MUTWE WA KUFUNDA 37
Ketekelai mwi Yehoba Byonkatu Byaubile Samisonyi
“Anweba Nkambo Mfumu Yehoba, napopwela mvulukai, ne kunkosesha.”—MITO. 16:28.
LWIMBO 30 Tata, Lesa Wami Kabiji Mulunda Nami
BIJI MU UNO MUTWEa
1-2. Mambo ka o kyanemena kufunda pa jishimikila ja kwa Samisonyi?
ÑANYI kintu kiiya mu milanguluko yenu inge mwaumvwa jizhina ja kuba’mba Samisonyi? Kyamweka mulanguluka pa mwanamulume wajinga bingi na bulume. Byo ibyo. Pano bino, kimye kimo Samisonyi wafuukwile kintu kyamulengejile kumanama. Nangwa byonkabyo, Yehoba wateletu muchima pa bintu byawama byaubile Samisonyi byo amwingijilenga mu bukishinka ne kuswisha jishimikila janji kunembwa mu Baibolo kuba’mba tufunjileko.
2 Yehoba waingijishe Samisonyi kwingila mingilo ya kukumya pa kukwasha bantu banji bena Isalela. Byo papichile myaka yavula kufuma pafwijile Samisonyi, Yehoba watangijile mutumwa Paulo kunemba jizhina ja kwa Samisonyi pamo na banabalume bakwabo bajinga bingi na lwitabilo. (Hebe. 11:32-34) Byaubile Samisonyi byafwainwa kwitutundaika. Waketekejile mwi Yehoba nangwatu kimye bintu kyo byakatezhe. Mu uno mutwe, tusakwisamba pa byo twafwainwa kufunjilako kwi Samisonyi ne byo aubile byo bitutundaika.
SAMISONYI WAKETEKEJILE MWI YEHOBA
3. Ñanyi mwingilo Yehoba ye apeele Samisonyi?
3 Samisonyi wasemekelwe pa kimye bena Filishitiya kyo balaminenga bena Isalela kabiji bebamanyikilenga bingi. (Mito. 13:1) Kukanama kwa bena Filishitiya kwalengejile bena Isalela kumanama bingi. Onkao mambo, Yehoba wasajile Samisonyi amba “ye ukapokololanga bena Isalela mu maboko a bena Filishitiya.” (Mito. 13:5) Uno mwingilo kechi wapeelele ne. Onkao mambo, pa kuba’mba Samisonyi engile bulongo uno mwingilo, wafwainwe kuketekela mwi Yehoba.
Samisonyi waketekejile mwi Yehoba kabiji wapimpwilengako mumo mumo pa kuba’mba atwajijile kwingijila Yehoba papelela bulume bwanji. Waingijishe byonse byo ajinga nabyo pa kuba’mba afikizhe kyaswa muchima wa Lesa (Monai mafuka 4-5)
4. Yehoba wapokolwele byepi Samisonyi ku bena Filishitiya? (Mitonyi 15:14-16)
4 Akilangulukai pa bintu bibena kumwesha’mba Samisonyi waketekejile mwi Yehoba ne mu bukwasho bwanji. Kimye kimo bashilikale bena Filishitiya baishile mu muzhi wa Lehi mu Yuda kuba’mba bakwate Samisonyi. Banabalume bena Yuda baumvwine bingi moyo. Onkao mambo, bafuukwilepo kupana Samisonyi ku balwanyi banji. Balongo ba kwa Samisonyi bamukashile ne kumupana ku bena Filishitiya. (Mito. 15:9-13) Nangwa byonkabyo, ‘mupashi wa Yehoba wamulengejile kwikala na bulume’ ne mizhinge yo bamukashile ku mikoko yachibaikile. Kepo ‘amwene mubanga wa katataka wa mbongolo mulume,’ wamutolele ne kwipayilako banabalume bena Filishitiya 1,000.—Tangai Mitonyi 15:14-16.
