Nanchi ‘Muswa’ Kukwasha Bakwenunyi?
1 Kwakubula nangwa kuzhinaukatune, Yesu wakwashishenga bingi bantu. Kimye muntu wambumba amusanshijilenga’mba amubuke, Yesu watanyikile kuboko kwanji ne kumukwata’mba: ‘Naswa, mubukwe.’ (Mako 1:40-42) Muñanyi mashinda motwakonsha kulonda muchima wa Yesu wakukwasha bantu?
2 Bantu Bakeba Kufunda Bukine: Bonse pamuntu pamuntu mukipwilo bengilako mwingilo wakukwasha bantu bakeba kufunda bukine kwikala bapopweshi ba Yehoba. Umvwe benyi baiya nakupwila, bemunai mwiyuke nabo. Monaipo mashinda amo akwibakwashishamo. Basanchilai pamikumbu yobakumbulapo. Basanchilai pakwibikishako kwingijisha mafunde amu Baibolo mubwikalo bwabo. Bakwashai kumona’mba bakonsha kwikala nabalunda bakine mukipwilo.
3 Bakwetu Bamu Lwitabilo: “Bakwetu ba mu lwitabilo” bobo twafwainwa kukwasha mumashinda avula. (Nga. 6:10) Bavula babena kumanama namisongo. Kupichila mukwibapempula, mwakonsha kwibakosesha bingi kabiji kampepo nekwibakwasha mumashinda akwabo akebewa. Bamo nabo kimo kimye bakonsha kwikala namakatazho akwabo mubwikalo bwabo. Mweshai lusa pakuteleka kubyo babena kwimubula kabiji bakoseshai. (1 Tesa. 5:14) Bakulumpe mukipwilo nabo twafwainwa kwibakokela byobengila mingilo yabo. (Hebe. 13:17) Umvwe twaikala namuchima walukokelo nekukwashañana, twakonsha ‘kukosesha michima’ yabapopweshi bakwetu.—Kolo. 4:11.
4 Bamukisemi Kyetu: Twafwainwa kwibikako nangovu kulonda lusa lwa Yesu kubamukisemi kyetu. Lusa lukatampe lolulengela bansemi ‘kukomesha baana na kwibafunjisha ne kwibajimuna monka mwaswila aye Nkambo.’ (Efi. 6:4) Baana bafwainwa kwingila lubaji lwabo umvwe kebenengezhe bukiji-bukiji kimye kyalufunjisho lwakisemi, kuya nakupwila, nangwa kuya mumwingilo wamubujimi. Baana bakoma bakonsha kulonda lusa lwa Yesu umvwe kebakwashe bansemi yabo kupwisha makatazho obaji nao namambo abukote. Muano mashinda neakwabotu, atweba bonse twakonsha ‘kumwesha kunemeka Lesa kwetu kuba mukisemi kyetu atwe bene.’—1 Timo. 5:4.
5 Umvwe twalonda Yesu mukukwasha bakwetu, twakonsha kukepeshako makatazho nekukwatankanya kisemi kyetu nekipwilo pamo. Nekyakila pabyonse, tunemeka Yehoba, “Shanja bya lusa.”—2 Ko. 1:3.