Yehoba byo Etukwasha Kuchinchika

1. Mambo ka o twafwainwa kutwajijila kuchinchika, kabiji ñanyi winengezha kwitukwasha? (1 Petelo 5:10)

BANTU ba Yehoba bafwainwa kutwajijila kuchinchika mambo tubena kwikala mu moba a kupelako akatazha bingi. Bamo babena kukolwa bikola bibula kupwa. Bakwabo bafwisha batemwe babo. Kabiji bakwabo babena kwibamanyika ku ba mu kisemi nangwa ku ba mu kafulumende. (Mat. 10:18, 36, 37) Mwane yukai’mba Yehoba winengezha kwimukwasha kuchinchika mu makatazho onse o mwakonsha kupitamo.​—Tangai 1 Petelo 5:10.

2. Bulume bukwasha bena Kilishitu kuchinchika bufuma kwepi?

² Kuchinchika kulumbulula kutwajijila kwikala bakishinka kwi Yehoba inge tubena kupita mu makatazho, babena kwitumanyika, nangwa tubena kupita mu meseko. Atweba bena Kilishitu kechi tuchinchika mu bulume bwetu ne. Pa kuba Yehoba ye witukwasha kuchinchika, mambo ye witupa “bulume bwakila bwa bantu.” (2 Ko. 4:7) Mu uno mutwe, tusakwisamba pa bintu bina bitupa Yehoba bitukwasha kuchinchika. Kabiji tusakumona ne byo twafwainwa kuba pa kuba’mba bino bintu bitukwashenga.

LULOMBELO

3. Mambo ka o twakonsha kwambila’mba lulombelo ke kya kukumya kitupa Yehoba?

³ Yehoba witupa kintu kya kukumya kitukwasha kuchinchika. Wituswisha kwisamba nanji nangwa kya kuba twibandengamambo. (Hebe. 4:16) Akikilangulukaipotu: Twakonsha kulomba kwi Yehoba pa kimye kiji kyonse ne pa bintu biji byonse byo tukeba. Umvwa milombelo yo tulomba mu mulaka uji yense konse ko tuji, nangwa inge tuji kwa bunke bwetu nangwa mu kaleya. (Yona 2:1, 2; Byu. 16:25, 26) Inge twaikala na bijikila kya kuba ke tukankalwe ne kumubuula byo tubena kumvwa ku muchima, Yehoba uyuka byo tukeba kwamba. (Loma 8:26, 27) Kinetu, lulombelo ke kya kukumya kitupa Yehoba.

4. Mambo ka o twakonsha kwambila’mba milombelo yetu ya kwitukwasha kuchinchika yakwatankana na kyaswa muchima wa Yehoba?

⁴ Yehoba witulaya mu Mambo anji kuba’mba “kintu kyonse kyo twakonsha kumulomba mwayila kyaswa muchima wanji, aye witumvwa.” (1 Yoa. 5:14) Nanchi twakonsha kulomba Yehoba kuba’mba etukwashe kuchinchika nyi? Ee, mambo kuba bino kwakwatankana na kyaswa muchima wanji. Mambo ka o twaambila bino? Inge twachinchika meseko, tulengela Yehoba kukumbula Satana Diabola umwendeleka. (Maana 27:11) Kikwabo, Baibolo waamba’mba “Yehoba ukebesha kumwesha bulume bwanji na mambo a boba bamuketekela na muchima wabo yense.” (2 Moba 16:9) Onkao mambo, twafwainwa kushiinwa’mba Yehoba uji na bulume kabiji ukebesha kwitukwasha kuchinchika.​—Isa. 30:18; 41:10; Luka 11:13.