5. Samisonyi wamwesheshe kuba’mba waketekejile mwi Yehoba?
5 Mambo ka Samisonyi o aingijishe mubanga wa mbongolo? Mubanga wa mbongolo kechi kilwilo ne, bino Samisonyi wamwingijishe. Kwakubula nangwa kuzhinaukatu ne, Samisonyi wayukile’mba Yehoba ye wamukwashishe kushinda bena Filishitiya, kechi mubanga ye aingijishe ne. Uno mwanamulume wa kishinka waingijishe kintu kyo ajinga nakyo kufikizhizhamo kyaswa muchima wa Yehoba. Samisonyi washinjile banabalume bonse mambo waketekejile mwi Yehoba.
6. Ñanyi kintu kyo twafwainwa kufunjilako ku jishimikila ja kwa Samisonyi?
6 Ne atweba Yehoba witupa bulume bwa kuba kyonse kyo etwambila kuba, nangwatu inge mwingilo ubena kumweka kukatazha. Kabiji Lesa wakonsha kwitukwasha mu jishinda jo tubena kubula ne kuketekela. Kabiji ketekelai’mba Yehoba ukemupatu bulume inge mwamuketekela byonka byaubile Samisonyi.—Maana 16:3.
7. Ñanyi kintu kyamwesha’mba twafwainwa kulondelanga lutangijilo lwa Yehoba?
7 Balongo ne banyenga bengilako mwingilo wa kushimika bishimikwa bya kupopwelamo Lesa baketekela bingi mwi Yehoba. Kala balongo bavula balenga bikekala bishimikwa ne kushimika Mazubo a Bufumu a katataka ne bishimikwatu bikwabo. Na mambo kuba’mba bantu bavula babena kubatizhiwa, bapimpwileko bya kushimika. Balongo batangijila balombele bukwasho kwi Yehoba ne kutendeka kwingijisha mashinda akwabo, nabiji kupota bishimikwa ne kwibiwamisha. Ba Robert baambile’mba: “Balongo ne banyenga bamo baingila mwingilo wa kushimika bishimikwa myaka yavula kibakatezhe bingi kutendeka kulondela jino jishinda ja katataka.” Batwajijila kwamba’mba: “Jino jishinda japusana bingi najo twaingijishanga kala, pano bino balondejile luno lupimpu. Kabiji kyamwekeshatu patoka’mba Yehoba ubena kupesha luno lupimpu.” Kino kyo kintu kimo kibena kumwesha’mba Yehoba ubena kutangijila bantu banji kuba kyaswa mushima wanji. Onkao mambo, twafwainwa kwiipuzhanga atweba bene amba: ‘Nanchi ndomba kwi Yehoba kuntangijila ne kumwingijila papelela bulume bwami nangwa inge kwaikala lupimpu nyi?’
SAMISONYI WAINGIJISHENGA BINTU BYAMUKWASHISHE KUKETEKELA MWI YEHOBA
8. Ñanyi kintu Samisonyi kyo aubile byo aumvwine kilaka?
8 Kampe mwavulukapo bintu byawama byaubile Samisonyi. Waipayile bokwe na maboko, kabiji palutwe kacheche waipayile banabalume bena Filishitiya 30 mu Ashekelona. (Mito. 14:5, 6, 19) Samisonyi wayukile’mba kechi waubile bino byonse kwa kubula bukwasho bwa Yehoba ne. Kintu kikwabo kyamwesheshe’mba Yehoba wamukwashishenga ke kyo aubile ku bena Filishitiya 1,000 ne kimye kyo aumvwine kilaka. Ñanyi kintu kyo aubile? Byo aumvwine kilaka kechi watendekele kukebakeba mema ne, bino walombele kwi Yehoba kuba’mba amukwashe.—Mito. 15:18.
