Kitango 39

Lesa Wavulukile Mwananji

YESU wajijile bingi kimye kyafwile mulunda nanji Lazalasa. Nanchi walanguluka’mba Yehoba naye waumvwine kutama kimye Yesu kyo amanaminenga ne kufwa nyi?— Baibolo waamba’mba Lesa umvwa bingi ‘ku muchima kukola’ na mambo a bintu byubiwa.—Salamo 78:40, 41; Yoano 11:35.

Yehoba kyamukolele bingi ku muchima pa kumona mwananji saka afwa, ke ibyo nenyi?— Yesu waketekejile’mba Lesa kechi ukamulubako ne. Kyo kine kintu kyo aambijile bino byambo saka akyangye kufwa ne amba: ‘Tata, natula [bumi] bwami mu maboko enu.’—Luka 23:46.

Yesu wajinga na luketekelo amba ukasangulwa, kechi kwikajijila mu “kalunga,” nangwa’mba mu kilende ne. Yesu byo asangukile, mutumwa Petelo wanembulwile byambo byaambile pe Yesu byanembelwe mu Baibolo amba: “Byo abujile kushala mu Kalunga, nangwa mubiji wanji naye kechi wamwene bubole ne.” (Byubilo 2:31; Salamo 16:10) Mubiji wa kwa Yesu kechi wabolejile mu Kalunga kya kuba kanunke ne kununka ne.

Yesu byo akijinga panopantanda, waambijile baana banji ba bwanga amba kechi ukafwa kyabaya ne. Wibalumbulwijile amba ‘bakamwipaya, kabiji ukasanguka mu juba ja busatu.’ (Luka 9:22) Kino kyakonsheshe kulengela baana ba bwanga kubula kukumya kimye Yesu kyo asangwilwe. Nanchi bakuminye nyi?— Akitwaya tumone byo kyajinga.

Pajinga pa Kitanu mute kimye Mufunjishi Wayukisha kyo afwile pa kichi kya lumanamo. Yosefwa wajinga umo wa mukije kya Saniedilini kabiji kechi wiyukanyikishe amba mwana wa bwanga wa kwa Yesu ne. Byo aumvwine amba Yesu wafwa, wayile kwi Pilato ndamakyalo wa Loma. Walombele lūsa kuba’mba asende mubiji wa kwa Yesu aye na kumuzhika. Ne kya kine, Yosefwa wasendele mubiji wa kwa Yesu ne kuya ku bujimi kwajinga kilende, mpunzha ko bazhikanga bantu bafwa.

Byo babikile mubiji mu kilende, baalumwijileko ne jibwe jikatampe. Ko kumvwa’mba ku kilende bazhikileko. Juba ja busatu jafikile, jino ke juba ja Mulungu. Kwajinga ku makya, juba saka jikyangye kusela ne. Aba banabalume bakijingatu konka saka balonda kilende. Bañanga bakatampe bo bebatumine amba basopenga kilende. Abya wayuka kyo baubijile bino nyi?—

Bañanga nabo baumvwine byaambilenga Yesu amba ukasanguka. Onkao mambo, batumine bashilikale bakulama kilende kya kwa Yesu kuchina’mba baana banji ba bwanga bakamusendamo ne kubepa amba wasanguka. Olo, mushiji watendekele kusunkena. Saka kuji mfishi, kyeya kyaubiletu kebu. Wajinga malaika wa Yehoba! Bashilikale baumvwine bingi moyo kechi baendeletu nangwa kwenda ne. Malaika waile ku kilende ne kufumyako jibwe. Mu kilende mwalambiletu myaa!

Ee, palutwe kacheche mutumwa Petelo waambile’mba: “Uno Yesu bamusangwile kwi Lesa.” (Byubilo 2:32) Lesa wamusangwile Yesu ku bafu ne kumupa mubiji yenka ye ajingapo nanji saka akyangye kwiya panopantanda ne. Byo asangukile, waikele na mubiji wa bumupashi byonka biji bamalaika. (1 Petelo 3:18) Onkao mambo, bantu pa kuba’mba bamumone, Yesu wafwanyijilwe kwikala na mubiji wa bumuntu. Nanchi bino byo byo aubile nyi?— Akitwaya tumone byo kyajinga.

Juba jayilenga na kusela, aku bashilikale saka baya kala. Maliya wa ku Mangadala ne bakwabo baana ba bwanga babakazhi ba kwa Yesu bayile ku kilende. Baambañenenga bene na bene amba: “Ñanyi usakwitwalumwinako jibwe ku kibelo kya kilende?” (Mako 16:3) Byo bafikile ku kilende batainetu jibwe bejalumunako. Kabiji mu kilende kafwamo kyajingamo ne! Mubiji wa kwa Yesu wajinga ufwamo! Ponkapotu, Maliya wa ku Mangadala watonkwele lubilo kuya ku batumwa ba kwa Yesu.

