Kubala

3 Ino yo ndonda ya bisemi bya kwa Alona ne Mosesa mu kyonkakya kimye Yehoba kyo esambile ne Mosesa pa Mutumba wa Sinai.+ 2 Ano o ajinga mazhina a baana ba kwa Alona: mubeji wajinga Nadaba, palondela ne Abihu,+ Eleaza+ ne Itamala.+ 3 Ano o ajinga mazhina a baana ba kwa Alona bo bashingile manyi ne kwibatongola* kwikala bañanga.+ 4 Pano bino, Nadaba ne Abihu bafwijile ku meso a Yehoba byo batwajile kwi Yehoba+ mujilo ye babujile kwibaswisha mu kiselebwa kya Sinai, kabiji kechi basemenepo baana ne. Bino Eleaza+ ne Itamala+ batwajijile kwingila mwingilo wa buñanga pamo ne shabo Alona.

5 Kepo Yehoba aambijile Mosesa amba: 6 “Leta kwipi mukoka wa bena Levi+ ne kwibemika kwi Alona ñanga + kuba’mba bamwingijilenga. 7 Bakamwingijilenga mingilo, ne mingilo ya jibumba jonse konka ku tente wa lusambakeno byo bakengilanga mwingilo wabo wa ku tente wa lusambakeno. 8 Bakalamenga bipe+ byonse bya tente wa lusambakeno ne kwingila mingilo yabo ya kwingijila bena Isalela byo bakengilanga mingilo ya ku tente wa lusambakeno.+ 9 Bena Levi ukebapane kwi Alona ne ku baana banji ba balume. Ukebapane kwi aye kwikala bupe bwanji bwafuma mu bena Isalela.+ 10 Wafwainwa kutongola Alona ne baana banji kwingila mingilo yabo ya buñanga,+ kabiji muntu* ye babula kuswisha ukafwenya kwipi bafwainwa kumwipaya.”+

11 Yehoba watwajijile kwambila Mosesa amba: 12 “Amiwa nasala bena Levi kufuma mu bena Isalela kwibapingakenya pa babeji* bonse ba bena Isalela,+ kabiji bena Levi bakekala ke bami. 13 Mambo mubeji yense wami.+ Mu juba jo naipayile babeji bonse mu kyalo kya Ijipita,+ nasajile mubeji yense wa mu bena Isalela kutendekela ku muntu kufikatu ne ku nyama.+ Bakekala ke bami. Amiwa yami Yehoba.”

14 Yehoba waambijile Mosesa jibiji mu kiselebwa kya Sinai+ amba: 15 “Nemba baana ba bena Levi monka mwayila bikota byabo ne mwayila bisemi byabo. Wafwainwa kunemba mwana wa mulume yense kutendekela pa wa ñondo umo kuya peulu.”+ 16 Byonkabyo, Mosesa wibanembele byonkatu byo bamubuujile kwi Yehoba, byonka byo bamukambizhe. 17 Ano o ajinga mazhina a baana ba kwa Levi: Geleshona, Kohati ne Melali.+

18 Ano o ajinga mazhina a baana ba kwa Geleshona monka mwayijile bisemi byabo: Libinyi ne Shimei.+

19 Baana ba kwa Kohati monka mwayijile bisemi byabo bajinga ba Amulamu, Izahala, Hebulona ne Uziela.+

20 Baana ba kwa Melali monka mwayijile bisemi byabo, bajinga ba Mali+ ne Mushi.+

Abino byo byajinga bisemi bya bena Levi monka mwayijile bikota byabo.

21 Mwi Geleshona mo mwafumine kisemi kya bena Libinyi+ ne kisemi kya bena Shimei. Abino byo byajinga bisemi bya bena Geleshona. 22 Baana ba balume 7,500 bo bo banembele kutendekela pa wa ñondo umo kuya peulu.+ 23 Bisemi bya bena Geleshona byapopejile matente abyo kunyuma ya tente wa lusambakeno+ konka ku muzhika. 24 Mukulumpe wa kikota kya bena Geleshona wajinga Elyasafu mwana wa kwa Layela. 25 Mwingilo wa baana ba kwa Geleshona+ ku tente wa lusambakeno wajinga wa kulama tente+ wa lusambakeno ne bya kuvwetapo+ byapusana pusana, kipembe*+ kya mu kibelo kya tente wa lusambakeno, 26 bisapi+ byazenzumuka bya ku kipango, kipembe*+ kya mu kibelo kya ku kipango kyazhokoloka tente wa lusambakeno ne kya kusokelapo bitapisho, mizhinge yanji ne mingilo yonse ya ku bino bintu.

