Nkondo Ilengela Bantu Kwakamwa
Mu byalo muji nkondo bantu bamanama bingi. Bashilikale ne bantu babula bashilikale bapitapo mu nkondo bemwena bene bya malwa bifumamo.
BASHILIKALE
Ba Gary bekala ku Britain baambile’mba: “Bantu bo bepaya mu nkondo ne bo bakozha bavula bingi. Kino kitulengela kwakamwa ne kubula kuzhikijilwa.”
Ba Wilmar bekala ku Colombia baambile’mba: “Bandozele mu nyuma ne ku meso kabiji namwene bantu bavula bo baipayile kuvwangakotu ne banyike ne bakote. Nkondo ilengela muntu kukanama.”
Ba Zafirah bekala ku United States baambile’mba: “Inge washinkwapo po balozela muntu, ukalangulukangapo ne kumvwa jibingo janji. Uno muntu kechi ukamuvulama ne.”
BABULA BASHILIKALE
Ba Oleksandra bekala ku Ukraine baambile’mba: “Nalangulukanga’mba kechi nkekalapo na lusekelo jibiji ne. Nachinanga bingi kufwa kabiji naakaminwe bingi amba kampe balongo bami nangwa balunda nami bakebepaya.”
Ba Daler bekala ku Tajikistan baambile’mba: “Twajinga bingi na moyo mambo twaimananga mu munongo wa kajo kutendeka 2 koloko wa ku makya kufika 11 koloko wa bufuku kabiji twayukile’mba bakonsha kwituloza ku muntu yense walwilengako nkondo.”
Ba Marie bekala ku Rwanda baambile’mba: “Bansemi bami bebepayile mu kimye kya nkondo. Na mambo a nkondo nashajile mwana wa kishale kabiji kechi najingapo na muntu nangwa umo wa kuntekenesha ne.”
Nangwa kya kuba bano bantu bamanamine bingi mu kimye kya nkondo, bataana lutekenesho. Ne kyakilapo kunema, bashiinwa’mba nkondo ne bukapondo katatakatu bikapwe. Mu kino Kyamba kya Usopa tusakwingijisha Baibolo kulumbulula kino byo kikamweka.