Bantu Bavula mu Ntanda Babena Kwiumvwa’mba Bajitu Bunke—Mwakonsha Kupwisha Byepi Mukose?

• Ba The U.S. Surgeon General’s Advisory on the Healing Effects of Social Connection and Community byo besambilenga pa kuvula kwa bantu babena kwiumvwa’mba bajitu bunke mu 2023 baambile’mba: “Pepi na kichika kya bantu baji mu U.S. bomvwa bingi mukose ne kwiumvwa’mba bajitu bunke, kabiji bavula pa bano baji na myaka pakachi ka 18 ne 25.”

• Pa 15 November 2023 kipamo kya World Health Organization kyaambile’mba: “Kipamo kya [World Health Organization] kyasala bantu basakukebakeba pa mukose, lukatazho lubena kulengela bantu kubula kwikala na butuntulu bwa mubiji bwawama. Jino jibumba jisakutundaikanga bantu kwisampa bulunda na bantu bakwabo ne kumonapo mashinda mo bafwainwa kupwishisha mukose nangwa kya kuba bekala mu byalo biyanji.”

Baibolo waamba pa mashinda afwainwa kwitukwasha kwikala na bulunda bwawama na bantu.

Mafunde a mu Baibolo afwainwa kwitukwasha

Chinuzhukainga kwikala bunke kimye kyabaya. Kange mukizhemo kwingijisha intaneti ne. Pakuba monaingapo kimye kya kwisamba na bakwenu ne kulenga balunda bawama.

• Jifunde ja mu Baibolo: “Mulunda wa kine umwesha butemwe kimye kyonse, kabiji ye mulongo ye wakonsha kuketekela mu kimye kya bya malwa.”—Byambo bya Maana 17:17.

Monaingapo kimye kya kukwasha bakwenu. Kukwasha bakwetu kechi kukoseshatu bulunda ne, pakuba kwitulengela ne kwikala na lusekelo.

• Jifunde ja mu Baibolo: “Mu kupana mufuma lusekelo lukatampe kukila mu kutambula.”—Byubilo 20:35.

Funjilaipo byavula biji pa keyala wetu byaamba pa Baibolo byo afwainwa kwimukwasha kulenga balunda bawama.