Kubala

4 Yehoba waambijile Mosesa ne Alona amba: 2 “Balai baana ba kwa Kohati+ baji mu bena Levi monka mwayila bisemi byabo ne mwayila bikota byabo, 3 bonse baji na myaka 30+ kufika ku 50+ baji mu jibumba jo batongola kwingijila mu tente wa lusambakeno.+

4 “Uno ye mwingilo wa baana ba kwa Kohati mu tente wa lusambakeno.+ Uno ke mwingilo wazhijisha: 5 Pa kwimana lwendo, Alona ne baana banji bakatwele mukachi ne kukasulula kipembe+ ne kwikivweta+ pa jikwachi ja Lushimuno. 6 Bakavwetepo na kya kuvwetapo kya mwayi wa nyama mukatampe wa mu kalunga ka mema ne kubikapo kisapi kyafituluka ne kukulamo mibanda+ ya kwijisendelako.

7 “Kabiji bakavwete kisapi kyafituluka pa tebulu wa bashinkwa+ ba kupana kwi Lesa kabiji bakabikepo ne masanyi, makapu, masanyi afukumana ne milondo ya kwitulwilamo milambo ya binyu;+ kabiji bashinkwa+ kechi bafwainwa kwibafumyapo ne. 8 Bakatandubwilepo kisapi kya tonge wachijisha ne kwikivweta na kya kuvwetapo kya mwayi wa nyama mukatampe wa mu kalunga ka mema ne kukulamo mibanda+ ya kwijisendelapo. 9 Kepo bakashikule kisapi kyafituluka ne kwikivweta pa kya kutulapo malampi+ asamisha kyeya pamo na malampi+ akyo, tubimano, pa kuponena buto bufuma ku muzhinge+ ne bipe byonse bya kubikamo manyi o babika mu malampi. 10 Bakekivwete pamo na bipe byakyo byonse na kya kuvwetapo kya mwayi wa nyama mukatampe wa mu kalunga ka mema ne kwikibika pa mubanda wa kwikisendelapo. 11 Kabiji bakatandubwile kisapi kyafituluka pa kya kusokelapo bitapisho kya ngolode+ ne kwikivweta na kya kuvwetapo kya mwayi wa nyama mukatampe wa mu kalunga ka mema ne kukulamo mibanda+ ya kwikisendelako. 12 Kepo bakashikule bipe byonse+ byo bengijisha kimye kyonse ku mwingilo wa mu mpunzha yazhila ne kwibibika pa kisapi kyafituluka ne kwibivweta na kya kuvwetapo kya mwayi wa nyama mukatampe wa mu kalunga ka mema ne kwibibika pa mubanda wa kusendelapo.

13 “Bakafumyepo buto* pa kya kusokelapo bitapisho+ ne kutandubwilapo kisapi kya boya bwachiluluka. 14 Bakabikepo bipe byakyo byonse byo bengijisha pa kwingijila ku kya kusokelapo bitapisho: bya kwapwilapo mujilo, mafoloko, mafosholo, masanyi afukumana ne bipe byonse bya pa kya kusokelapo bitapisho;+ kabiji bakekivwete na kya kuvwetapo kya mwayi wa nyama mukatampe wa mu kalunga ka mema ne kukulamo mibanda+ ya kwikisendelapo.

15 “Alona ne baana banji bafwainwa kupwisha kuvweta mpunzha yazhila ne bipe byonse bya mu mpunzha yazhila+ pa kwimana lwendo. Kepo baana ba kwa Kohati bakeya na kwibisenda,+ bino kechi bafwainwa kukwata pa bintu byazhila ne, mambo inge ne, bakafwa.+ Ino yo mingilo* ya baana ba kwa Kohati ya ku tente wa lusambakeno.

16 “Eleaza+ mwana wa kwa Alona ñanga ye ukekala na mwingilo wa kutala pa manyi a kubika mu malampi,+ bya kufutumuna binunka bulongo,+ mulambo wa kajo ulambulwa jonse ne manyi a kushinga.+ Ye ukatalanga pa tente wa lusambakeno yense ne bintu byonse bijimo kubikapotu ne mpunzha yazhila ne bipe byonse bijimo.”

