Kitango 48
Wakonsha Kwikala Mu Ntanda Ipya Ya Lesa Ya Mutende
LESA wabikile ba Adama ne Evwa mu bujimi bwa Edena. Nangwa kya kuba basatukile ne kufwa bafwile, Lesa wanengezha amba baana babo, kubikapotu ne atweba lelo jino, tukekalenga myaka ne myaka mu Paladisa. Baibolo walaya amba: “Baoloka bakaswana ntanda, ne kwikalamo myaka ne myaka.”—Salamo 37:29.
Baibolo waamba pa “bya mwiulu bipya” ne “ntanda ipya.” (Isaya 65:17; 2 Petelo 3:13) Bya mwiulu bijipo ano moba ke makafulumende a bantu, bino Yesu Kilishitu ne boba bakalamanga nanji mwiulu bakekala ke “bya mwiulu bipya.” Byo kikawamapo kimye bino bya mwiulu bipya, ko kuba’mba kafulumende wa Lesa waoloka wa mutende, byo akalamanga panopantanda ponse!
Pano nga ntanda ipya yo i ka?— Ntanda ipya bakekala bantu bawama batemwa Yehoba. Wafwainwa kuyuka’mba, kimye kimo Baibolo wamba pa “ntanda” kulumbulula bantu, kechi ine ntanda ne. (Ntendekelo 11:1; Salamo 66:4; 96:1) Abe bantu bemenwako na ntanda ipya bakekalanga ponka panopantanda.
Bantu batama bakekala ke kafwako. Vuluka kuba’mba, Muyulo wa mu moba a Nowa waipayile bantu batama. Byonka byo twafunda, bantu batama ba mu ano moba, bakonaunwa pa Amagedonyi. Akitwaya tumone bumi byo bukekala mu ntanda ipya ya Lesa panyuma ya Amagedonyi.
Nanchi ukeba ukekalenga myaka ne myaka mu ntanda ipya ya Lesa ya mutende nyi?— Kafwako dokotala wakonsha kwitulengela kwikala myaka ne myaka ne. Kafwako muchi wakonsha kwituzhikijila ku lufu ne. Pa kuba’mba tukekalenga myaka ne myaka kanatu twafwenya kwipi ne Lesa. Kabiji Mufunjishi Wayukisha witubula byo twakonsha kufwenya kwipi ne Lesa.
Akitwaya tumone kinembelo kya Yoano kitango 17, kyepelo 3. Pa kino kyepelo paji byambo byaambile Mufunjishi Wayukisha bya kuba’mba: “Kabiji buno bo bumi bwa myaka, namba bemuyuke anweba, Lesa yenka wa kine, ne Yesu Kilishitu ye mwatumine.”
Yesu waambile amba twafwainwa kuba ñanyi bintu pa kuba’mba tukekale na bumi bwa myaka ne myaka?— Patanshi twafwainwa kuyuka Shetu wa mwiulu, Yehoba, kabiji ne Mwananji, witwelejile mweo wanji. Ko kuba’mba twafwainwa kufunda Baibolo. Uno buku wa Fundai ku Mufunjishi Wayukisha byo byo abena kwitukwasha.
Pano nga kumuyuka Yehoba kwakonsha kwitulengela byepi kwikala na bumi bwa myaka ne myaka?— Byonkatu byo tukeba kajo pa juba pa juba, byo byo twafwainwa ne kufundanga pe Yehoba. Baibolo washimuna’mba: ‘Muntu kechi ukamwena bumi ku shinkwa yenka ne, poso ku byambo byonse bifuma mu kanwa ka Lesa.’—Mateo 4:4.
Kabiji twafwainwa kumuyuka Yesu Kilishitu mambo Lesa watumine Mwananji kuba’mba etukule ku bundengamambo. Baibolo washimuna’mba: “Lupulukilo kechi luji mu mukwabo nangwa umo ne.” Kabiji Baibolo waamba’mba: “Aye wamwitabila Mwana uji na bumi bwa myaka.” (Byubilo 4:12; Yoano 3:36) Nanchi ‘kwitabila’ mwi Yesu kilumbulula ka?— Kilumbulula’mba kya kine twaitabila mwi Yesu kabiji twayuka’mba kechi twakonsha kwikala myaka ne myaka kwakubula aye ne. Abya twaitabila bino nyi?— Umvwe twaitabila, tukatwajijila na kufunda ku Mufunjishi Wayukisha pa juba pa juba, ne kubanga byo amba.
