Ñanyi Ntangi ye Mwafwainwa Kusala?—Baibolo Waambapo’mba Ka?

Mu milungutu icheche, kusakwikala bunsaji mu byalo byavula mwaya ntanda yonse. Bantu babena kulanguluka pa bantangi bo bafwainwa kusala.

Baibolo waambapo’mba ka?

Bantangi ba bantu baji na po bapelela

Baibolo watongolapo bintu bimo bikankwala kuba bantangi bantu.

• “Kange muketekele mu baana ba bamfumu nangwa mu mwana muntu ukabula kukonsha kwimupulusha ne. Mupashi wanji ulupukamo, aye ubwela ku mushiji; pa jonkaja juba milanguluko yanji yonaika.”—Salamo 146:3, 4.

Nangwatu bantangi balama bulongo bantu nabo bafwa. Kabiji kechi bakonsha kuketekela’mba ntangi ukaswanapo ukatwajijila kwingila mingilo yabo yawama ne.—Musapwishi 2:18, 19.

Baibolo waamba’mba bantu kechi bakonsha kwitangijila abo bene ne.

• “Muntu mwine kechi uji na luusa lwa kwitangijila mu jishinda jo afwainwa kuyamo ne.”—Yelemiya 10:23.

Nanchi kuji wakonsha kutangijila bantu bulongo mu ano moba nyi?

Lesa wasala ntangi

Baibolo waamba’mba Lesa wasala ntangi wawama kabiji waketekelwa aye Yesu Kilishitu. (Salamo 2:6) Yesu ye Mfumu wa Bufumu bwa Lesa, kafulumende wa mwiulu.—Mateo 6:10.

Nanchi musakusalapo buntangi bwa kwa Yesu nyi? Baibolo walumbulula ene mambo o twafwainwa kusajila buntangi bwanji:

• “Nemekai mwana, kuchina’mba Lesa wakemuzhingijila ne kuba’mba mubule kufwa, mambo bukaji bwanji bwakonsha kubuuka bukiji. Bo bene ba lusekelo bonse bafyama mwi aye.”—Salamo 2:12.

Kino kyo kimye kyo mwafwainwa kusalapo bya kuba. Bungauzhi bwa mu Baibolo bwamwesha’mba Yesu watendekele kulama mu 1914 ne kuba’mba katatakatu Bufumu bwa Lesa bukafumyepo makafulumende onse a bantu.—Danyela 2:44.

Pa kuba’mba muyuke byo mwafwainwa kutundaika buntangi bwa kwa Yesu, tangai kibaaba kya kuba’mba “Salaipo Kutundaika Bufumu bwa Lesa!”