BYAFWAINWA KWIKALA BENA KILISHITU
Ingilainga na Lusekelo Mwingilo wa Kusapwila Mambo Awama
Nanchi mwingilo wa kusapwila wimukatazha nyi? Bavula twakonsha kuswa. Mambo ka? Kampe mu nyaunda mo tusapwila muji bantu bakana nangwa bakanama, nangwa kampe tuchina kwisamba na bantu bo twabula kuyuka. Bintu bya uno mutundu byakonsha kwitulengela kubula kwingila mwingilo wa kusapwila na lusekelo. Bino Lesa ye twingijila ye Lesa wa lusekelo ukeba’mba tumwingijilenga na lusekelo. (Sl 100:2; 1Ti 1:11) Ñanyi bishinka bisatu byafwainwa kwitulengela kwingila na lusekelo mwingilo wa kusapwila?
Kitanshi, tusapwila bantu byambo bibalengela kwikala na luketekelo. Bantu bavula bapelelwa. Twibalengela kwikala na luketekelo inge twibasapwila “mambo awama a bintu byawama.” (Is 52:7) Mambo awama a Bufumu bwa Lesa ne atweba etuletela bingi lusekelo. Saka mukyangye kuya na kusapwila, langulukainga pa bintu byawama bikoba Bufumu bwa Lesa pano pa ntanda.
Kya bubiji, mambo awama o tusapwila akwasha bantu kwikala bulongo lonka luno ne kwikala balunda ne Lesa. Inge baleka bwikalo buncha, bekala na luketekelo lwa kukekala myaka ne myaka. (Is 48:17, 18; Lo 1:16) Mwingilo ye twingila wa kupulusha bantu. Nangwa kya kuba bantu bamo bakana kwibapulusha, atweba tutwajijila na kukeba babena kukeba kupuluka.—Mat 10:11-14.
Kya busatu, mwingilo wetu wa kusapwila wanema bingi mambo utumbijika Yehoba. Lesa wanemeka bingi mwingilo wetu. (Is 43:10; Heb 6:10) Witupa mupashi wanji wazhila witukwasha kwingila bulongo uno mwingilo. Onkao mambo, lombainga Yehoba emulengele kwingilanga na lusekelo, mambo lusekelo ke kipangwa kya mupashi wazhila. (Nga 5:22) Uketukwasha kusapwila na mukoyo ne kubula kukizhamo kwikala na bijikila. (By 4:31) Tukengilanga na lusekelo nangwa kya kuba mu nyaunda yetu muji bantu bakatazha.—Ezi 3:3.
Mwafuukulapo kwingilanga byepi mwingilo wa kusapwila? Mwakonsha kumwesha byepi lusekelo lwenu?
TAMBAI VIDYO WA KUBA’MBA, KUTANGA MAMBO A LESA NE KULANGULUKA LANGULUKAPO KUKEMULENGELA KWINGILANGA NA LUSEKELO, APA BINO MUKUMBULE ANO MEPUZHO:
Mambo ka o twafwainwa kutela muchima pa kutanga mambo a Lesa nangwa kya kuba tusapwila maola avula pa ñondo pa ñondo?
Twafunjilako ka kwi Mary?
Ñanyi kimye kyo mulanguluka languluka pa Mambo a Lesa?
Ñanyi kintu kimusangajika bingi pa kusapwila mambo awama?