Kipamo kya Watch Tower Bible and Tract Society kyo ki ka?
Watch Tower Bible and Tract Society of Pennsylvania ke kipamo kibula kuba busulu kyatatwile mu 1884 kulondela muzhilo wa Commonwealth of Pennsylvania, mu U.S.A. Bakamonyi ba kwa Yehoba bengijisha jino jizhina kutwala palutwe mwingilo wa kusapwila ye babena kwingila ntanda yonse kubikapotu ne kupulinta ma Baibolo ne mabuku alumbulula Baibolo.
Kwesakana na buku mo banemba mizhilo yabo yo balondela, nkebelo ya jino jibumba ke ya “kufunjisha bantu, ne kukwasha bantu,” kikatakata “kusapwila ne kufunjisha bantu byambo bya Lesa ne pa Bufumu bukalamwanga ne Yesu Kilishitu.” Pa kuba’mba mwikale mu kino kipamo kanatu bemuswisha kabiji kechi kilumbulula’mba kanatu wapana mali avula ne. Baji mu kino kipamo ne batangijila bakwasha Jibumba Jitangijila ja Bakamonyi ba kwa Yehoba.
Bipamo Bikwabo Bingijila Pamo na Kipamo jo Baswisha ku Mizhilo
Kununga pa kipamo kya Watch Tower Bible and Tract Society of Pennsylvania, Bakamonyi ba kwa Yehoba bengijisha ne bipamo bikwabo byaswisha mizhilo byapusana pusana mu byalo byavula. Mazhina a bino bipamo amo muji kyambo kya “Watch Tower,” ne “Watchtower” nangwa byo batuntulula.
Bino bipamo bilengela kwingila mwingilo wetu bulongo, nabiji mwingilo wa:
Kunemba ne kulenga mabuku. Twanemba ma Baibolo 253 milyonyi ne mabuku alumbulula Baibolo mu milaka kukila 1,050. Keyala wa jw.org ukwasha bantu kutanga Baibolo pa intaneti kyatutu mu milaka 300 ne kutana mikumbu ya mepuzho a mu Baibolo nabiji bwa ku kuba’mba, “Bufumu bwa Lesa bo bu ka?”
Sukulu. Tufunjisha masukulu apusana pusana pa mikambizho ya mu Baibolo. Kutendeka mu 1943, Bakamonyi ba kwa Yehoba kukila pa 10,000 bapita mu masukulu o banengezha ku ba Watchtower Bible School of Gilead, bebafunjisha bya kwikala bamishonale nangwa bya kwikala bena Kilishitu bakosa ne kwingila bulongo mwingilo wetu wa ntanda yonse. Kabiji pa mulungu pa mulungu Bakamonyi bavula, ne babula Bakamonyi, bafunda mikambizho pa kupwila ko twikala nako mu bipwilo. Kabiji tufunjisha ne bantu babula kuyuka kutanga kabiji twanemba ne buku mu milaka 136 ye bengijisha pa kufunjisha bantu kuyuka kutanga ne kunemba.
Bukwasho. Tukwasha bantu inge baponenwa na bya malwa bileta bantu bene, byonka byo kyajinga mu 1994 mu Rwanda byo mwajinga nkondo ya mishobo, nangwatu inge kwamweka kitentanshi byonka byo kyamwekele mu 2010 ku Haiti.
Nangwa kya kuba byavula byaubiwa na mambo a kwingijisha kino kipamo, pano bino mwingilo wetu kechi waimena pa bino bipamo ne. Yense mwina Kilishitu uji na mwingilo ye bamupa kwi Lesa wa kusapwila ne kufunjisha mambo awama. (Mateo 24:14; 28:19, 20) Twashiinwa kuba’mba Lesa ubena kutundaika uno mwingilo ne kuba’mba ye ubena ‘kumukomesha.’—1 Kolinda 3:6, 7.