Kusapwila Kwitulengela Kuchinchika
1 Mambo a Lesa etukambizha ‘kunyema kapela na mukoyo, konka ko betutongwela.’ (Hebe. 12:1) Byonkatu awa unyema lubilo byo akebewa kukosako pa kuba’mba akafike kwapela, ne atweba twafwainwa kukosako pa kuba’mba tutambule mpasela ya bumi bwa myaka. (Hebe. 10:36) Nga mwingilo wa bwina Kilishitu wakonsha kwitukwasha byepi kuchinchika mu bukishinka kufika ne ku mpelo?—Mat. 24:13.
2 Tukoseshiwa ku Mupashi: Kutaya mbila ya mulaye wawama wa mu Baibolo wa ntanda ipya ya bololoke, kulengela luketekelo lwetu kukosa. (1 Tesa. 5:8) Umvwe ke tuye kimye kyonse mu mwingilo wa mu bujimi, twikala na jishuko ja kusapwila bukine bo twafunda mu Baibolo. Twikala na jishuko ja kulamawizha lwitabilo lwetu, mambo kino kitukwasha kukosesha bumupashi bwetu.
3 Pa kuba’mba tufunjishenga bantu bulongo, patanshi atweba bene twafwainwa kumvwisha bukine bwa mu Baibolo. Twafwainwa kupesapesa bishinka ne kulanguluka languluka pa byobyo byambo byo twatanga. Kukosako ko tuba kubayisha maana etu, kukosesha lwitabilo lwetu, kabiji ne kwitukosesha ku mupashi. (Mana. 2:3-5) Onkao mambo, byo tukwasha bantu, twikosesha ne atwe bene.—1 Timo. 4:15, 16.
4 Kwingila kimye kyonse mu mwingilo na mukoyo, ke lubaji lwanema bingi lwa “byonse bya nkondo bya Lesa,” byo tukeba pa kuba’mba twimane bakosa kwi Diabola ne ku bademona. (Efi. 6:10-13, 15) Kwikala bapayankana mu mwingilo wazhila kwitukwasha kutesha milanguluko yetu pa bintu bikomeshañana ne kuchinuzhuka konaunwa na ino ntanda ya kwa Satana. (Kolo. 3:2) Byo tufunjisha bantu mashinda a Yehoba, ne atwe bene tuvululwako kimye kyonse kwikala na byubilo byazhila.—1 Pe. 2:12.
5 Lesa Witukosesha: Kyapelako, kwingila mwingilo wa kusapwila, kwitufunjisha kuketekela mwi Yehoba. (2 Ko. 4:1, 7) Byo kyawamapo! Kwikala na luno luketekelo kechi kwitulengelatu kwingila mwingilo wetu konka ne, bino kwitulengela ne kuyuka mwakubila na bwikalo buji bonse bo twakonsha kupitamo. (Fili. 4:11-13) Ee kine, kufunda kuketekela mwi Yehoba kwanema bingi mambo kwitukwasha kuchinchika. (Sala. 55:22) Kusapwila kwitukwasha kuchinchika mu mashinda avula bingi.