Kitango 7
Lukokelo Lwakonsha Kukuzhikijila
NANCHI kyawama kuba kintu kijitu kyonse kyo ukeba nyi? Nanchi kimye kimo ukebatu kwiubila bintu obe mwine kwa kubula wa kukubulako nyi? Ambatu kishinka.—
Kyepi kyo watemwapo? Nanchi kijitu bulongo kuba kintu kiji kyonse kyo ukeba nyi? Umvwe wakokela bashobe ne bainobe, nanchi mufuma bintu byawama nyi?— Lesa waamba’mba wafwainwa kukokela bansemi bobe, onkao mambo pafwainwa kwikala kintu kimo. Akishi tumone kine kintu kyo aambijile bino.
Uji na myaka inga?— Wayuka myaka iji na bashobe nyi?— Nga bainobe nangwa bankambo yobe baji na myaka inga?— Baji na myaka yavula kukila yobe. Kabiji umvwe muntu waikala myaka yavula pa ntanda, uyuka bintu byavula bingi. Pa mwaka pa mwaka umvwa, kumona, ne kuba bintu byavula bingi. Onkao mambo, banyike bafwainwa kufunda ku bakulumpe.
Nanchi kujipo bamo bo wakila myaka nyi?— Nanchi obewa wayuka byavula kwibakila nyi?— Mambo ka o wayukila byavula?— Mambo uji na myaka yavula. Wafunda byavula kukila bo wakila myaka.
Ñanyi uji na myaka yavula kukila obewa ne amiwa nangwatu muntu mukwabo?— Yehoba Lesa. Aye wayuka byavula kukila obewa ne amiwa. Umvwe witwambila kuba kintu, twafwainwa kwikyuba nangwa kikatazhepotu byepi. Nanchi wayuka’mba Mufunjishi Wayukisha naye kimye kimo kyamukatazhanga kukokela nyi?—
Kimye kimo Lesa wamwambijile Yesu kwingila mwingilo washupa bingi. Byo bamupele uno mwingilo Yesu patanshi walombele byonka byo ubena kumona pa kikye kipikichala. Walombele’mba: “Kana anweba mwaswa, kano katomeno mwikamfumye.” Mu luno lulombelo, Yesu wamwesheshe amba kechi kyapela kuba kyaswa muchima wa Lesa kimye kyonse ne. Nga ku mpelo ya lulombelo waambile’mba ka? Nanchi wayuka nyi?—
Ku mpelo ya luno lulombelo Yesu waambile’mba: “Kechi kyo aswa muchima wami ne, poso kyo aswa muchima wenu kifike.” (Luka 22:41, 42) Ee, wakebelenga kyaswa muchima wa Lesa kubiwa, kechi kyaswa muchima wanji ne. Waubilenga bintu byakebelenga Lesa kechi byanji aye mwine ne.
Bi ka byo twakonsha kufunjilako ku kino?— Tufunda kuba’mba kyawama kuba bintu byaamba Lesa, nangwa kechi kyapela ne. Bino paji ne kintu kikwabo kyo tufunjilako. Abya wikiyuka nyi?— Tufunda’mba Lesa ne Yesu kechi muntu umotu byonka byamba bantu bamo ne. Yehoba Lesa wakila kabiji wayuka byavula bingi kukila Mwananji, Yesu.
Umvwe twamukokela Lesa, tumwesha’mba twamutemwa bingi. Baibolo waamba’mba: “Kutemwa Lesa ko ko kuno, amba, tulame mikambizho yanji.” (1 Yoano 5:3) Akimona, atweba bonse twafwainwa kukokela Lesa. Ne obewa ukeba kumukokelanga, ke ibyo nenyi?—
Zhikula mu Baibolo tumone bintu byaamba Lesa amba byo byafwainwa kuba baana. Twaya tutange mu buku wa Efisesa kitango 6, byepelo 1, 2, ne 3. Patangiwa’mba: ‘Anweba baana, kokelai bemusema monka mwaswila Nkambo, mambo kino kyo kyaoloka. Nemeka bashobe ne bainobe (uno ye mukambizho mutanshi uji na mulaye wa bibusa), namba umone biyampe, wikale myaka yavula panopantanda.’
Akimona, Yehoba Lesa ye ubena kukwambila’mba kasa ukokela bashobe ne bainobe. Nanchi ‘kwibanemeka’ kulumbulula ka? Kulumbulula’mba wafwainwa kwibapa mushingi. Kabiji Lesa walaya’mba umvwe ke ukokele bansemi, ‘ukamona biyampe.’
