Masawakya A Bibena Kumweka Mwaya Ntanda

Bapapo Bakwabo byo Bakopolola

Nangwa kya kuba Intaneti kechi beingijisha ku bantu bavula baji mu kyalo kya Cuba ne, bino luno kyapela mambo a kampanyi ka mafoni kashinkula mashitolo mo bakwasha bantu kushikula intaneti. Kuba bino pataiwa mali avula bingi. Onkao mambo, pa kukwasha balongo kumwenamo mu biji pa jw.org, musampi watundaikile bipwilo kutongolapo musapwishi umo wa kukopolola mabuku, byo batangila jimo ne mavidyo pa Keyala wetu ne kupako Bakamonyi bakwabo mu bipwilo bikwabo. Luno lunengezho lubena kwingila bingi bulongo.

Banemeka Nzubo ya Bufumu Kukila Foni

Teona uji na myaka 10 ne nkasanji Tamuna uji na myaka itanu na isatu bekala mu kyalo kya Republic of Georgia. Bano banyike babakazhi bakebelenga kwikala na foni. Pa kuba’mba bapote foni, bankambo yabo babakazhi bebalayile kwibapangapo mali a peshonyi o batambulanga pa ñondo pa ñondo. Kyataminekotu bankambo yabo bafwile. Nangwa byonkabyo, ba mu kisemi bapele mali a peshonyi apeleleko bano banyike babakazhi babiji kuba’mba bapote foni. Byo balangulukilepo, bano banyike babiji banembejile nkalata kipwilo amba: “Twayuka kuba’mba kwashalatu milungu ibiji mwingilo wa kushimika Nzubo ya Bufumu kutendeka mu uno muzhi wetu wa T’erjola. Bankambo babakazhi bakebelenga bingi kwingilako uno mwingilo. Onkao mambo, twafukulapo kubula kupota foni kuba’mba tupane ano mali apelako asha Bankambo a peshonyi ku kipwilo. Tushimikilai Nzubo ya Bufumu yawama!”

Baibolo wa Binembelo bya Kingiliki mu Mulaka wa Tetum

Pa 17 January mu 2014, ba Geoffrey Jackson ba mu Jibumba Jitangijila balupwile Baibolo wa Binembelo bya Ntanda Ipya bya Kingiliki bya Bwina Kilishitu mu muzhi wa Dili mu Timor-Leste, mu mulaka wa Tetum. Uno ye mulaka ye bamba bantu bavula mu kino kyalo. Saka bakyangye kulupula uno Baibolo, kwajingatu Baibolo wa Binembelo bya Kingiliki wa Bakatolika wa mu mulaka Tetum ye bakananga kupotesha Bakamonyi ba kwa Yehoba nangwa bantu bo balangulukanga’mba bafunda na Bakamonyi. Nangwa byonkabyo, Baibolo watuntulwile Bakatolika kechi wawama ne, mambo bashamo byambo bimo, muji byambo bya kala, kechi ba mu pulinta bulongo ne kabiji byambo bimo bebituntulwilatu mungi. Bino Baibolo wa Binembelo bya Ntanda Ipya aye wapusanako bingi. Ba Darren bamishonale mu muzhi wa Timor-Leste baambile’mba: “Bavula bamba mulaka wa Timorese batanga Baibolo wa Binembelo bya Ntanda Ipya bamutemwa bingi mambo watuntululwa bulongo kabiji ponkapotu bakeba kwikala na uno Baibolo wa kyabo kyabo. Wapela bingi kumutanga kabiji basanta mambo byambo byabaya bulongo, nangwatu bavula bekala mu mazubo mwabula malaichi kibapelela bingi kumutanga. Bavula batambula uno Baibolo babena kufunda Baibolo.”

‘Yehoba Wanemeka Bingi’

Mu January mu 2014, jibumba ja bantuntuluzhi ba mulaka wa Romany, mulaka ye bengijisha mu Macedonia, jatendekele mwingilo wanema bingi. Balengele jibumba ja bantuntuluzhi, kabiji bebaswishe ne kutatula kutuntulula mabuku, kechi mu mulaka wa Romany yenkatu ne, bino ne mulaka wa Cyrillic. Kuba bino kwakwasha bingi bantu bamba mulaka wa Romany bapijilwa kwingijisha mulaka wa Cyrillic, mulaka ye bengijisha mu kyalo kya Macedonia.

Bantu bavula bamba mulaka wa Romany batemwa bingi jibumba ja Yehoba byo jatendeka kunemba mabuku a mu mulaka wabo. Nyenga umo waambile’mba: “Na mambo a kuba’mba ñamba mulaka wa Romany, bantu babikoba bingi bandengulula, bino namusanchila bingi Yehoba pa byo anemeka ne kumpa mabuku a mu mulaka wami. Kino kyandengela kufwenya kwipi ne aye.”

Lutangijilo lwa Katataka

Pa 1 February mu 2014, ofweshi wa musampi wa mu United States watendekele kutangijila mwingilo mu bipwilo bya pa jikuji ja Jamaica ne ja Cayman Islands. Basapwishi kukila pa 1.2 milyonyi bakwatankana bingi mu nyaunda ya musampi wa United States. Nyaunda ya uno musampi muji byalo 50 bya mu United States, ne kyalo kya Bahamas, Bermuda, British ne makuji a Virgin Islands aji mu United States, Puerto Rico, ne makuji a Turks ne Caicos Islands.

Bapainiya mu Japan

Balongo ne banyenga ba mu Japan batwajijila kwingila na kizaku mwingilo wa bupainiya, kabiji nambala ya bapainiya yabaya bingi mu kino kyalo kyazhokolokwa na kalunga ka mema. Kino kyo kyalo kya buna mwavula bingi bapainiya pano pa ntanda ponse. Ku ntendekelo ya mwaka wa mwingilo wa 2014, balongo ne banyenga 2,646 batendekele mwingilo wa bupainiya ne kulengela kibelengelo kufika ku 65,668. Mu March mu 2014 basapwishi kukila pa kichika bobaingijileko mwingilo wa bupainiya.