Kubala
33 Bino byo byaendelenga bena Isalela kimye kyo bafumine mu kyalo kya Ijipita+ monka mwayijile mabumba*+ abo byo bebatangijilenga kwi Mosesa ne Alona.+ 2 Mosesa wanembelenga mapunzha mo baikalanga mateko mateko kimye kya lwendo lwabo monka mwamukambizhizhe Yehoba, abino byo byo baendelenga kufuma pa mpunzha imo kuya pa mpunzha ikwabo:+ 3 Baimene lwendo kufuma ku Lamasesa+ mu ñondo mutanshi pa juba ja bu 15 ja ñondo.+ Pa jonka jino juba, Kijiilo kya Lupitailo+ byo kyapwile, bena Isalela balupukile saka bachinchika* kabiji saka bebamona ku bena Ijipita. 4 Pa kikye kimye, bena Ijipita bazhiikilenga babeji babo bonse Yehoba bo aipayile,+ mambo Yehoba wakabishe balesa babo ba bubela.+
5 Byonkabyo, bena Isalela bafumine ku Lamasesa ne kukatebelela ku Sukota.+ 6 Kabiji bafumine ku Sukota ne kukatebelela ku Etama+ kwapelela kiselebwa. 7 Kabiji bafumine ku Etama ne kwaluluka kuya ku mpunzha ya Pi-hahilota yatalañana na Baela-zefona,+ kabiji batebelejile kwipi na Migidolo.+ 8 Kepo bafumine ku Pi-hahilota ne kupita pakachi ka kalunga ka mema+ ne kutwela mu kiselebwa,+ kabiji baendele lwendo lwa moba asatu kupita mu kiselebwa kya Etama+ ne kukatebelela ku Mala.+
9 Bafumine ku Mala ne kuya ku Elimu. Ku Elimu kwajinga masulo a mema 12 ne bisonga 70, kabiji batebelejile konkakwa.+ 10 Kabiji bafumine ku Elimu ne kukatebelela ku Kalunga ka Mema Kachila. 11 Bafumine ku Kalunga ka Mema Kachila ne kukatebelela mu kiselebwa kya Shina.+ 12 Kepo bafumine mu kiselebwa kya Shina ne kukatebelela ku Dofika. 13 Kabiji bafumine ku Dofika ne kukatebelela ku Alushi. 14 Bafumine ku Alushi ne kukatebelela ku Lefidimu+ ku mpunzha kwabujile mema a kutoma bantu. 15 Kabiji bafumine ku Lefidimu ne kukatebelela mu kiselebwa kya Sinai.+
16 Bafumine mu kiselebwa kya Sinai ne kukatebelela ku Kibilota-hataba.+ 17 Kepo bafumine ku Kibilota-hataba ne kukatebelela ku Hazelota.+ 18 Kabiji bafumine ku Hazelota ne kukatebelela ku Litima. 19 Kabiji bafumine ku Litima ne kukatebelelela ku Limona-mpeleza. 20 Kepo bafumine ku Limona-mpeleza ne kukatebelela ku Libina. 21 Bafumine ku Libina ne kukatebelela ku Lisa. 22 Kepo bafumine ku Lisa ne kukatebelela ku Kehelata. 23 Kabiji bafumine ku Kehelata ne kukatebelela ku Mutumba wa Shefwa.
24 Kepo bafumine ku Mutumba wa Shefwa ne kukatebelela ku Halada. 25 Kabiji bafumine ku Halada ne kukatebelela ku Makelota. 26 Kepo bafumine+ ku Makelota ne kukatebelela ku Tahati. 27 Kabiji bafumine ku Tahati ne kukatebelela ku Tela. 28 Kabiji bafumine ku Tela ne kukatebelela ku Mitika. 29 Kepo bafumine ku Mitika ne kukatebelela ku Hashimona. 30 Kabiji bafumine ku Hashimona ne kukatebelela ku Moselota. 31 Kepo bafumine ku Moselota ne kukatebelela ku Bene-yakana.+ 32 Kabiji bafumine ku Bene-yakana ne kukatebelela ku Hola-hagigada. 33 Kepo bafumine ku Hola-hagigada ne kukatebelela ku Yotabata.+ 34 Kabiji bafumine ku Yotabata ne kukatebelela ku Abilona. 35 Kepo bafumine ku Abilona ne kukatebelela ku Eziona-gebela.+ 36 Kabiji bafumine ku Eziona-gebela ne kukatebelela mu kiselebwa kya Zini,+ ko kuba’mba ku Kadeshi.
