Sukulu ya Mwingilo wa Teokalasi byo Itufweta

¹ Bantu ba Yehoba baji bingi na jishuko ja kufunjishiwa ne aye. (Isa. 54:13; Yoa. 6:45) Nangwa byonkabyo, kufunda kwetu kwaimena pa byo twibikako na ngovu. Abya mwakonsha kuyuka mfweto iji mu Sukulu ya Mwingilo wa Teokalasi byo ibena kwimukwasha ku mupashi nyi?

² Byambo bya Lusanchilo: Bakulumpe batangijila sukulu bavula batana kuba’mba jashi ja ñambilo jakwasha bingi kipwilo kyabo kwambanga bulongo mu mwingilo wa mu bujimi. Kabiji mukulumpe utangijila sukulu umo watana kuba’mba na mambo a lunengezho lujiko lwa kwipuzha luonde kwambapo mu jashi ja bishinka bikatampe kufuma mu kutanga Baibolo, kwalengela bavula kulondelanga mutanchi wabo wa kutanga Baibolo jonse. Pa mambo a Jashi Na. 2, balongo bavula batakaika bingi pa mfweto iji mu kutaya kimye kyabaya na kunengezha byambo bya kwiya na kutanga kwakubula kwambapo byambo bya kutendekelapo nangwa bya kupezhako ne. Aba bobapa jino jashi batako bingi muchima mu kukebesha kuwamishako busendwe bwabo bwa kutanga.—1 Timo. 4:13.

³ Bonse Bakonsha Kumwenamo: Kileta bingi lusekelo kukumbulapo kimye kya kupwila. (Mana. 15:23) Kwikela jimo na mepuzho a kwisamba kwa kupituluka mu byafunjiwe kwitulengela kunengezhezha jimo ne kukumbulapo. Kabiji kutendeka na Kyamba kya Usopa kya January 1, 2004, munembwa bishinka bikatampe kufuma mu mabuku a mu Baibolo byakwatankana na kutanga Baibolo kwatanchikwa mu Sukulu ya Mwingilo wa Teokalasi. Bino bibaba byakwasha bingi bavula kukumbulangapo mikumbu ikoseshañana pa kimye kya jashi ja bishinka bikatampe kufuma mu kutanga Baibolo.

⁴ Yense wanembesha mu sukulu uji na mutembo wa kunengezha ne kwamba majashi. Atweba bonse twakonsha kumwenamo mu lusanchilo lwa mukulumpe utangijila sukulu lo atakaika kimye kyo aji pa pulatifomu. Kabiji baana ba sukulu bamwenamo bingi mu bishinka bya kwibafundako ku mbaji panyuma ya kupwila. Mingilo ya kuba muji majashi a ñambilo iji ku mpelo ya bitango bya buku wa Nonkelenimo mu Masambililo ye Sukulu lya Butumikishi Ilya Bulesa, nayo ikwashañana bingi.

⁵ Kimye kibena kwambiwa majashi a mu Binembelo kimye kya sukulu ne panyuma, nembai bishinka mu buku wenu wa Isukulu lya Butumikishi. Langulukainga pa byo mwafunda, ne kumona luno lufunjisho kufuma kwi Lesa byo lubena kwimukwasha kununguluka ku mupashi.