5. Lulombelo lwitukwasha byepi kwikala na mutende wa mu milanguluko? (Isaya 26:3)

⁵ Baibolo waamba’mba inge twalomba kufuma panshi ya muchima pa makatazho o tuji nao, ‘mutende wa Lesa wakila milanguluko ya bantu ukalama michima ne milanguluko yetu.’ (Fili. 4:7) Akilangulukai pa mwatala bino byambo. Bantu babula kwingijila Yehoba nabo bapita mu makatazho kabiji beseka mashinda apusana pusana pa kuba’mba bekale na mutende wa mu milanguluko. Bamo balondela musango wa kulanguluka languluka pa bintu wibalengela kuleka kulanguluka pa bintu biji byonse, kuvwangakotu ne makatazho o babena kupitamo. Kuba bino kwakonsha kubika bulunda bwetu ne Yehoba mu kizumba. (Esakanyaiko Mateo 12:43-45.) Mutende witupa Yehoba inge twalomba kwi aye wakila mutende wikala na bantu bengijisha jino jishinda kuba’mba balubeko makatazho abo. Inge twalomba kwi Yehoba, tumwesha’mba twaketekela mwi aye na muchima wetu yense, kabiji witupa “mutende wa myaka ne myaka.” (Tangai Isaya 26:3.) Jishinda jimo Yehoba jo obilamo bino ke kwitukwasha kuvuluka bukine bo twafunda mu Mambo anji. Bukine buji mu Binembelo bwitukwasha kushiinwa’mba Yehoba witutemwa ne kwituta muchima. Kino kitulengela kwikala na mutende wa mu milanguluko.​—Sala. 62:1, 2.

6. Mwafwainwa kuba byepi pa kuba’mba lulombelo lwimukwashenga? (Monai ne kipikichala.)

⁶ Byo mwafwainwa kuba. Inge ke mupite mu makatazho, buulainga Yehoba mu lulombelo byo mubena kumvwa ku muchima. ‘Twikai Yehoba kisendwa kyenu’ ne kumulomba’mba emupe mutende. (Sala. 55:22) Kabiji lombai Yehoba kwimupa maana a kwimukwasha kuyuka bya kuba na makatazho o mubena kupitamo. (Maana 2:10, 11) Byo mubena kulomba Yehoba kwimukwasha kuchinchika, kange mulubengako kulomba milombelo ya kusanta ne. (Fili. 4:6) Pa juba pa juba, monainga Yehoba byo abena kwimukwasha ne kumusanchila. Makatazho kange emulengelenga kubula kumona bintu byawama Yehoba byo abena kwimubila ne.​—Sala. 16:5, 6.

MAMBO A LESA

7. Kufunda Mambo a Lesa kwitukwasha byepi kuchinchika?

⁷ Yehoba witupa Mambo anji etukwasha kuchinchika. Mu Baibolo muji byepelo byavula bingi bitulengela kushiinwa’mba Yehoba uketukwasha. Akilangulukai pa byaamba kinembelo kya Mateo 6:8. Kyaamba’mba: “Shenu wayuka bintu byo mukeba saka mukyangye ne kumulomba.” Yesu ye waambile bino byambo kabiji wamuyuka bingi bulongo Yehoba kukila muntu uji yense. Onkao mambo, twashiinwa kuba’mba inge tubena kupita mu bya malwa, Yehoba wayuka byo tukeba kabiji uketukwasha. Mu Baibolo muji milaye ya Yehoba itukwasha kuchinchika inge tubena kupita mu makatazho.​—Sala. 94:19.

8. (a) Ambaipo jifunde jimo ja mu Baibolo jakonsha kwitukwasha kuchinchika? (b) Ñanyi kintu kyakonsha kwitukwasha kuvuluka mafunde a mu Baibolo akonsha kwitukwasha kuchinchika?

⁸ Mafunde a mu Baibolo etukwasha kuchinchika. Kabiji muji maana etukwasha kufuukula bintu bulongo. (Maana 2:6, 7) Yehoba witutundaika kutwajijila kuketekela mwi aye, kechi kwakamwa pa bintu bikamweka kulutwe ne. (Mat. 6:34) Inge ke tutange Binembelo kimye kyonse ne kulanguluka langulukapo, kiketukwasha kuvuluka mafunde akonsha kwitukwasha kwesakana na lukatazho lo tubena kupitamo.

9. Mashimikila a mu Baibolo etukwasha byepi kuketekela mu bukwasho bwa Yehoba?

⁹ Kabiji mu Baibolo muji mashimikila a bantu baketekejile mwi Yehoba bo akwashishe. (Hebe. 11:32-34; Yako. 5:17) Kulanguluka languluka pa ano mashimikila kwitulengela kuketekela’mba Yehoba “ye kya kufyamamo kyetu kabiji bo bulume bwetu bwitukwasha kimye kyonse kyo tupita mu bya malwa.” (Sala. 46:1) Kulanguluka pa byapichilemo bakalume ba Yehoba ba kishinka bajingako kala, kwitulengela kulondela lwitabilo lwabo ne byo bachinchikile.​—Yako. 5:10, 11.

10. Ñanyi bintu byo mwafwainwa kubanga pa kuba’mba Mambo a Lesa emukwashenga?

