Lesa byo Akobapo pa Bubi

Baibolo witubula pe Yehoba ne Mwananji aye Yesu Kilishitu byo bakobapo pa bubi bwaleta Satana Diabola. Waamba’mba: “O ene mambo, Mwana Lesa [Yesu] o aishijile kuba amba: onaune mingilo ya kwa Diabola.” (1 Yoano 3:8) Lunkumbwa, lupato ne byubilo byatama biji mu ino ntanda bakebifumyapo. Kabiji Yesu walayile amba Satana Diabola, “mfumu wa pano pa ntanda” ‘bakamupangapo.’ (Yoano 12:31) Umvwe Satana bamufumyapo, ntanda ipya ya bololoke ikafika kabiji pano pa ntanda pakekala mutende.—2 Petelo 3:13.

Ibyepi ku bantu bakana kupimpula byubilo byabo ne kutwajijila na kuba bintu byatama? Mulaye wa mu Baibolo waamba’mba: “Mambo baoloka bakekala mu ntanda, kabiji ne balumbuluka bakakelwa monka. Bino babi bakebafumyamo mu ntanda, ne ba bongozhi nabo bakebangatamo.” (Byambo bya Mana 2:21, 22) Bantu babi bakebafumyapo. Mu yoya ntanda ya mutende, bantu balukokelo bakayanga pachepache na kukasuluka ku bundengamambo bo baswaine.—Loma 6:17, 18; 8:21.

Nga Lesa ukafumyapo byepi bubi mu ntanda ipya? Kechi kupichila mu kwibangata kya bupe kya lūsa lwa kwifuukwila bintu ne, bino ukafunjisha bantu ba lukokelo mafunde anji ne kwibakwasha kuleka milanguluko yatama ne byubilo.

Lesa ukobapo byepi pa bya malwa bya kubazhimukilatu? Walaya kuba’mba Bufumu bwanji bwa kafulumende katatakatu bukalamenga ino ntanda. Kabiji Lesa watongola Mfumu wa buno Bufumu aye Yesu Kilishitu uji na bulume bwa kubuka bikola. (Mateo 14:14) Kabiji Yesu uji na bulume bwa kukanya binkunka byakonsha kuleta lumanamo. (Mako 4:35-41) Kabiji buyanji bwiya na mambo a “bintu bibasolomokelatu” bukapwa. (Musapwishi 9:11) Kimye Kilishitu kyo akalamanga, kafwako bya malwa bikamwekelanga bantu ne.—Byambo bya Mana 1:33.

Pano kikekala byepi ku bantu bavula bafwa babula mambo? Saka akyangye kubuusha mulunda nanji aye Lazalasa, Yesu waambile’mba: “Amiwa yami lusanguko ne bumi.” (Yoano 11:25) Yesu uji na bulume bwa kusangula bantu bafwa!

Umvwe kya kuba kimuletela lusekelo inge mwalanguluka pa kwikala mu ntanda amo bintu byatama mo bikabulanga kumwekela bantu boba byawama, mambo ka a kubujila kufunda pe Lesa wa kine ne nkebelo yanji kupichila mu kufunda Baibolo? Bakamonyi ba kwa Yehoba bekala konka kwenu bakatemwa kwimukwasha kufunda bukine. Twimutundaika kumonañana nabo nangwa kunembela banemba uno magazini.