Yehoba Wanemeka “Amena” Wenu

YEHOBA wanemeka bingi mpopwelo yetu. ‘Uteleka ne kumvwa’ byuba bakalume banji, kabiji kafwako nangwa kimo kyo tuba pa kumutota kyo abula kumona ne, nangwa kimweke kukepa byepi, aye umona byonse. (Mala. 3:16) Akilangulukai pa kyambo kyo twamba bimye byavula bingi. Kino kyambo ke “amena.” Nanchi Yehoba wanemeka kino kyambo nyi? Ee, wikinemeka. Pa kuba’mba tuyuke ene mambo o ekinemekela, tusakwisamba pa kino kyambo byo kilumbulula ne byo bekingijisha mu Baibolo.

“BANTU BONSE BAKAMBE’MBA, ‘AMENA!’”

Kyambo kya kuba’mba “amena” kilumbulula’mba, “kikale byonkabyo,” nangwa’mba “kya kine.” Kino kyambo kyafuma ku kyambo kine kya Kihebelu kilumbulula kwikala “wa kishinka,” “waketekelwa.” Bimye bimo bekingijishanga pa kuchiba mambo. Inge muntu wachipa, waambanga’mba “amena” pa kumwesha’mba byo aamba bya kishinka kabiji waswa kupita mu byonse byakonsha kumumwekela na mambo a byambo byo aamba. (Bala. 5:22) Inge muntu wauba bino, kyamweshanga’mba ukafikizha byo alaya.—Ne. 5:13.

Kyambo kya “amena” bekingijisha bingi mu buku wa Mpitulukilo ya mu Mizhilo kitango 27. Bena Isalela byo batwelele mu Ntanda ya Mulaye, bakonkene mu kimpachiko kya mutumba wa Ebala ne Mutumba wa Gelizimu na kumvwa byo bebalumbulwijilenga Mizhilo. Kechi bayiletu na kumvwa Mizhilo ya Lesa ne, bino ne kumwesha’mba baswile kwiilondela. Baubile bino kupichila mu kukumbula’mba “Amena!” kimye kyo bebalumbulwijile bikafumamo inge babula kukookela. (Mpitu. 27:15-26) Fwanyikizhai byaumvwanyikilenga mawi a bantu bavula bingi, ko kuba’mba banabalume, banabakazhi ne baana byo bakumbwile na jiwi ja peulu. (Yosh. 8:30-35) Kwa kubula nangwa kuzhinaukatu ne, kechi balubilemo byambo byo baambile pa joja juba ne. Kabiji bena Isalela bafikizhe mulaye wabo, mambo kinembelo kyamba’mba: “Bena Isalela batwajijile kwingijila Yehoba mu moba onse a kwa Yoshua ne mu moba onse a bakulumpe bashajilepo Yoshua saka afwa kala bonka bayukile mingilo yonse Yehoba yo aubijile bena Isalela.”—Yosh. 24:31.

Yesu naye waingijishe kyambo kya “amena” pa kumwesha’mba byambo byo aambile byajinga bya kine, bino waambile kino kyambo mu jishinda japusanako. Aye kechi waingijishe kino kyambo kumwesha’mba waswa byaamba muntu mukwabo ne, bino waingijishe kyambo kya “amena” (kyatuntululwa mu Kikaonde amba “kinetu”) ku ntendekelo ya byambo byanema byo aambile. Pa bimye byavula, wabwezhangapo kino kyambo kupichila mu kwamba’mba “amena amena.” (Mat. 5:18; Yoa. 1:51) Onkao mambo, wakwashishe bantu bamutelekelenga kuyuka’mba byambo byo aambile bya kine. Yesu washiinwe pa kwamba bino byambo mambo ye ye bapele luusa lwa kufikizha milaye ya Lesa yonse.—2 Ko. 1:20; Lum. 3:14.

“BANTU BONSE BAAMBILE’MBA, ‘AMENA!’ KABIJI BATOTELE YEHOBA”

Kabiji bena Isalela baingijishanga kyambo kya “amena” kimye kyo batotanga ne kulomba kwi Yehoba. (Ne. 8:6; Sala. 41:13) Kupichila mu kwamba kino kyambo pa kupwisha kulomba, aba batelekanga bamweshanga’mba baswisha lulombelo. Onkao mambo, bonse bevwangangamo kabiji beyowanga kupopwela Yehoba mu jino jishinda. Kino kyo kyamwekele ne kimye Mfumu Davida kyo aletele Jikwachi ja Yehoba ku Yelusalema. Kabiji byo basekelejilenga, Davida waambile lulombelo kufuma panshi ya muchima mu lwimbo wanembwa pa 1 Byambo bya Moba 16:8-36. Aba bashinkilweko batundaikilwe bingi na byambo byajinga mu uno lwimbo kya kuba “bantu bonse baambile’mba, ‘Amena!’ kabiji batotele Yehoba.” Kya kine, basangalele bingi pa kupopwela Yehoba bonse pamo.

