BYAFWAINWA KWIKALA BENA KILISHITU
Ene Mambo Kusapwila ne Kufunjisha o Kwanemena pa Kukwasha Bantu Kwikala Baana ba Bwanga
Yesu wakambizhe baana banji ba bwanga kuya na kufunjisha bantu kwikala baana ba bwanga. (Mat 28:19) Kuba bino kwavwangamo kusapwila ne kufunjisha. Onkao mambo, atweba bonse twafwainwa kwiipuzhanga kimye kyonse amba: ‘Nakonsha kuwamishako byepi mashinda a kwingijilamo mwingilo wa kusapwila ne kufunjisha bantu kwikala ke baana ba bwanga?’
KUSAPWILA
Kechi twafwainwa kupembelela bantu kwiya kwi atweba ne, atweba yetu twafwainwa kuya na kukeba bantu ‘bafwainwa.’ (Mat 10:11) Inge tuji mu mwingilo wa kusapwila, nanchi tusapwila ku ‘muntu yense ye twataana nyi’? (By 17:17) Lidiya waikele mwana wa bwanga na mambo a kuba’mba mutumwa Paulo wasapwilanga na mukoyo.—By 16:13-15.
“Byalai nkunwa yenu lukelo kabiji mabanga kange mwikaletu ne” (Mus 11:6)
TAMBAI VIDYO WA KUBA’MBA TWAJIJILAI KUSAPWILA “KWA KUBULA KULEKA”—BUSAPWISHI BWA KUSHUKILWA NE KU NZUBO KU NZUBO, APA BINO MUKUMBULE ANO MEPUZHO:
Mu bintu byo aubanga pa juba pa juba, Samuel wamwesheshe byepi amba wateleko bingi muchima kubyala nkunwa ya bukine?
Mambo ka o twafwainwa kwingilako na mukoyo mu mwingilo wa kusapwila ne kufunjisha?
Bañanyi bo mwafwainwa kusapwilako mambo a Bufumu kimye kyo mubena kwingila mingilo yenu ya pa juba pa juba?
KUFUNJISHA
Pa kuba’mba tukwashe bantu kwikala baana ba bwanga, twafwainwa kwibikako bingi kechi kupatu bantu mabuku ne. Pa kuba’mba tukwashe bantu kwikala balunda ne Yehoba, twafwainwa kubwelangako ne kwibafunjisha Baibolo. (1Ko 3:6-9) Pano twakonsha kuba byepi inge muntu ye tufunjisha bukine bwa Bufumu kechi ubena kupimpula byubilo byanji ne? (Mat 13:19-22) Twafwainwa kutwajijila na kukeba bantu baji na muchima uji nobe “mushiji wawama.”—Mat 13:23; By 13:48.
“Amiwa nabyajile, Apolosa watekezhe, bino Lesa ye wiikomeshenga” (1Ko 3:6)
TAMBAI VIDYO WA KUBA’MBA TWAJIJILAI KUSAPWILA “KWA KUBULA KULEKA”—KU MPUNZHA KUTAANWA BANTU BAVULA NE KUFUNJISHA BANTU KWIKALA BAANA BA BWANGA, APA BINO MUKUMBULE ANO MEPUZHO:
Ba Solomon ne ba Mary batekezhe byepi nkunwa ya bukine mwi Ezekiel ne Abigail?
Ñanyi kintu kyo twafwainwa kuvulukanga pa kusapwila mu mbaji yonse ya mwingilo wetu ne mu mapunzha mutanwa bantu bavula?
Twakonsha kutako byepi muchima kufunjisha bantu bukine?