Jishinda jimo ja kufunjilamo ku Mufunjishi Wayukisha ke kupichila mu kutanga uno buku kimye kyonse ne kulangulukapo pa bipikichala. Akyeseka kana wakonsha kukumbula mepuzho aji pa bino bipikichala. Kabiji wafwainwa kutanga uno buku na bainobe nangwa bashobe. Umvwe bansemi bobe bafwapo, wakonsha kumutanga na bakulumpe nangwa banyike bakwenu. Ke kintu kyawama bingi umvwe ke ubuleko bakwenu nabo amba pa kuba’mba bakekale na bumi bwa myaka ne myaka bafwainwa kufunda ku Mufunjishi Wayukisha, ke ibyo nenyi?—
Baibolo witubula’mba: “Panopantanda pakapita.” Pano bino witubula byo twakonsha kwikala myaka ne myaka mu ntanda ipya ya Lesa. Waamba’mba: “Aye uba kyaswa muchima wa Lesa ukekala myaka ne myaka.” (1 Yoano 2:17) Twakonsha kwikala byepi mu ntanda ipya ya Lesa?— Ee, twakonsha kwikala mu ntanda ipya ya Lesa umvwe twamuyuka Yehoba, ne Mwananji ye atemwisha, Yesu. Pano bino twafwainwa ne kubanga bintu byo tufunda. Leka uno buku akukwashe kubanga bino bintu.
[Kakitenguluzha/ Kipikichala pa jipa 251]
Umvwe watanga Isaya 11:6-9 ne Isaya 65:25, usa kufunda kuba’mba banyama bakekalanga mu mutende. Akimona pa bino bipikichala. Akimona mukooko, mwana mbuzhi, kisumpa, kaana ka ñombe, bokwe, ne mwana mucheche uji pakachi kabo. Wakonsha kutongola mazhina a banyama bakwabo baambiwapo mu Baibolo nyi?— Akimona mwana ubena kukaya na kipiji. Kafwako ukekalanga mu ntanda ipya ukomvwanga moyo ne. (Hoseya 2:18) Waumvwa byepi pa kino?—
[Kakitenguluzha/ Kipikichala pa jipa 252]
Pano akimona bantu bonse byo baji na lusekelo. Bonsetu batemwa bakwabo, byonka byaambile ne Yesu amba baana banji ba bwanga baketemwa. (Yoano 13:34, 35) Mata a nkondo bakealula ke byela bya kuwamishako ntanda. Baibolo waamba’mba bantu bakekalanga mu ntanda ipya ya Lesa, bakekalanga mu mutende. Byo byaamba ne bino binembelo: Salamo 72:7; Isaya 2:4; 32:16-18; ne Ezikyo 34:25.
Akimona bantu baji pa ino peja. Babena kuwamisha ntanda amba imwekanenga kitambo. Akimona nzubo yawama yo babena kushimika, bipangwa, ne bishu bye biji pape. Bantu baikala mutende pa ntanda, kabiji ntanda yaikala ke Paladisa byonka byajinga bujimi bwa Edena. Bino bintu byaambiwapo ne pa Salamo 67:6; 72:16; Isaya 25:6; 65:21-24; ne Ezikyo 36:35.
[Kakitenguluzha/ Kipikichala pa jipa 254]
Byonka byo ubena kumona pape, bantu bonse baikala bulongo kabiji baji na lusekelo. Bantu bakonsha kukiluka nobe lupala. Kafwapo walemana, mpofu, nangwa ubena kubela ne. Kabiji akimona boba bantu basangulwa! Baibolo waambapo pa kino pa Isaya 25:8; 33:24; 35:5, 6; Byubilo 24:15; ne Lumwekesho 21:3, 4.