Twafwainwa Kunemeka Buntangi bwa Yehoba

Umvwe mwaumvwa mazhina a kala nabiji Kola, Datanyi, ne Abilama, ñanyi kyubilo kyo mufikena kuvuluka? Bunsatuki! Bunsatuki bwa kusatukila ka? Buntangi bwa Lesa. Byambo byaamba pa bintu byatama byo baubile byanembwa mu Kubala kyapitala 16, kabiji kibaba kya kuba’mba “Kokelainga Nabukishinka Bantangi Batongolwa Na Lesa” kiji mu Kyamba kya Usopa kya August 1, 2002, nakyo kyalumbululapo bimo. Mwakonsha kumwenamo bingi mu kutanga bino byambo ne kulangulukishapo pa bipikichala biji mu vidyo ya Respect Jehovah’s Authority. Mukamona mapata abukile pakachi ka baana ba kishinka ba kwa Kola ne shabo nsatuki, wilwishishenga na Mfumu walengele bintu byonse. (Bala. 26:9-11) Kino kifwanyikizho kya kine kyafwainwa kwitutundaika atweba bonse kwikala na lukokelo lukatampe kwi Yehoba.

Byo mukatambanga vidyo, mukamonenga bishinka byalondelapo bitanu na kimo bibena kumwesha Kola ne bakwabo bansatuki byo bakankelwe kumwesha lukokelo: (1) Bakankelwe byepi kunemeka buntangi bwa Lesa? (2) Batendekele byepi kwitota, kukeba kwitumbijika ne kichima? (3) Batele byepi muchima pa bumbulwakoloka bwa boba batongwelwe na Yehoba? (4) Byubilo ka bya kwijizhañanya byo baishile kwikala nabyo? (5) Mambo ka o babujijile kutondwa na mingilo yabo yiikajila yo baingijilenga? (6) Balengejile byepi balunda nabo ne bisemi byabo kwibata maana mu kifulo kya kwikala bakishinka kwi Lesa?

Monai byo twakonsha kufunjilako ku mafunjisho aji mu kino kifwanyikizho kya mu Baibolo byo twakonsha kumona buntangi bwa Lesa lelo jino: (1) Twafwainwa kubapo byepi umvwe bakulumpe mu kipwilo bafuukulapo bimo, kabiji mambo ka? (2) Twakonsha kufumyamo byepi milanguluko yatama mwi atweba bene? (3) Twakonsha kubapo byepi pa bumbulwakoloka bwa boba batongolwa kutangijila? (4) Twakonsha kuba byepi umvwe byubilo bya kwijizhañanya byatendeka mu muchima wetu? (5) Twafwainwa kwiumvwa byepi na mwingilo uji yense ye twapewa? (6) Bañanyi bo twafwainwa kubula kupa munema ye twafwainwa kupa Lesa, kabiji kimye ka kino po kyakonsha kwikala lweseko lwakatazha kwi atweba?

Panyuma ya kwisamba bino byambo mu kipwilo, nga mambo ka a kubula kutamba jibiji ino vidyo? Lekai imukwashe kuyukisha ene mambo o twafwainwa kimye kyonse kunemekela buntangi bwa Yehoba!—Sala. 18:25; 37:28.