“Mwi Bantu Bawama Bingi Kwikala Nabo Kipi Kipi”

PA 7 ne 8 May, 2016, bantu bavula baikele na kupembelela mu kibamba mufikila bantu pa ofweshi mukatampe wa ntanda yonse uji pa 25 Columbia Heights, Brooklyn, New York. Nangwa kya kuba ba pa Betele kechi bengila pa Kibelushi ne, bino pa joja juba baingijilenga kabiji baichile bantu bekala kipi kipi na Betele kuba’mba beye na kutamba Mabaibolo a kala o batanchikile.

Mukwekele wa kwita bantu washimwine bukamonyi ku bantu bekala kipi kipi kabiji wakoseshe lwitabilo lwa boba baingijile uno mwingilo. Byambo byaambile bantu bekala kipi kipi na Betele bitutundaikile bingi.

Mwanamulume umo waambile’mba: “Naikala mu mazubo apusana pusana (aji ku bwipi na Betele) kufuma mu 1960, nemwena kuba’mba mwi bantu bawama bingi kwikala nabo kipi kipi.”

Mwanamukazhi umo naye waambile’mba: “Kwa kubula anweba, ino mpunzha inge kechi yawama ne. Kyawama bingi pa kwikala nenu kipi kipi pa ino myaka yonse.”

Bapainiya bavula basapwila mu ino nyaunda bomvwa bingi bulongo byo bebatambwila ku bantu. Mwanamulume umo uji mu kabungwe ka bangikazhi mu yoya mpunzha wambile’mba kyatamine bingi mambo kimye bena kengi kyo bakaya na kumona bintu bimo pa musampi aye kechi ukekalako ne.

Mwafumine bintu byawama bingi mu uno mukwekele. Pa mobatu abiji, bantu 48 babula Bakamonyi baishile mu kino kibamba mo batambishenga Mabaibolo. Kimye kyo bashinkwile mu kino kibamba, ba mu kisemi kya Betele bavula batambwijile bantu baishilenga.

Nsongwakazhi wa jizhina ja Sally uji pepi na myaka 30, kechi wafuminemo bukiji mu kino kibamba mo batambishenga Mabaibolo ne. Kimye kyaishile uno nsongwakazhi wataaine bapainiya bamwichile mu kibamba mufikila bantu. Sally waambile’mba kechi wayukile’mba kujipo ko batambisha Mabaibolo ne. Bano bapainiya bamubuujile Sally amba baumvwine bingi bulongo pa kutaanapo nsongwakazhi wafunda bingi wanemekele Baibolo. Sally waambile’mba: “Baibolo ke buku wanema bingi. Baibolo ye bukutu wafwainwa kwitukwasha kuyuka byambo bya Lesa. Witukwasha kwikala bulongo mu bwikalo.”

Sally wambile’mba bintu byo alangukukanga pa Baibolo byamulengejile kufunda Kilatini ne Kingiliki kabiji watemenwe bingi ntuntulwilo. Wayukile’mba Baibolo ye batuntulula bulongo wawama mambo kechi mwikala milanguluko ya bantu ne. Bapainiya byo bamubuujile’mba pa keyala wetu wa jw.org paji mabuku alumbulula Baibolo atuntululwa mu milaka kukila pa 800, wakuminye bingi. Banyenga byo bamubuujile bantuntuluzhi bamo byo bauba na jizhina ja Yehoba wakuminye bingi, kabiji wibepwizhe amba: “Mambo ka jizhina ja Yehoba o bejifumishamo mu Baibolo?” Pa kuya, Sally waambile’mba: “Ino yo nyaunda yo nakomenamo, kabiji mwi bantu bawama bingi kwikala nabo kipi kipi.”

Pa Kimo mu mulungu walondejilepo, ntangi wa bupopweshi umo wayile kwi John wingijila pa Betele waingijilenga busapwishi bwa ku mvula bantu kwingijisha kakutachikapo mabuku ku bwipi na Betele. Uno ntangi wabuujile John byo aumvwine bulongo pa kuya na kutamba Mabaibolo ne pa kuyuka ene mambo o kyanemena kulondela biji mu Baibolo. Nangwa byonkabyo, pa kupwisha kwisamba, waambile’mba, “Nebazhingijila bingi Bakamonyi!” John wakuminye bingi pa kumvwa bino kabiji wamwipwizhe ene mambo o azhingijile. Aye wakumbwile’mba: “Mambo mubena kuvilukako kuno! KECHI MWAFWAINWA KUFUMA KUNO NE! Potai bishimikwa bikatampe nangwa shimikai byonse byo mukeba kushimika, bino kange mufumeko kuno ne. Anweba bantu mwalengela ino nyaunda kuwama. Nazhingila bingi pa kumona’mba mubena kuvilukila ku buyeke!”

Mukwekele wa kwita bantu kwiya na kumona Mabaibolo washimwine bukamonyi mu kimasamasa, kabiji bantu bavula bebalumbulwijile jizhina ja Lesa.