27 Mwi Kohati mo mwafumine kisemi kya bena Amulamu, kisemi kya bena Izahala, kisemi kya bena Hebulona ne kisemi kya bena Uziela. Abino byo byajinga bisemi bya bena Kohati.+ 28 Baana ba balume bonse bo banembele ba ñondo umo kuya peulu bajinga 8,600; bo bajinga na mwingilo wa kulama mpunzha yazhila.+ 29 Bisemi bya baana ba kwa Kohati byapopejile matente abyo ku kabeta ka ku bulenge bwa tente wa lusambakeno.+ 30 Mukulumpe wa kikota kya bisemi bya bena Kohati wajinga Elizafwana mwana wa kwa Uziela.+ 31 Mwingilo wabo wajinga wa kulama Jikwachi,+ tebulu,+ kya kutulapo malampi,+ bya kusokelapo bitapisho,+ bipe bya kwingijisha+ mu mpunzha yazhila, kipembe*+ ne mingilo yonse ya ku bino bintu.+

32 Mukulumpe mwine wa bena Levi wajinga Eleaza+ mwana wa kwa Alona ñanga, kabiji ye watalanga pa boba baingijilenga mingilo ya mu mpunzha yazhila.

33 Mwi Melali mo mwafumine kisemi kya bena Mali ne kisemi kya bena Mushi. Abino byo byajinga bisemi bya kwa Melali.+ 34 Baana ba balume bonse 6,200 bo bo banembele kutendekela pa wa ñondo umo kuya peulu.+ 35 Mukulumpe wa kikota kya bisemi bya kwa Melali wajinga Zuliela mwana wa kwa Abihaila. Abino bisemi byapopejile matente abyo ku kabeta ka ku buyeke bwa tente wa lusambakeno.+ 36 Baana ba kwa Melali bo bajinga na mwingilo wa kutala pa mafulemu+ a ku tente wa lusambakeno, myamba,+ mashiki,+ bitako bya kusokekamo, bipe byonse,+ mingilo yonse ya ku bino bintu,+ 37 ne pa mashiki azhokolokele kipango, bitako byao bya kusokekamo,+ ne mpopo ya ku tente ne mizhinge yao.

38 Aba bapopejile matente abo kulutwe ya tente wa lusambakeno ku musela, kulutwe ya tente wa lusambakeno konka kuselela juba, bajinga ba Mosesa ne Alona ne baana babo. Bo bajinga na mwingilo wa kulama nzubo yazhila, ye wajinga mwingilo wabo wa kwingijilako bena Isalela. Muntu* yense ye babujile kuswisha wafwenyenye kwipi, bafwainwe kumwipaya.+

39 Baana ba balume bonse bena Levi ba ñondo umo kuya peulu bo banembele kwi Mosesa ne Alona monka mwayijile bisemi byabo byonka bibakambizhe Yehoba, bajinga 22,000.

40 Kepo Yehoba aambijile Mosesa amba: “Nemba baana ba balume babeji bonse ba bena Isalela kutendekela pa ba ñondo umo kuya peulu,+ wibabale ne kunemba mutanchi wa mazhina abo. 41 Amiwa yami Yehoba, wafwainwa kunsajila bena Levi bapingakene pa babeji bonse ba bena Isalela,+ ne banyama ba kulela bonse ba bena Levi bapingakene pa babeji bonse ba banyama ba kulela ba bena Isalela.”+ 42 Byonkabyo, Mosesa wanembele babeji bonse ba bena Isalela byonkatu Yehoba byo amukambizhe. 43 Baana ba balume babeji bonse bo banembele mazhina kutendekela pa ba ñondo umo kuya peulu bajinga 22,273.

44 Yehoba watwajijile kwambila Mosesa amba: 45 “Sala bena Levi bakupingakena pa babeji bonse ba bena Isalela ne banyama ba kulela ba bena Levi bapingakene pa banyama babo ba kulela, bena Levi bafwainwa kwikala bami. Amiwa yami Yehoba. 46 Mali a kukuujilamo babeji+ ba bena Isalela 273 basubukapo kukila pa bena Levi,+ 47 ukatambule mashekele* atanu pa muntu pa muntu,+ monka mwayila kipimo kya shekele wa pa mpunzha yazhila.* Shekele umo ke magela 20.*+ 48 Ukapane ano mali kwi Alona ne ku baana banji kwikala mali a kukuujilamo boba basubukapo pe abo.” 49 Byonkabyo, Mosesa watambwile mali a kukuujilamo kufuma ku boba basubukilepo pa boba bo bakuujile na bena Levi. 50 Watambwile mali kufuma ku babeji ba bena Isalela, mashekele 1,365 monka mwayijile kipimo kya shekele wa pa mpunzha yazhila. 51 Kepo Mosesa apaine ano mali a bukuzhi kwi Alona ne ku baana banji monkatu mwayijile byambo* bya Yehoba, byonkatu Yehoba byo akambizhe Mosesa.