17 Yehoba waambijile Mosesa ne Alona jibiji amba: 18 “Kechi mukaleke mukoka wa bisemi bya bena Kohati+ akazhiye mu bena Levi ne. 19 Bino mukebobile kino kuba’mba bakatwajijile kwikala bomi ne kubula kufwa na mambo a kufwenya kwipi na bintu byazhijisha.+ Alona ne baana banji bakatwele mukachi ne kwibatongwela mwingilo wabo pa muntu pa muntu ne bintu byo bafwainwa kusenda. 20 Kechi bafwainwa kutwela mukachi ne kumona bintu byazhila nangwa pa kakimye kachechetu ne, mambo inge ne, bakafwa.”+

21 Kepo Yehoba aambijile Mosesa amba: 22 “Bala baana ba kwa Geleshona+ monka mwayila bikota byabo ne bisemi byabo. 23 Unembe bonse baji na myaka 30 kufika ne ku 50 baji mu jibumba jo batongola kwingijila mu tente wa lusambakeno. 24 Uno ye mwingilo ye bapa bisemi bya bena Geleshona ne bintu byo bakasendanga:+ 25 Bakasendenga bisapi bya ku tente wa lusambakeno,+ tente wa lusambakeno, kya kuvwetapo ne kya kuvwetapo kya mwayi wa nyama mukatampe wa mu kalunga ka mema kiji peulu,+ kipembe* kya mu kibelo kya tente wa lusambakeno,+ 26 bisapi byazenzumuka bya ku kipango,+ kipembe* kya mu kibelo kya kipango+ kyazhokoloka tente wa lusambakeno ne kya kusokelapo bitapisho, mizhinge ya ku tente ne bipe byonse byo bengijisha mu mwingilo wa ku tente. Uno ye mwingilo wabo. 27 Alona ne baana banji bo bakatalanga pa mingilo yonse ne bintu bikasendanga bena Geleshona;+ ukebape bintu byonse bya kusenda, uno ye mwingilo wabo. 28 Uno ye mwingilo ukengilanga bisemi bya bena Geleshona ku tente wa lusambakeno,+ kabiji Itamala+ mwana wa kwa Alona ñanga ye ukatangijilanga mingilo yabo.

29 “Kabiji baana ba kwa Melali+ ukebanembe monka mwayila kisemi ne kikota kyabo. 30 Ukanembe bonse kutendekela pa wa myaka 30 kufika ku 50, bonse baji mu jibumba jo batongola kwingijila ku tente wa lusambakeno. 31 Bintu byo bakasendanga+ pa kwingila mwingilo wabo ku tente wa lusambakeno ke bino: mafulemu+ a ku tente wa lusambakeno, myamba+, mashiki,+ bitako bya kusokekamo;+ 32 mashiki+ azhokoloka lubanza, bitako bya kwiasokekamo,+ mpopo,+ mizhinge pamo na bintu ne bintu byonse bya kwingijisha mu uno mwingilo. Ukebitongole mazhina bintu byo ukebapa kusenda. 33 Abino byo bikengilanga bisemi bya bena Melali+ ku tente wa lusambakeno, kabiji Itamala mwana wa kwa Alona ñanga ye ukebatangijilanga.”+

34 Mosesa ne Alona ne bakulumpe+ ba jibumba banembele bena Kohati+ monka mwayijile bisemi byabo ne bikota byabo, 35 bonse baji na myaka 30 kufika ku 50 bajinga mu jibumba jo batongwele kwingijila mu tente wa lusambakeno.+ 36 Bonse pamo bo banembele bajinga 2,750 monka mwayijile bisemi byabo.+ 37 Abano bo bo banembele kufuma mu bisemi bya bena Kohati, bonse baingijilenga ku tente wa lusambakeno. Bebanembele kwi Mosesa ne Alona byonkatu Yehoba byo akambizhe Mosesa.+

38 Baana ba kwa Geleshona+ bebanembele monka mwayijile bisemi byabo ne bikota byabo, 39 bonse baji na myaka 30 kufika ku 50 bajinga mu jibumba jo batongwele kwingijila ku tente wa lusambakeno. 40 Bonse pamo bo banembele bajinga 2,630 monka mwayijile bisemi byabo ne bikota byabo.+ 41 Abino byo banembele bisemi bya baana ba kwa Geleshona, bonse baingijilenga ku tente wa lusambakeno, bo banembele kwi Mosesa ne Alona byonkatu Yehoba byo akambizhe.+

42 Baana ba kwa Melali bebanembele monka mwayijile bisemi byabo ne bikota byabo, 43 bonse baji na myaka 30 kufika ku 50 bajinga mu jibumba jo batongwele kwingijila ku tente wa lusambakeno.+ 44 Bonse pamo bo banembele bajinga 3,200 monka mwayijile bisemi byabo.+ 45 Abino byo banembele bisemi bya baana ba kwa Melali bo banembele kwi Mosesa ne Alona byonka Yehoba byo akambizhizhe Mosesa.+

46 Mosesa ne Alona ne bakulumpe ba bena Isalela banembele bano bena Levi bonse monka mwayijile bisemi byabo ne bikota byabo; 47 kutendekela ku ba myaka 30 kufika ku 50 ne bonse bo bapele mwingilo wa kusenda bipe bya mu tente wa lusambakeno.+ 48 Bantu 8,580 bo bo banembele.+ 49 Bebanembele monka Yehoba mo akambizhizhe Mosesa, bonse pa muntu pa muntu bebatongwejile mwingilo wa kwingila ne bipe bya kusenda; bebanembele byonkatu Yehoba byo akambizhe Mosesa.