¹⁰ Byo mwafwainwa kuba. Tangainga Baibolo pa juba pa juba, ne kunemba byepelo byo mwamona’mba byakonsha kwimukwasha. Bavula batanga kinembelo lukelo mu kabuku ka Kubalaula Binembelo Moba Onse, kabiji kuba bino kwibakwasha kulangulukapo juba jonse. Nyenga Mariea wataaine kuba’mba kuba bino kwamukwashishe bingi bansemi banji bonse babiiji byo bakolelwe kansa. Ñanyi kintu kyamukwashishe kuchinchika byo ebalaminenga mu bañondo bacheche bashajileko kwikala na bumi? Waambile’mba: “Jonse lukelo natanganga kinembelo mu kabuku ka Kubalaula Binembelo Moba Onse ne kulanguluka langulukapo. Kuba bino kwandengelanga kulanguluka pa bintu byo natanganga ne kunkwasha kutatu muchima pa bintu byawama mu kifulo kya kulangulukangatu pa makatazho o najinga nao.”​—Sala. 61:2.

BAKWETU BA MU LWITABILO

11. Mambo ka o kitutundaikila kuyuka’mba kechi yetu bonka babena kuchinchika makatazho ne?

¹¹ Yehoba witupa balongo ne banyenga mwaya ntanda yonse betukwasha kuchinchika. Kuyuka’mba “bya kumanama bintutu bimo byo bibena kupitamo ne balongo benu bonse baji pano pa ntanda,” kwitulengela kushiinwa’mba kechi yetu bonka ne. (1 Pe. 5:9) Onkao mambo, twashiinwa kuba’mba makatazho onse o twakonsha kupitamo, o makatazho abena kupitamo ne bakwetu, kabiji batwajijila kuchinchika. Kino kibena kulumbulula’mba ne atweba twakonsha kuchinchika.​—Byu. 14:22.

12. Bakwetu bena Kilishitu betukwasha byepi, kabiji ne atweba tuba byepi inge baji na makatazho? (2 Kolinda 1:3, 4)

¹² Bena Kilishitu bakwetu betukwasha kuchinchika inge tubena kupita mu makatazho. Mutumwa Paulo wayukile’mba kino kishinka. Javula wasanchilanga boba bamukwashishenga ne kwibatongola pa mazhina. Byo bamukainye kufuma pa nzubo, Paulo bamutekeneshe, kumutundaika ne kumupa bintu byo akajilwe. (Fili. 2:25, 29, 30; Kolo. 4:10, 11) Ne lelo jino, balongo ne banyenga betukwasha kuchinchika inge tubena kupita mu makatazho. Kabiji ne atweba twibakwasha inge babena kupita mu makatazho.​—Tangai 2 Kolinda 1:3, 4.

13. Ñanyi kintu kyakwashishe nyenga Maya kuchinchika?

¹³ Nyenga Maya wikala mu kyalo kya Russia bamutundaikile bingi ku balongo ne banyenga. Mu 2020, bakapokola bapikichile mu nzubo yanji, ne kutendeka kumutotolwesha na mambo a kubuulako bakwabo bintu byo aitabilamo. Nyenga Maya waambile’mba: “Kino byo kyamwekele nakakijilwe bingi, bino balongo ne banyenga bantuminanga mafoni ne makalata a kumbula kuba’mba bantemwa bingi. Kufumatu ne kala, nayukile kuba’mba balongo ne banyenga bantemwa bingi kabiji twi kisemi. Pano bino kufumatu mu 2020, nemwena kabiji nashiinwa kuba’mba kino kya kine.”

14. Bena Kilishitu bakwetu bakonsha kwitukwasha byepi kutwajijila kuchinchika? (Monai ne kipikichala.)

¹⁴ Byo mwakonsha kuba. Kutwajijila kupwanañana na balongo ne banyenga kukemukwasha kuchinchika meseko. Kange mukankazhamenga kubuula bakulumpe mu kipwilo kwimukwasha ne. ‘Bakekala nobe kya kufyamamo pa kwiya kipupu, kabiji nobe mpunzha ya kufyamamo pa kwiya mvula wa kinkunkwila.’ (Isa. 32:2) Kabiji vulukainga’mba bena Kilishitu bakwenu nabo babena kuchinchika makatazho apusana pusana o babena kupitamo. Kukwashapotu nangwa umo kukemulengela kwikala na mweno yawama ikemukwasha kutwajijila kuchinchika.​—Byu. 20:35.

