lukafunjisha bantu bya kwikala mu mutende na bantu bonse ne kulama bulongo ntanda. Lesa walaya amba: “Amiwa ne Yehoba Lesa wenu, yenka wimufunjisha’mba mukamwenemo byawama, kabiji wimutangijila mu jishinda jo mwafwainwa kuyamo.”—Isaya 48:17.
Batemwe betu bafwa bakasangulwa: Yesu byo ajinga pano pa ntanda, wasangwile mulunda nanji Lazalasa. (Yoano 11:1, 5, 38-44) Kino kyamwesheshe byo akoba mu Bufumu bwa Lesa.—Yoano 5:28, 29.
Mutende ne bololoke kechi bikapwa ne: Mu bukalama bwa kwa Kilishitu, kechi mukekala bumpupabizhila ne. Pano twayuka byepi kino? Na mambo a kuba’mba Yesu uyuka biji mu michima ya bantu, ukengijisha buno bulume kuchibila mambo baoloka ne babi. Bantu babula kukeba kupimpula byubilo byabo byatama kechi bakekala mu ntanda ipya ya Lesa ne.—Salamo 37:9, 10; Isaya 11:3, 4; 65:20; Mateo 9:4.
Bintu byo twisambapo ke bicheche pa bungauzhi bwa mu Baibolo bwaamba pa bintu byawama biji kulutwe. Bufumu bwa Lesa umvwe bwatendeka kulama, mu ntanda ‘mu kavula mutende’ myaka ne myaka. (Salamo 37:11, 29) Byonse bintu bilengela bantu kuyanda bikapwa. Twakonsha kusumininwa kuba’mba bino bikobiwa mambo Lesa walaya amba: “Tala! Mbena kwalula bintu byonse kwikala ke bipya. . . . Bino byambo byakishinka kabiji bya kine.”—Lumwekesho 21:5.
[Kipikichala pa peja 6]
[Byambo bya Muntu Ungi]
© Silke Woweries/Corbis