Mwina Samaliya Wamwesheshe Bulunda Bwa Kine

Kimye Yesu kyo ajinga kwipi na Yelusalema, Bayudea bavula baishile kwi aye. Bamo bakebelenga kufunda kwi aye, bino bakwabo bakebelenga kumweseka. Umo mwi abo wayukile bingi Mizhilo ya Mosesa waishile kwi aye ne kumushikisha’mba: “Mufunjishi, nafwainwa kuba byepi pa kuba’mba nkekale na bumi bwa myaka?”—Luka 10:25.

Yesu wayukile’mba awa muntu kechi wakebelengatu kuyuka bintu ne. Kyamweka wakebelenga’mba Yesu akumbwile mu jishinda ja kulengela Bayudea kuzhingila. Yesu wayukile’mba uno muntu kuji kyo aji nakyo mu milanguluko. Onkao mambo, wamukumbwile mu jishinda ja kuba’mba asolole biji mu milanguluko yanji.

Yesu waipwizhe’mba: “Ñanyi bintu byanembwa mu Mizhilo? Utangamo amba ka?” Uno muntu wafunjile bingi Mizhilo ya Lesa, onkao mambo, waingijishe ino mizhilo pa kukumbula. Waambile byanembwa mu Mpitulukilo ya mu Mizhilo 6:5 ne mu Bena Levi 19:18 amba: “Wafwainwa kutemwa Yehoba Lesa wobe na muchima wobe yense, ne na mweo wobe yense, ne na bulume bobe bonse, ne na maana obe onse’ ne ‘kutemwa mukwenu byonka byo witemwa obe mwine.’” (Luka 10:26, 27) Nanchi byo akumbwile byajinga bya kine nyi?

Yesu wamubuujile’mba: “Wakumbula bingi bulongo; twajijila kuba byonkabyo kabiji ukekala na bumi.” Nanchi uno mwisambo wapelejiletu ponkapo nyi? Ine, uno muntu kechi watondelwe na uno mukumbu ne, aye wakebelenga “kwimwesha’mba waoloka,” ne kumwitabizha’mba ndangulukilo yanji yawama kabiji waoloka mu byo aubilenga na bantu bakwabo. Onkao mambo, waipwizhe Yesu amba: “Nanchi mukwetu ye ñanyi?” (Luka 10:28, 29) Nangwa kya kuba buno bwipuzho bumvwanyika nobe kechi bwakatazha ne, bino, bwalumbulwilenga bintu byavula bingi. Mu ñanyi jishinda?

Bayudea baitabijile’mba kyambo kya kuba’mba “mukwetu” kingilatu ku Bayudea kwapwa byonkatu byaamba Bena Levi 19:18. Bayudea baambanga’mba kechi “kyafwainwa” Muyudea kupwanañana na muntu wabula Muyudea ne. (Byubilo 10:28) Onkao mambo, uno muntu kampe ne baana ba bwanga ba kwa Yesu bamo baitabijile’mba umvwe saka bamwesha lusa bakwabo Bayudea ko kuba’mba baoloka. Kabiji bantu babujile Bayudea bebamonanga’mba kechi ‘bakwabo’ ne.

Yesu waolwele byepi ndangulukilo ya uno muntu ne Bayudea bakwabo kwa kubula kwibazhingijisha? Waubile bino kupichila mu kwibabuula jishimikila ja kuba’mba: “Muntu umo wafuminenga ku Yelusalema kuya ku Yeliko kabiji bamukwachile ku tupondo ne kumuvuula, kumupuma ne kumusha saka apungila.” Yesu watwajijile kwamba’mba: “Ponkapo ñanga waishilenga mu jonkaja jishinda, bino byo amumwenetu, wamusezhezhe. Kabiji mwina Levi naye byo afikile pa ino mpunzha ne kumumona, wamusezhezhe. Bino mwina Samaliya umo wapichilenga mu jino jishinda wafikile pe aye, kabiji byo amumwene, wamubijile lusa.”—Luka 10:30-33.

Kyamweka uno mwanamulume wisambilenga ne Yesu wayukile kuba’mba bañanga bavula ne bankwasho babo bena Levi baingijilanga ku nzubo ya Lesa baikalanga mu Yeliko. Pa kufuma ku nzubo ya Lesa, baendanga museke walepele makilomita 23. Jino jishinda jatamine bingi, mambo mwatanwanga tupondo. Inge ñanga ne mwina Levi bataana mukwabo Muyudea uji mu lukatazho, nanchi kechi bafwainwe kumukwasha nenyi? Mu jishimikila janji, Yesu washimikizhe’mba kechi bamukwashishe ne. Bino mwina Samaliya ye wamukwashishe, muntu wa mu kisaka kya bantu kyo balengulwile bingi ku Bayudea.—Yoano 8:48.

Ñanyi kintu mwina Samaliya kyo aubile pa kukwasha Muyudea? Yesu waambile’mba: “Wafikile ponka ne kumupomba pa bilonda byanji, waichilapo ne manyi ne binyu. Kepo amubikile pa nyama wanji ne kumuleta ku nzubo ya benyi na kumulama. Juba jalondejilepo, washikwile mandenali abiji ne kupa mwina nzubo ne kumwambila’mba: ‘Mumulame, kabiji byonse byo mukengijisha pe aye kununga pa ano, nkeya kwimupa pa kubwela.’”—Luka 10:34, 35.

Byo apwishishe kwamba jino jishimikila, Mufunjishi Wayukisha aye Yesu, waipwizhe uno muntu bwipuzho bwanema bingi bwa kuba’mba: “Pa bano bonse basatu, wepi ye wamona’mba ye wajinga mukwabo wa yewa muntu ye bakwachile ku tupondo?” Kampe na mambo a kuba kechi wakebelenga kukumbula’mba “mwina Samaliya” ne, wakumbwiletu amba: “Yenkawa wamubijile lusa.” Kepo Yesu alumbulwile lufunjisho lwajinga mu jishimikila janji. Wamutundaikile’mba: “Yanga ukobenga byonkabyo.”—Luka 10:36, 37.

Jino jajinga jishinda jawama bingi ja kufunjishishamo. Umvwe kya kuba Yesu waambijile awa muntu mu kushinkamika’mba bantu babujile Bayudea nabo bajinga bakwabo, nanchi uno muntu ne Bayudea bakwabo bamutelekelenga inge baswile kino nyi? Ine. Nangwa byonkabyo, kupichila mu kwingijisha jishimikila jawama, waambile pa bintu byaubanga bantu bamutelekelenga. Onkao mambo, kechi kyakatezhe kutaana mukumbu wa bwipuzho bwa kuba’mba “Nanchi mukwetu ye ñanyi?” ne. Mukwetu wa kine ke yewa witutemwa ne kwitubila lusa byonka bitukambizha Binembelo kubanga.