LUKETEKELO

15. Luketekelo lukwasha byepi bakalume ba Lesa bakishinka, kuvwangakotu ne Yesu? (Bahebelu 12:2)

¹⁵ Yehoba witupa luketekelo lwa kine lwitukwasha kuchinchika. (Loma 15:13) Vulukai’mba luketekelo lwakwashishe bingi Yesu kuchinchika pa juba japeleleko mu bwikalo bwanji pano pa ntanda. (Tangai Bahebelu 12:2.) Yesu wayukile’mba inge watwajijila kwikala wa kishinka, ukazhijika jizhina ja Yehoba. Kabiji Yesu watonganga bingi kubwela kwi Shanji mwiulu ne kulama pamo na balongo banji bashingwa mu Bufumu bwa Lesa mwiulu. Ne atweba kyo kimotu, luketekelo lwetu lwa kukekala myaka ne myaka mu ntanda ipya lwitukwasha kuchinchika meseko apusana pusana o tubena kupitamo mu ino ntanda ya kwa Satana.

16. Luketekelo lwakwashishe byepi nyenga umo kuchinchika, kabiji ñanyi bintu byo mwafunjilako ku byo aambile?

¹⁶ Akilangulukai pa luketekelo byo lwakwashishe nyenga Alla wikala mu kyalo kya Russia, kimye bamwatawanji kyo bebakashile mu kaleya byo bapembelejilenga kwibatotolwesha. Ba Alla baambile’mba: “Kulomba ne kulanguluka languluka pa bintu byawama bitulaya Yehoba kwankwashishe kubula kukizhamo kukakilwa. Nayuka kuba’mba nangwa mbena kupita mu ano makatazho, kulutwe akapwa. Yehoba ukashinda balwanyi banji ne kwitufweta.”

17. Twakonsha kumwesha byepi amba tusanta pa luketekelo lwitupa Yehoba? (Monai ne kipikichala.)

¹⁷ Byo mwakonsha kuba. Langulukainga pa bintu byawama bitulaya Yehoba biji kulutwe. Fwanyikizhainga muji mu ntanda ipya ya Lesa kabiji mubena kwiyowa ano mapesho. Inge ke mube bino, makatazho o mubena kupitamo akamwekanga’mba ‘apa kakimye kacheche, kabiji apela.’ (2 Ko. 4:17) Kabiji buulaingako bakwenu bintu byo mwaitabilamo. Fwanyikizhainga bwikalo byo bwakatazha ku bantu babula luketekelo lwa bintu byawama bitulaya Lesa biji kulutwe. Nangwa kwisambatu nabo byambo bicheche, kwakonsha kwibalengela kukeba kufunda pa Bufumu bwa Lesa ne milaye yanji.

18. Mambo ka o twafwainwa kuketekela mu milaye ya Yehoba?

¹⁸ Byo achinchikile meseko avula, Yoba waambijile Yehoba amba: “Pano nayuka namba anweba mwakonsha kuba bintu byonse, kabiji kafwako kintu kyo mwafuukula kuba kyo mwakonsha kukankalwa ne.” (Yoba 42:2) Yoba washiinwe’mba kafwako kintu nangwa kimo kyakonsha kulengela Yehoba kukankalwa kufikizha milaye yanji ne. Ne atweba kuyuka kino kishinka kwitukwasha kuchinchika. Pa kuba’mba tumvwishe kino kishinka, fwanyikizhai mwanamukazhi wakolwa kabiji waakamwa bingi na mambo a kuba’mba badokotala bavula bakankalwa kumubuka. Bino dokotala wayuka mingilo kabiji ye baketekela bingi, byo amupima wataana kikola kyo aji nakyo, ne kumulumbulwila byo asakumubuka. Uno mwanamukazhi waumvwa bulongo nangwa kya kuba pakapita moba avula pa kuba’mba bamubuke. Kino kyakonsha kumulengela kuchinchika mambo wayuka’mba juba jimo ukabukwa. Ne atweba kyo kimotu, luketekelo lwetu lwa bintu byawama bikekala mu Paladisa lwitulengela kuchinchika.

19. Ñanyi bintu byakonsha kwitukwasha kuchinchika?

¹⁹ Byonka byo twafunda, Yehoba witukwasha kuchinchika meseko kupichila mu lulombelo, Mambo anji, bakwetu ba mu lwitabilo ne luketekelo. Inge ke twingijishe bulongo bino bintu byo etupa, Yehoba uketukwasha kuchinchika makatazho onse o twakonsha kupitamo, kufikatu ne kimye kyo afumyapo makatazho onse aji mu ino ntanda mwaangela Satana.​—Fili. 4:13.