Kakitenguluzha ka Mepuzho

◼ Nanchi kijitu bulongo kipwilo nangwa muntu kwingijisha tuyukilo twimenako bije byo baswisha ku kafulumende twingijisha Bakamonyi ba kwa Yehoba nyi?

Kayukilo ke jizhina nangwa kintu kimenako jibumba ja bantu. Kayukilo ka Watch Tower kemenako kije kya Watch Tower Bible and Tract Society of Pennsylvania ne bije bikwabo bingijisha jibumba jetu. Kije kya Christian Congregation of Jehovah’s Witnesses kingijisha kayukilo ka Baibolo ye bazhikula pa makalata. Bije bikwabo bingijisha Bakamonyi ba kwa Yehoba biji na tuyukilo twapusana pusana.

Bipwilo nangwa bantu kechi bafwainwa kunemba tuyukilo nangwa mazhina a bije bya jibumba jetu pa Mazubo a Bufumu, pa bipachi, pa makalata, pa bipe bya mwine muntu ne pa bikwabotu byashala ne. Kwingijisha tuno tuyukilo kwakonsha kulengela babilolo ba mu kafulumende, basapwishi mu kipwilo ne bakwabotu kukankalwa kuyuka lupusano luji pakachi ka kipwilo ne bije byo baswisha ku kafulumende bya mu jibumba jetu. Makalata paji tuno tuyukilo bakonsha kwiamona nobe beetabizha nangwa nobe afuma ku ofweshi mukatampe wa ntanda yonse nangwa ku ofweshi wa musampi.

Kayukilo ka Watch Tower nangwa kakwabotu kangi kechi kafwainwa kwikanemba pa Mazubo a Bufumu ne, nangwa kya kuba’mba ayo Nzubo ya Bufumu iji mu maboko a kije kya Watch Tower. Bipwilo biji na Nzubo ya Bufumu paji kano kayukilo kechi bifikenetu ponkapo kwikafumyapo ne, mambo kyakonsha kwibavuzhizha nkito yakonsha kukeba kimye, mali ne ngovu. Nangwa byonkabyo, byafwainwa kwikafumyapo kikatakata umvwe kechi pakekala nkito ikatampe ya kwikachakulapo ne. Umvwe kyakatazha, mukekafumyepo kimye kyo mukawamishanga kishimikwa nangwa kipachi.