9. Yehoba waubile ka kimye Samisonyi kyo alombele bukwasho? (Mitonyi 15:19 ne tubyambo twa munshi)
9 Yehoba wakumbwile Samisonyi mu jishinda ja kukumya ne kumupa mema. Samisonyi byo atomene ano mema, “bulume bwanji bwabwelelemo kabiji wakosele.” (Tangai Mitonyi 15:19 ne tubyambo twa munshi.) Kano kakola Samisonyi ko atomenemo mema, katwajijile kwikala na mema kufikatu ne kimye Yehoba kyo atangijile ngauzhi Samwela kunemba buku wa Mitonyi. Bena Isalela bamweneko mema bashiinwe’mba inge baketekelatu mwi Yehoba ukebakwasha mu bimye bya malwa.
Samisonyi waikele na bulume jibiji byo atomene mema amupele Yehoba. Byonkatu byo kyajinga kwi Samisonyi, twafwainwa kuswa Yehoba kwitukwasha pa kuba’mba tutwajijile kwikala bakishinka kwi aye (Monai jifuka 10)
10. Ñanyi bintu byo twafwainwa kuba pa kuba’mba Yehoba etukwashe? (Monai kipikichala.)
10 Ne atweba twafwainwa kutwajijila kuketekela mwi Yehoba inge tuji na bya bupe, bulume nangwa inge twaingila mingilo yavula mu jibumba janji. Samisonyi byo atomene mema amupele Yehoba, bulume bwabwelelemo. Ne atweba twafwainwa kuswanga bukwasho bwa Yehoba pa kuba’mba tutwajijile kwikala ba kishinka byonka byo kyajinga kwi Samisonyi.—Mat. 11:28.
11. Twakonsha kumwesha byepi amba twaketekela mwi Yehoba? lumbululai.
11 Akilangulukai pa makatazho abena kupitamo mulongo wetu wa ku Russia aye Aleksey. Ñanyi bintu byamukwasha kuchinchika ano makatazho? Aye ne mukazhanji bekala na kupopwela kwa kisemi ne kutanga Baibolo pa juba pa juba. Kabiji mulongo Aleksey waambile’mba: “Ngikala na lufunjisho lwa pa bunke ne kutanga Baibolo pa juba pa juba. Kabiji jonse lukelo, amiwa ne bakazhi bami tubalawila pamo kinembelo kya juba ne kulombela pamo kwi Yehoba.” Ñanyi bintu byo tubena kufunjilako? Kechi twafwainwa kwiketekela atweba bene ne. Pakuba twafwainwa kuketekelanga mwi Yehoba. Tuba byepi bino? Tuba bino inge ketube bintu bikosesha lwitabilo lwetu, nabiji kufunda Baibolo, kulomba, kutanwa kukupwila ne kusapwila. Inge twauba bino, Yehoba uketukwasha kutwajijila kumwingijila kabiji byonkatu Lesa byo apele Samisonyi bulume, ne atweba uketupa bulume.
SAMISONYI KECHI WALEKELE KUBA KYASWA MUCHIMA WA YEHOBA NE
12. Ñanyi kintu kyatama kyafuukwile Samisonyi kabiji kino kyapusana byepi na bintu bikwabo byo apichilemo?
12 Samisonyi wajinga mbulwakulumbuluka byonka byo tuji, onkao mambo kimye kimo kechi wafuukulanga bintu bulongo ne. Kintu kimo kyo afuukwilepo kyamulengejile kupita mu makatazho a kusesula. Samisonyi byo aingijileko pa bumutonyi myaka icheche watemenwe “mwanamukazhi waikalanga mu Kimpachiko kya Soleka.” Uno mwanamukazhi “jizhina janji wajinga Delila.” (Mito. 16:4) Patanshi Samisonyi wakebelenga kusongola mwanamukazhi mwina Filishitiya. Yehoba wamuswishishe kuba bino mambo wakebelenga jishinda ja kulwilamo na bena Filishitiya. Kabiji palutwe kacheche, Samisonyi wayile ku Gaza ku nzubo ya pite. Kabiji akwa nako Yehoba wamupele bulume bwa kulwa ne bena Filishitiya ne kwibashinda. (Mito. 14:1-4; 16:1-3) Nangwa byonkabyo, kyamweka Delila wajinga mwina Isalela. Na mambo a kuba’mba uno mwanamukazhi wajinga mwina Isalela, kino kechi kyafwainwe kulengela Samisonyi kuya na kulwa na bena Filishitiya ne.
