Buku wa Bubiji wa Bamfumu
7 Kepo Elisha aambile’mba, “Umvwai byambo bya Yehoba. Yehoba waamba’mba: ‘Kesha pa kyonka kino kimye ku kibelo* kya muzhi wa Samaliya, seya* wa bunga bwalamba bakamupotanga shekele* umo, ne maseya abiji a mbaale bakeapotanga shekele umo.’”+ 2 Ponkapo mukulumpe wa nzhita ye baketekejile kwi mfumu waambijile muntu wa Lesa wa kine amba: “Nangwa inge Yehoba washinkula bibelo bya mwiulu, nanchi kino* kyakonsha kumweka nyi?”+ Aye wamwambijile’mba: “Ukemwena kino na meso obe,+ bino kechi ukajako ne.”+
3 Ku kibelo kya muzhi+ kwajinga banabalume ba mbumba bana, besambilenga mulwabo amba: “Mambo ka o tubena kwikela kuno kufika ne kimye kyo tukafwa? 4 Inge twambe’mba, ‘Tuye mu muzhi,’ bino mu muzhi saka muji kipowe kya nzala,+ tukafwila monkamwa. Kabiji inge twikale kuno, napotu tukafwa. Pano twayai tuye ku kampu wa bena Silya. Inge babule kwitwipaya, tusakwikala bomi, bino inge betwipaye, tusakufwa byonkabyo.” 5 Ponkapo bayile kimye kya muntuwa muntuwa ne kutwela mu kampu wa bena Silya. Byo bafikile kunsa ya kampu wa bena Silya, bataaine kafwamo bantu.
6 Mambo Yehoba walengejile bena Silya bajinga mu kampu kumvwa kyungwe kya makalaki a nkondo ne kya bambili, kyungwe kya nzhita ikatampe.+ Kepo beambijilenga mulwabo amba: “Umvwai! Mfumu wa bena Isalela witwichila bamfumu ba bena Hiti ne bamfumu ba Ijipita kuba’mba balwe ne atweba!” 7 Ponkapotu baimene ne kunyema kimye kya muntuwa muntuwa, bashile matente abo, bambili babo, ne bambongolo babo, kabiji kampu yense bamushiletu byonka byo ajinga, kabiji banyemene amba bapulushe bumi* bwabo.
8 Bano banabalume ba mbumba byo bafikile kwapela ya kampu, batwelele mu tente umo ne kutendeka kuja ne kutoma. Monkamwa basendelemo siliva, ngolode ne bivwalo kabiji bayile na kwibifya. Kabiji babwelele jikwabo ne kutwela mu tente mukwabo ne kusendamo bintu ne kuya na kwibifya.
9 Kepo besambile mulwabo amba: “Kyo tubena kuba kechi kyawama ne. Twafwainwa kubuulako bantu bakwabo uno sawakya wawama! Inge tutaye kimye ne kupembelela kufika ne ku makya, bafwainwa kwitukambula. Pano twayai tukafikizhe uno sawakya ku nzubo ya mfumu.” 10 Byonkabyo, bayile ne kubijika ku basopa kibelo kya muzhi amba: “Twaji kuya mu kampu wa bena Silya, bino kechi mwajinga muntu ne, kabiji kechi twaji kumvwamo jiwi ja muntu nangwa umo ne. Mwajingatu bambili ne bambongolo bo bakasa ne matente beashatu byonka byo ajinga.” 11 Ponkapo basopa kibelo babijikile, kabiji uno sawakya wafikile ku nzubo ya mfumu.
12 Ponkapotu mfumu waimene bufuku ne kwambila bakalume banji amba: “Lekai nemubuule byauba bena Silya kwi atweba. Bayuka’mba atweba twafwa nzala,+ onkao mambo, bafuma mu kampu ne kuya na kufyama mu jisaka ne kwamba’mba, ‘Basakulupuka mu muzhi, ne atweba tusakwibakwata bomi bino tutwele mu muzhi.’”+ 13 Umo wa mu bakalume banji waambile’mba: “Mwane swishai banabalume bamo basende bambongolo batanu bashalapo muno mu muzhi. Umvwai! Abo basakwikalatu nobe jibumba ja bena Isalela jashala muno. Kabiji abo basakwikalatu nobe jibumba ja bena Isalela javila kala. Pano twayai twibatume bakamone.” 14 Byonkabyo, basendele makalaki abiji ne bambili, kabiji mfumu wibatumine kuya ku kampu wa bena Silya ne kwibambila’mba: “Yai mukamone.” 15 Bebalondejile kukafika ne ku Yodano, kabiji jishinda jonse jakumbenetu bivwalo ne bipe byatayilenga bena Silya kimye kyo banyemenenga. Baluwe babwelele ne kubuula mfumu.
16 Kepo bantu bayile na kupukula bintu mu kampu wa bena Silya, kya kuba’mba seya wa bunga bwalamba bamupotelenga shekele umo, ne maseya abiji a mbaale beapotelenga shekele umo, monka mwayijile byambo bya Yehoba.+ 17 Kabiji mfumu watongwele mukulumpe wa nzhita ye aketekejile amba asopenga kibelo, bino bantu bamunyantawile ne kufwa wafwijile ku kibelo, byonkatu muntu wa Lesa wa kine byo abuujile mfumu kimye kyo ayile kwi aye. 18 Kyamwekele byonkatu muntu wa Lesa wa kine byo aambile ku mfumu amba: “Kesha pa kyonka kino kimye, bipimo bya seya bibiji bya mbaale bakebipotanga shekele umo, kabiji seya wa bunga bwalamba bakamupotanga shekele umo ku kibelo kya muzhi wa Samaliya.”+ 19 Pakuba mukulumpe wa nzhita waambijile muntu wa Lesa wa kine amba: “Nangwa inge Yehoba washinkula bibelo bya mwiulu, nanchi kino* kyakonsha kumweka nyi?” Ponkapo Elisha wamwambijile’mba: “Ukemwena kino na meso obe, bino kechi ukajako ne.” 20 Akino kyo kyamumwekejile, mambo bantu bamunyantawile ne kufwa wafwijile ku kibelo.