Tainga Bantu Muchima—Kupichila mu Kwikala na Mushingi
1 Nangwa kya kuba Yehoba ye Nkambo Walengele Bintu byonse, uji na lusa, uta muchima bantu, kabiji wingila na bantu bambulwakoloka na mushingi. (Nte. 13:14; 19:18-21, 29) Twakonsha kuwamisha mwingilo wetu wa kusapwila mambo awama kupichila mu kulondela Lesa wetu uji na lusa ne na mushingi. (Kolo. 4:6) Mu kino muji bintu byavula bingi kechi kwambatu na mushingi konkatu ne.
2 Ku Nzubo ne Nzubo: Twakonsha kuba byepi umvwe twatana mwina nzubo pa kimye kyabula kufwainwa nangwa kampe wapayankana kya kukankalwa kwisamba nanji? Twafwainwa kuyuka bukiji bukiji amba wapayankana, kabiji ne kukepeshako bya kwamba nangwa kumubulatu amba tusakwiyako kimye kikwabo. Kabiji mu mushingi kechi tukanjikizha bantu kutambula mabuku umvwe bakana ne. Kuta bantu muchima kuketukwasha ne kumwesha mushingi ku bintu bya bena nzubo, nabiji kunemeka bintu byo twatana pa nzubo ne kwibisha byonse byonka byo twaji kwibitana kabiji ne kufunjisha baana betu kuba byonkabyo. Kabiji twafwainwa kumona amba mabuku onse o twasha pa nzubo pabula bantu kechi aji patoka pa kukonsha kwiamona ku bantu babena kupitañana ne. Ee kine, kwikala na mushingi kuketukwasha kuba na bantu byonka byo twakonsha ne atweba kukeba bantu kwitubila.—Luka 6:31.
3 Mu Mwingilo wa mu Mukwakwa: Kimye kyo tuji mu mwingilo wa mu mukwakwa, twakonsha kumwesha mushingi kupichila mu kubula kwimana mu mukwakwa ne kuzhikijila bantu babena kupita nangwa kwimena kulutwe ya ba bantu babena kuba busulu ne. Tukayukanga byo baji bantu, kabiji ne kukebatu kwisamba na boba bajiko na kimye kicheche mu kifulo kya boba baji mu lubilo. Kimye kimo, twakonsha kwamba na jiwi jasansukako pa kuba’mba bantu betumvwe umvwe mu mukwakwa muji kyongo. Nangwa byonkabyo, twafwainwa kwikyuba na mushingi, kechi kukeba kwimwesha ne.—Mat. 12:19.
4 Kimye kya Kusapwila pa Nkito: Kulangulukilako bakulumpe ba nkito kuketulengela kuchinuzhuka kwingijisha kimye kya nkito kubilamo busapwishi bwetu. Nangwa byonkabyo, umvwe kimye kyamweka, nabiji kimye kya pachaile nangwa kimye kya kukokoloka, mu busapwishi bwa kushukilwa mwakonsha kufuma bintu byawama bingi. Bantu bavula bo twingila nabo kwa kubula nangwa kuzhinaukatu ne, bakatemwa bingi kwibabikapo pa mutanchi wa bantu batambulako magazini kimye kyonse. Kwisamba na bakulumpe benu ba nkito mu mushingi mambo awama, kukemushinkwila jishinda ja kwimuswisha kuya na kutanwa ku kupwila kwa nkambi moba onse asatu kwikalako pa mwaka pa mwaka. Kupichila mu kwikala na lusa, kulangulukilako bantu, ne na mushingi mu ae mashinda apusana pusana, tulondela Lesa wetu uji na mushingi, aye Yehoba.