13. Ñanyi kintu Delila kyo amubile Samisonyi?
13 Bena Filishitiya bapele Delila mali avula bingi pa kuba’mba afutukemo Samisonyi. Kyamweka Samisonyi wakankelwe kukwatakanya kyakebelenga kuba Delila mambo wamutemenwe bingi. Delila wakanjikizhe Samisonyi kuba’mba amubuule ene mambo o aikejile na bulume. Kabiji kino kyalengejile Samisonyi kumubuula. Kino kintu kyatama kyafuukwilepo Samisonyi kyalengejile Yehoba kuleka kumukwasha kabiji bulume bwanji bwapwile.—Mito. 16:16-20.
14. Ñanyi makatazho apichilemo Samisonyi na mambo a kuketekela Delila?
14 Samisonyi wapichile mu bintu byatama mambo waketekejile Delila kukila byo aketekejile mwi Yehoba. Bena Filishitiya bakwachile Samisonyi ne kumusaba meso. Bamutayile mu kaleya mu Gaza ku bonka bo aonawijile binzhilo. Bano bantu bamwalwile ke wa kwibapelelako kajo. Kepo bena Filishitiya bamuletele ko bakonkene na kutapisha bitapisho kwi lesa wabo Dagona. Mambo baketekejile’mba Dagona ye wibapele Samisonyi mu maboko abo. Kabiji bamuletele Samisonyi kufuma mu kaleya kuba’mba ebasekesheko.—Mito. 16:21-25.
Yehoba wapele Samisonyi bulume bwa kushinda bena Filishitiya (Monai jifuka 15)
15. Samisonyi wamwesheshe byepi amba waketekejile mwi Yehoba jibiji? (Mitonyi 16:28-30) (Monai kipikichala kya pa nkupiko.)
15 Nangwa kya kuba Samisonyi walubankenye, kechi walekele kwingijila Yehoba ne. Wamwenepo jishinda ja kulwa na bena Filishitiya byonka byakebelenga Yehoba. (Tangai Mitonyi 16:28-30.) Samisonyi wasashijile Yehoba’mba: “Ndekai nshinkanye na bena Filishitiya.” Lesa wakumbwile lulombelo lwa kwa Samisonyi ne kumupa bulume jibiji. Pa kikye kimye Samisonyi waipayile bena Filishitiya bavula kukila bo aipayile kala.
16. Ñanyi kintu kyo twafwainwa kufunjila kwi Samisonyi nangwa kya kuba walubankenye?
16 Nangwa kya kuba Samisonyi wapichile mu bintu byatama na mambo a kintu kyatama kyo afuukwilepo, kechi walekele kuba kyaswa muchima wa Yehoba ne. Inge twalubankanya kabiji betololako nangwa betulekesha kwingila mingilo imo mu kipwilo kechi twafwainwa kuleka kwingijila Yehoba ne. Vulukainga’mba Yehoba waswila jimo kwitulekelako mambo. (Sala. 103:8-10) Nangwa kya kuba tulubankanya, Yehoba uketupa bulume bwa kuba kyaswa muchima wanji byonkatu byo aubile kwi Samisonyi.
Samisonyi waumvwine bingi kutama ku muchima pa byo alubankenye, bino kechi walekele kwingijila Yehoba ne. Ne atweba inge twalubankanya, kechi twafwainwa kuleka kwingijila Yehoba ne (Monai mafuka 17-18)
17-18. Ñanyi kintu kyo mufunjilako ku byaubile Michael? (Monai kipikichala.)