Bena Kilishitu batanshi nabo baingijishanga kyambo kya “amena” pa kutota Yehoba. Kabiji banembi ba Baibolo bekingijishe bingi kino kyambo. (Loma 1:25; 16:27; 1 Pe. 4:11) Buku wa Lumwekesho wamwesha ne bamalaika mwiulu saka batumbijika Yehoba kupichila mu kwamba’mba “Amena! Totai Yehoba!” (Lum. 19:1, 4) Bena Kilishitu batanshi baambanga “amena” pa kulomba kimye kyo bapwilanga pamo. (1 Ko. 14:16) Nangwa byonkabyo, kino kyambo kechi bekingijishangatu kwa kubula ne kulangulukapo ne.

ENE MAMBO KWAMBA “AMENA” O KWANEMENA

Byo twafunda pa bakalume ba Yehoba byo baingijishanga kyambo kya “amena,” twamona ene mambo o kyanemena kwikingijisha pa kupwisha kulomba. Inge twaamba kino kyambo pa kupwisha kulomba, tumwesha’mba twaswisha byo baamba. Kabiji inge twaamba’mba “amena” nangwatu mu muchima ku lulombelo lwa pa mvula bantu tumwesha’mba twaswisha byo baamba mu lulombelo. Twayai twisambe pa bishinka bikwabo bimwesha buneme bwa “amena” wetu.

Tutako muchima inge babena kulomba mambo ke lubaji lwa mpopwelo yetu. Tupopwela Yehoba pa kulomba, mu byambo byo twamba ne byo tuba. Na mambo a kuba’mba tukeba kwamba “amena” kufuma panshi ya muchima, kitulengela kutako muchima inge babena kulomba.

Twakwatankana byo tuji bapopweshi ba Lesa. Kulomba pa mvula bantu kwitulengela kuvwangamo kipwilo kyonse na mambo a kuba’mba babena kuteleka. (Byu. 1:14; 12:5) Inge twaambila pamo na balongo ne banyenga mba amena tukwatankana. Nangwa twaamba na jiwi ja peulu nangwa twaambilatu mu muchima, “amena” wetu ulengela Yehoba kuba bintu byo tulomba.

Nyenga ubena kuteleka ku lulombelo pa foni pa kupwila — Inge twaamba’mba “amena,” tutota Yehoba

Tutota Yehoba. Yehoba umona byonse byo tuba pa kumupopwela. (Luka 21:2, 3) Umona kitulengela kumupopwela ne biji mu muchima wetu. Nangwatu inge tubena kutelekela kupwila pa foni, twafwainwa kushiinwa’mba inge twaamba’mba “amena” Yehoba umvwa. Inge twaamba’mba “amena,” tukwatankena pamo na boba bataanwako ku kupwila na kutota Yehoba.

“Amena” wetu wakonsha kumweka nobe kechi wanema ne, bino kishinka ke kya kuba’mba wanema bingi. Buku umo waamba’mba: “Na mambo a kwingijisha kino kyambo, bakalume ba Lesa bamwesha’mba baketekela Lesa na muchima yense.” Onkao mambo, “amena” wetu ye twamba atokeshenga Yehoba ku muchima.—Sala. 19:14.

Nanchi Twafwainwa Kwambanga’mba “Amena” Kimye Kyonse Nyi?

“Amena” ke kyambo kyanema bingi kechi twafwainwa kwikyambangatu kyambe ambe ne. Pano twakonsha kuba byepi inge ubena kulomba walubankanya pa kutela byambo bimo? Nanchi twafwainwa kukana kwambako’mba “amena” nyi? Ine. Yehoba wayuka’mba bonse tulubankanya pa kwamba, kabiji kechi uta muchima pa byo tulubankanya ne. Onkao mambo, inge twata muchima pa bintu byo babena kulombapo kechi kuta muchima pa byambo byo balubankanya pa kwibitela ne, twakonsha kwamba’mba “amena.”

Pano bino, kechi twamba’mba “amena” na jiwi ja peulu nangwa kwambila mu muchima inge kya kuba’mba ubena kulomba kechi upopwela Lesa wa kine ne. Pano twakonsha kuba byepi inge kya kuba twataanwapo po babena kulombela? Twambe’mba twataanwako ku misambo imo kabiji baambila muntu amba alombe. Nangwa kampe twikala na bantu babula Bakamonyi kabiji mutwe wa kisemi wabula kamonyi, wafuukulapo kulombela pamo na kisemi. Twafwainwa kuba byepi?

Umvwe twataanwa mu luno lukatazho, twafwainwa kwikalatu nzoo ne kumwesha mushingi. Kechi twafwainwa kwambako amba “amena” ne; kabiji kechi twikwata nabo ku maboko pa kulomba ne, mambo inge twauba bino ko kuba’mba tubena kuswishako milombelo yabo. Twakonsha kufuukul apo kulombela mu muchima, bino kechi twafwainwa kwamba’mba “amena” na jiwi ja peulu ne, mambo bamo bakonsha kulanguluka’mba twaswishako milombelo yabo. Inge jibumba jaimana pa kulomba, twakonsha kusalapo kwimana nangwa ne. Kwimana nangwa kukunyika mutwe panshi kechi kimwesha’mba tubena kwivwangamo mu mpopwelo yabo ne. Mwina Kilishitu mwine wafwainwa kufuukulapo jishinda jo amona kuba’mba jawama, kabiji kafwako wafwainwa kumuzhachisha pa byo afuukulapo ne.

Bintu byo twisambapo byamwesha ene mambo “amena” wetu o anemena kwi Yehoba.