37 Kabiji bafumine ku Kadeshi ne kukatebelela ku Mutumba wa Hola+ konka ku mupaka wa kyalo kya Edomu. 38 Kabiji Alona ñanga wakanjijile ku Mutumba wa Hola monka mwamukambizhizhe Yehoba, ne kufwa wafwijile konkakwa mu mwaka wa bu 40, kufuma kimye bena Isalela kyo balupukile mu kyalo kya Ijipita mu ñondo wa butanu pa juba jitanshi ja ñondo.+ 39 Alona wajinga na myaka 123 kimye kyo afwijile ku Mutumba wa Hola.
40 Mfumu wa Alada+ mwina Kenana waikalanga mu Negeba mu kyalo kya Kenana, waumvwine’mba bena Isalela babena kwiya.
41 Kabiji bafumine ku Mutumba wa Hola+ ne kukatebelela ku Zalamona. 42 Kepo bafumine ku Zalamona ne kukatebelela ku Punona. 43 Kabiji bafumine ku Punona ne kukatebelela ku Obote.+ 44 Kepo bafumine ku Obote ne kukatebelela ku Iye-abalimu konka ku mupaka wa Moabu.+ 45 Kabiji bafumine ku Yimu ne kukatebelela ku Dibona-gadi.+ 46 Kepo bafumine ku Dibona-gadi ne kukatebelela ku Alimona-dibalataimu. 47 Kabiji bafumine ku Alimona-dibalataimu ne kukatebelela ku mitumba ya Abalimu+ kwipi na Nebo.+ 48 Kepo bafumine ku mitumba ya Abalimu ne kukatebelela mu biselebwa bya Moabu byajinga ku Yodano kwipi na Yeliko.+ 49 Batwajijile kwikala ku Yodano, kufuma ku Beteyeshimota kukafika ne ku Abela-shitima+ monka mu biselebwa bya Moabu.
50 Kabiji Yehoba waambijile Mosesa monka mu biselebwa bya Moabu byajinga ku Yodano kwipi na Yeliko amba: 51 “Buula bena Isalela amba, ‘Musakwabuka Yodano ne kutwela mu kyalo kya Kenana.+ 52 Mukapangemo bangikazhi bonse ba mu kyalo kabiji mukakundaule mashiki abo onse a mabwe+ ne bipashañano byabo byonse bya byela+ ne kusandañanya mapunzha abo azhila atuntama.+ 53 Kabiji mukatambula kyokya kyalo ke kyenu kya kwikalamo, mambo kine nkemupakyo kwikala ke kyenu.+ 54 Mwafwainwa kuta bubale+ pa kwabanya kyalo mu bisemi byenu. Jibumba jiji na bantu bavula mukejipe kya buswanyi kyabaya ne jibumba jiji na bantu bacheche mukejipe kya buswanyi kicheche.+ Muntu yense ukatambula kya buswanyi ponka pa kaponena bubale bwanji. Mukatambula mpunzha yenu ya buswanyi monka mwayila mikoka ya bashakulu benu.+
55 “‘Bino umvwe mukabule kwibapangamo bangikazhi ba mu kyalo,+ aba bo mukaswisha kushalamo, bakekala nobe bintu bibena kwimusonkaula mu meso kabiji nobe miba iji mu mbavu yenu, kabiji bakemukatazhanga mu kyalo kyenu kyo mukekalamo.+ 56 Kabiji kintu kyo nakebelenga kwiboba, kyo kyo nkemuba.’”+