Bamonañene Jikwabo!

Linda: Byo nafikizhe myaka 12, bamama bambuujile’mba nji na nkasami wa mukazhi ye bapaine’mba bakamulame ku bantu bangi. Nalangulukilenga namba kana naye wasemekelwe kamaama nobe amiwa nyi nangwa ne. Nakomejilemotu kwa kubula kumuyuka.

Sally: Amiwa nayukile namba bo bamama bansema, nanchi ne. Bamama bankomeshe, bampumanga bingi ne kundama nobe muzha, kabiji naikalangatu na bulanda ne kumvwa mukose, akino kyandengejile kukilamo kwikala na bulanda mambo nasemekelwetu kamaama. Byo namonañene na Bakamonyi ba kwa Yehoba, natendekele kufunda Baibolo. Bamama byo bayukile’mba mbena kufunda Baibolo, bampumine na mushipi ne kupimpula loko wa ku kinzhilo, banshinkilangatu mu nzubo. Byo nafikizhe myaka 20, nafumine pa nzubo kabiji Bakamonyi bansendele ne kutendeka kundama. Nabatizhiwe mu 2012.

Linda: Natendekele kufunda Baibolo na Bakamonyi ba kwa Yehoba saka nji na myaka 20. Kabiji natanwanga ku kushonkena kwa kijiiji mu Jakarta, kwaikalanga ne bakutuntulula majashi mu mulaka wa kwamba na maboko. Akuno nataaineko bantu bakwabo bakamaama kuvwangakotu ne Sally, nsongwakazhi Kamonyi waikalanga ku North Sumatra. Naumvwañananga bingi na uno nsongwakazhi, pano bino kechi nayukile ene mambo ne.

Sally: Amiwa ne Linda twaikele balunda. Namwene’mba twipasha bingi, pano bino kechi nateleko muchima ne.

Linda: Saka nkyangye kubatizhiwa mu 2012, nakebeshe bingi kuba’mba mmonañane na nkasami ye nabujile kumonapo. Nalombele kwi Yehoba namba, “Mbena kukeba nkamonañane na nkasami pa kuba’mba nkamufunjishe pe anweba.” Kechi papichile ne kimye kyabaya ne, muntu wayukile kwajinga nkasami, watumijile bamama tubyambo pa foni. Kufumatu jonka jino juba, natendekele kwisamba ne Sally.

Sally: Aku Linda umbuulatu’mba yami nkasanji, nakanjijile ndeke kuya ku Jakarta. Byo naikijilenga mu ndeke, namwene Linda, batata, bamama ne kolojami mukwabo wa mukazhi saka bapembela kuntambwila. Natemenwe bingi pa kwibamona. Bonse twikumbachijilemo ne kwifyompa, bamama bampakachijilemo bingi. Bonse twajijilenga. Batata ne bamama byo balombele lulekelo lwa mambo pa kumpana kundama ku bantu bangi, twajijile ne kwipakachilamo jikwabo.

Linda: Na mambo a kubula kukomena pamo, twafwainwe kuyuka biji mukwetu ne byubilo byanji pa kuba’mba twikale bulongo. Pano bino, twitemwa bingi.

Sally: Amiwa ne Linda twikala bonse ne kupwila kipwilo kimo ko bengijisha mulaka wa kwamba na maboko mu Jakarta.

Linda: Amiwa ne Sally kechi twimwenepo pa myaka 20 ne. Twamusanchila Yehoba kuba’mba twamonañana jikwabo!