Leka nkushimikizhepo bantu bamo bapulukile na mambo a kuba’mba bajinga ba lukokelo. Bano bantu baikalanga mu muzhi mukatampe wa Yelusalema. Bantu bavula mu yewa muzhi kechi baumvwanga byaambanga Lesa ne, onkao mambo Yesu wibajimwine’mba Lesa ukonauna uno muzhi. Kabiji Yesu wibabujile byo bakonsheshe kupuluka umvwe batemenwe bololoke. Waambile’mba: ‘Byo mukamona Yelusalema sa bamuzhokoloka ku mazhita, kepo mukayuka’mba lonaiko lwanji ke luji pepi. Kino kyo kimye kyo mwafwainwa kufumamo ne kunyemena ku mitumba.’—Luka 21:20-22.
Monka mwaambijiletu Yesu, mazhita aishile na kulukuka Yelusalema. Mazhita a bena Loma azhokolokele muzhi yense. Pano bino, kana ki ka kyalengejile bashilikale babwelelemo. Bantu bavula balangulukilenga’mba kwapwa pano kafwako kikobiwa ne. Babwela baikala ne kwikala monka mu muzhi. Nanchi Yesu waambile’mba bafwainwe kuba ka?— Umvwe obewa waikalanga mu Yelusalema, inge waubilepo byepi?— Aba bamumvwijile Yesu bashile mazubo abo ne kunyemena ku mitumba kwalepa bingi na Yelusalema.
Mwaka yensetu, kafwako kyamwekele mu Yelusalema ne. Mu mwaka wa bubiji namo, kafwako kyamwekele ne. Kabiji ne mu wa busatu namo, kafwako kyamwekele ne. Bantu bamo kampe batendekele ne kulanguluka’mba aba bafumine mu muzhi bakosama bingi. Bino mu mwaka wa buna, mazhita a bena Loma abwelele jibiji. Azhokolokele jikwabo muzhi yense wa Yelusalema. Kechi kyakonshekele kunyemamo ne. Mazhita aonawine muzhi. Bantu bavula bajinga mu muzhi bafwile, kabiji bashajilepo bebatwajile mu buzha.
Ki ka kyamwekejile boba bakokejile Yesu?— Bapulukile. Bajinga kwalepa na Yelusalema. O ene mambo o babujile kwibepaya. Lukokelo lwibazhikijile.
Nanchi ne obewa lukokelo lwakonsha ku kuzhikijila nyi?— Kimye kimo bansemi bobe bakonsha kukwambila’mba kukailanga mu mukwakwa ne. Mambo ka o bakonsha kwambila bino?— Mambo bakonsha ku kupaka ku motoka. Bino kimye kimo wakonsha kulanguluka’mba: ‘Mu mukwakwa kafwamo myotoka ne. Kechi bampake ne. Banyike bavula bakaila bingi mu mukwakwa, bino kechi bebapaka ne.’
Byo byalangulukilenga ne bantu bavula mu Yelusalema. Mazhita a bena Loma byo abwelelemo, kyamwekelenga nobe kafwako kikobiwa ne. Bamo bashajile na kwikala monka mu muzhi. Bakwabo nabo babwelele ke bekale monka. Bebajimwine, pano bino kechi baumvwijile ne. Onkao mambo, bonse bafwile.
Twaya twisambe pa kya kumwenako kikwabo. Nanchi wakikaishapo kala mankishi nyi?— Kyakonsha kumwekanyika bingi bulongo umvwe waambula jinkishi. Bino kyatama bingi kukaisha mankishi. Wakonsha kusoka nzubo ne obe mwine wafwila monka!
Vuluka kuba’mba, kechi wafwainwatu kukokela kimye kimo ne. Bino wafwainwa kukokelanga kimye kyonsetu. Ñanyi waamba’mba ‘Anweba baana, kokelai bemusema’?— Lesa. Waamba bino mambo wa kutemwa.
Pano tanga bibye binembelo byaamba pa buwame bwa kwikala na lukokelo: Byambo bya Mana 23:22; Musapwishi 12:13; Isaya 48:17, 18; ne Kolose 3:20.
[Kipikichala pa jipa 42]
Mambo ka o wafwainwa kumvwina bakulumpe?
[Kipikichala pa jipa 43]
Bi ka byo twakonsha kufunjilako ku lulombelo lwa kwa Yesu?
[Kipikichala pa jipa 45]
Kukokela mukambizho wa kwa Yesu kwapulwishe byepi bano bantu?
[Bipikichala pa jipa 46]
Mambo ka o wafwainwa kukokela nangwa kafwapo kyatama ne?