Kupwila kwa Kijiiji Kubena Kwiya

Twakonsha kwikala byepi bakosa ku boba bakanya mpopwelo ya kine? Twakonsha kushinda byepi mikiika yonse Satana yo aleta mu kwitweseka kuba’mba tubwele ku ntanda yanji? Kupwila kwa kijiiji kwa mwaka wa mwingilo wa 2009 kukakumbula bingi bulongo ano mepuzho. Kishina kya kuno kupwila ke kya kuba’mba, ‘Shindainga Bubi na Byawama.’ (Loma 12:21) Akimonai bintu byawama bibena kwitupembelela pa kuno kupwila kwa moba abiji.

Mukulumpe wa nkambi ukamba pa majashi a kuba’mba, “Tukoseshiwa Kushinda Bubi na Byawama,” “Kange Mukizhemo Kwiketekela Ne!,” “Katatakatu Bubi Bonse Bukapwe!,” ne “Kukosesha Lwitabilo Lwetu Kuba’mba Twipashinde Panopantanda.” Mukulumpe wa kijiiji ukamba pa bishina bya kuba’mba, “Kino kyo Kimye kya Kwikala Bakulaba ne Kukenkenta!,” kufuma mu Loma 13:11-13, ne “Kange Mulefulwe mu Juba ja bya Malwa Ne,” kufuma mu Byambo bya Mana 24:10. Kabiji tubena kutengela jashi ja mukulumpe wa kijiiji ja kuba’mba, “Kwambapo pa Bibena Kukebewa mu Kijiiji.” Jashi jikwabo jiketutundaika, ke ja kuba’mba, “Nanchi Mwakonsha ‘Kutesha Muchima pa Mwingilo’—Kupichila mu Kwingilako Bupainiya Nyi?” Mutwe mutanshi wa majashi a kushilañana ke wa kuba’mba, “Imanai Saka Mwakosa ku bya Bujimuku bya Diabola.” Uketukwasha kuyuka ne kukana mashinda a bujimbijimbi a kwa Satana mu bya kulengalenga, kisangajimbwe ne sukulu. Jashi ja kushilañana jiji na mutwe wa kuba’mba, “Ikalai na Bulume bwa Kumukana Satana mu Jino Juba Jibi,” jiketumwesha bya kwingijisha bulongo lujimuno lwafuma kwi Lesa lutanwa mu Efisesa 6:10-18.

Mu kusapwila mambo a Bufumu mwavwangwa ne kushinda bubi aku butendekatu. (Lum. 12:17) O ene mambo Satana o aubila ne nuu na kulukuka Bakamonyi ba kwa Yehoba! (Isa. 43:10, 12) Pano bino, Diabola ukapulwilamotu mabula mambo twafuukulapo kutwajijila ‘kushinda bubi na byawama.’ Nengezhai kuba’mba mukatanweko ne kumwenamo pakatampe mu bipungu byonse bina bya kuno kupwila kwa kijiiji.