17 Akilangulukai pa kyamwekejile nsongwalume aye Michael. Wapayankene bingi mu mwingilo wa Yehoba, wajinga nkwasho kabiji painiya wa kimye kyonse. Nangwa byonkabyo, walubankenye kabiji kino kyamulengejile kubula kutwajijila kwingila mingilo imo mu kipwilo. Waambile’mba: “Saka nkyangye kulubankanya, napayankene bingi mu mwingilo wa Yehoba. Nobe mu kukopatu kwa jiso bintu byapimpwilwe. Natendekele kulanguluka’mba kyapwa bunga bwapwila pa mpuki kechi nkengilapo jikwabo mingilo mu jibumba ja Yehoba ne. Kechi nalangulukilepo’mba Yehoba ukansha ne, pano bino kintu kyo nalangulukilengapotu ke bulunda bwami ne aye. Nalangulukilenga’mba bulunda bwami ne aye kechi bukakosa jikwabo byonka byo bwajinga kala ne kuba’mba nkengilapo mingilo mu kipwilo byonka byo naingilanga kala ne.”
18 Nangwa byonkabyo, Michael kechi walekele kuba kyaswa muchima wa Lesa ne. Wanungilepo’mba: “Nebikileko bingi kufwenya kwipi ne Yehoba. Naambanga nanji kimye kyonse mu lulombelo kabiji natanganga mambo a Lesa ne kulanguluka langulukapo.” Mu kuya kwa kimye, Michael watendekele kwingila mingilo jibiji mu kipwilo. Luno ke mukulumpe mu kipwilo kabiji painiya wa kimye kyonse. Waambile’mba: “Bakulumpe mu kipwilo bantundaikile ne kunkwasha bingi. Kino kyandengejile kuyuka’mba Yehoba wakintemwa. Kabiji kino kyandengejile kuyuka’mba nkengilanga mingilo mu kipwilo jibiji na jiwi ja mu muchima jatooka. Bino byo napichilemo byamfunjishe’mba Yehoba ulekelako mambo muntu walapila kya kine.” Twafwainwa kushiinwa’mba Yehoba uketupa mingilo jikwabo ne kwitupesha nangwatu inge twalubankenye kabiji twapimpula byubilo byetu ne kutwajijila kumuketekela.—Sala. 86:5; Maana 28:13.
19. Byapichilemo Samisonyi bimutundaika kuba ñanyi kintu?
19 Mu uno mutwe, twafunda bintu byavula bingi byapichilemo Samisonyi mu bwikalo bwanji. Nangwa kya kuba wajinga mbulwakulumbuluka kechi walekele kwingijila Yehoba nangwa kya kuba Delila wamulengejile kulubankanya ne. Kabiji Yehoba watwajijile kwingijisha Samisonyi. Lesa wamulengejile Samisonyi kuba kyaswa muchima wanji mu jishinda ja kukumya. Yehoba wamumwene’mba wajinga mwanamulume wa lwitabilo, kabiji wamubajila pa bantu bajinga na lwitabilo mu buku wa Bahebelu kitanga 11. Kitutundaika bingi kuyuka’mba Shetu wa mwiulu ye twingijila witutemwa bingi kabiji witukwasha kikatakata inge tubena kupita mu makatazho. Twayai tutwajijile kulomba kwi Yehoba byonka byalombele Samisonyi kuba’mba: “Napopwela mvulukai, ne kunkosesha.”—Mito. 16:28.
LWIMBO 3 Mwi Lesa mo mo Twaketekela, bo Bulume Bwetu
a Muntu umo ye baambapo mu Baibolo wa jizhina ja Samisonyi bamuyuka ku bavula nangwatu bantu babula kuyukisha bulongo binembelo. Jishimikila janji bejilumbulula mu makayo, mu nyimbo ne mu mafilimu kabiji jino jishimikila ja kine. Tufunjilako byavula bingi ku uno mwanamulume wajinga na lwitabilo.