Loma 5:8—“Byo Twakijinga Bandengamambo, Kilishitu Witufwijile”

“Lesa witumwesha butemwe bwanji, mambo byo twakijinga bandengamambo, Kilishitu witufwijile.”—Loma 5:8, Binembelo bya Ntanda Ipya.

“Lesa witumwesha butemwe bwanji mwine bo etutemenwamo, mambo, byo twakijinga bandengamambo, Kilishitu witufwijile.”—Loma 5:8, Buku wa Lesa.

Bilumbulula Loma 5:8

Yehobaa Lesa witumwesheshe butemwe bwanji bukatampe byo atumine mwananji Yesu Kilishitu kwiya na kufwila bantu bandengamambo. (Yoano 3:16) Na mambo a bundengamambo, javula bantu balanguluka ne kuba bintu bilala mafunde a Lesa aoloka. (Kolose 1:21, 22) Nangwa byonkabyo, Lesa witulengejile kupwana ne aye “kupichila mu lufu lwa Mwananji.” (Loma 5:10) Onkao mambo, twakonsha kwikala na bulunda bwawama na Lesa ne kwikala na luketekelo lwa kwikala na bumi bwa myaka kulutwe.—Loma 5:11; 1 Yoano 4:9, 10.

Mwatala Loma 5:8

Mutumwa Paulo wanembejile bino byambo bena Kilishitu baikalanga mu Loma. Mu kitango 5 kya ino nkalata, Paulo walumbulwile ene mambo bena Kilishitu o bafwainwa kwikela na lusekelo ne na luketekelo lwakosa. (Loma 5:1, 2) Aluno “luketekelo kechi luleta bumvu ne” na mambo a kuba’mba lwaimena pa butemwe bwa Lesa bo etumwesheshe kupichila mwi Yesu. (Loma 5:5, 6) Yesu wakookejile Lesa mu bwikalo bwanji bonse, kintu kyakankelwe kuba muntu mutanshi aye Adama. (Loma 5:19) Mu kubuula kukookela kwa kwa Adama mwafumine bundengamambo ne lufu kabiji bino byakumbene ku baana banji bonse. (Loma 5:12) Pakuba, lukookelo lwa kwa Yesu ne kitapisho kya bumi bwanji byalengela bantu baji na lukookelo kwikala na luketekelo lwa bumi bwa myaka ne myaka.—Loma 5:21.