Yesu Kilishitu—Mesiasa Walayiwe

PA KUBA’MBA etukwashe kumuyuka Mesiasa, Yehoba Lesa watangijile bangauzhi bavula ba mu Baibolo na mupashi kwamba byambo pa mambo a kusemwa, mwingilo, ne lufu lwa uno Mupokolweshi walayiwe. Buno bonse bungauzhi bwa mu Baibolo bwafikizhiwe mwi Yesu Kilishitu. Bwaluñama kya kine kine kabiji bwafikizhiwe monka mo bwaambijiwe. Kya kumwenako, twayai twambe pa bungauzhi bumo bwaambijile jimo bintu byalamachile ku kusemwa kwa Mesiasa ne byo ajinga mwanyike.

Ngauzhi Isaya waambijile jimo’mba Mesiasa ukafuma mu kisaka kya Mfumu Davida. (Isaya 9:7) Ne kya kine Yesu wasemejilwe mu kisemi kya kwa Davida.—Mateo 1:1, 6-17.

Mika, ngauzhi mukwabo wa Lesa waambijile jimo’mba uno mwana kulutwe na lwendo ukekala mfumu kabiji ne kuba’mba ukasemenwa mu “Betelema Efulata.” (Mika 5:2) Kimye kya kusemwa Yesu, kwajinga mizhi ibiji mu Isalela yatumbilwe’mba Betelema. Muzhi umo wajinga kwipi na Nazala ku kibunji kya kabeta ka ku buyeke bwa yoya ntanda, mukwabo naye wajinga kwipi na Yelusalema mu Yuda. Betelema wajinga kwipi na Yelusalema patanshi watelwanga’mba Efulata. Yesu wasemejilwe mu yewa muzhi monkatu mwaambijile bungauzhi!—Mateo 2:1.

Bungauzhi bukwabo bwa mu Baibolo bwaambijile jimo’mba Mwana Lesa uketwa’mba afumemo “mu Ijipita.” Yesu byo akijinga mwana bamutwajile mu Ijipita. Bamufumishemo panyuma ya lufu lwa kwa Heloda, kino kyafikizhe bungauzhi.—Hoseya 11:1; Mateo 2:15.

Pa chati iji pa peja 200, binembelo byanembwa munshi ya kamutwe ka kuba’mba “Bungauzhi” biji na byambo byaamba pe Mesiasa. Mwane, esakanyai bino byambo na binembelo byanembwa munshi ya kamutwe ka kuba’mba “Kufikizhiwa.” Kino kisa kulengela lwitabilo lwenu kukoselako mu bukine bwa Mambo a Lesa.

Byo mubena kubalaula bino binembelo, vulukai kuba’mba abya byaamba pa bungauzhi byanembelwe myaka yavula Yesu saka akyangye kusemwa. Yesu waambile’mba: “Kyafwainwa bikafike byonse byannembelwe amiwa mu buku wa Mosesa, ne mu wa Bangauzhi ba Lesa, ne mu wa Masalamo.” (Luka 24:44) Byonka byo mwakonsha kwitangila anwe bene mu Baibolo wenu, kine bungauzhi bwafikizhiwetu bonse tonko tonko!