Banabakazhi bakwabo bashajile konka ku kilende. Beshikishenga’mba: ‘Nga mubiji wa kwa Yesu waya pi?’ Nobe mu kukopa kwa jiso, kwamwekele banabalume babiji bavwajile bivwalo byabekelenga. Bano bajinga bamalaika! Baambijile bano banabakazhi amba: ‘Mambo ka o mubena kumukebela Yesu? Mambo wasanguka. Pelawizhai, kabulai baana banji ba bwanga.’ Akifwanyikizha bano banabakazhi byo belutonkwele lubilo! Byo bayilenga, basambakene mwanamulume. Nanchi wamuyuka nyi?—

Uno mwanamulume wajinga Yesu, wamwekanyikile mu mubiji wa bumuntu! Naye waambijile bano banabakazhi amba: ‘Yainga mukabule baana bami ba bwanga.’ Bano banabakazhi baumvwine bingi bulongo. Bakataine baana ba bwanga ne kwibabula amba: ‘Yesu wasanguka! Twajikumumona!’ Maliya naye wabujile ba Petelo ne Yoano amba mu kilende kafwamo muntu ne. Nabo bayile konka ku kilende byonka byo ubena kumona pa kikye kipikichala. Byo bamwene kisapi kya linenyi kyo bamupombelemo Yesu, babokaminetu. Bayukile kuba’mba Yesu wasanguka.

Pa jonkaja juba ja Mulungu, Yesu wamwekanyikile ku baana banji ba bwanga babiji bayilenga mu jishinda jiya mu muzhi wa Emasa. Yesu waendelenga nabo saka besamba, pano bino kechi bamuyukile ne, mambo kechi wajinga na mubiji ye ajinga nanji saka akyangye kufwa ne. Yesu baishile kumuyuka byo alombele kimye kyo ajilenga nabo kya kuja. Baana ba bwanga basekejile bingi kabiji baendele musinso walepa bingi kuya ku Yelusalema! Kino kyafwainwe kyaubilwe panyuma ya kuba Yesu wamwekanyika kwi Petelo kuba’mba ayuke amba wasanguka.

Mabanga pa jonka jino juba ja Mulungu, baana banji ba bwanga bavula bapwijile mu nzubo imotu. Binzhilo byonse byajinga bya kushinka. Olo, Yesu naye wajinga monka mukachi ka nzubo! Pano po po bayukile amba Mufunjishi Wayukisha wasanguka. Kino kintu byo kibaletejilepo lusekelo!—Mateo 28:1-15; Luka 24:1-49; Yoano 19:38–20:21.

Pa moba makumi ana Yesu wamwekanyikilenga ku batumwa banji mu mubiji wa bumuntu mu mashinda apusana pusana, kumwesha’mba wasanguka. Panyuma ya bino, po po afumine panopantanda ne kuya mwiulu ku Bashanji. (Byubilo 1:9-11) Baana ba bwanga batendekele kubula bantu amba Lesa wamusangula Yesu mu bafu. Nangwatu bañanga bakatampe byo bebapuminenga ne kwipayapo baana ba bwanga bamo, batwajijiletu na kusapwila. Bayukile kuba’mba nangwa bafwa, Lesa usa kukebavuluka byonka byo avulukile Mwananji.

Aba baana ba bwanga ba kwa Yesu batanshi byo bapusanapo na bantu bavula ano moba! Abe bantu batela juba jasangukile Yesu amba Ishita kabiji pa jino juba bengijisha tululu ne make. Baibolo kechi waambapo amba Yesu wasangukile pa Ishita kabiji twafwainwa kwingijishanga tululu ne make pa jino juba ne. Baibolo waambatu amba twafwainwa kwingijila Lesa.

Twakonsha kwikala byonka byajinga baana ba bwanga umvwe ketubule bantu amba Lesa waubile kintu kyawama bingi byo asangwile Mwananji. Kechi twafwainwa kumvwa moyo ne, nangwa kya kuba bantu bambe amba basakwitwipaya. Umvwe twafwa, Yehoba uketuvuluka ne kwitusangula, byonka byo asangwile Yesu.

Byo twayuka kuba’mba Lesa uvuluka aba bamwingijila kabiji ukebasangula, kituletela bingi lusekelo, ke ibyo nenyi?— Byo twayuka bino bintu kyakonsha kwitulengela kukeba kuyuka byo twakonsha kumusangajika Lesa. Bino wayuka kuba’mba twakonsha kumusangajika Lesa nyi?— Twaya twisambe pa kino.

Kuyuka amba Yesu wasangukile kwakonsha kukosesha luketekelo ne lwitabilo lwetu. Tanga Byubilo 2:22-36; 4:18-20; ne 1 Kolinda 15:3-8, 20-23.

[Kipikichala pa jipa 202]

Mambo ka mu kilende kyo mwabujila muntu? Ki ka kyaubiwa?

[Kipikichala pa jipa 205]

Ba Petelo ne Yoano balangulukilenga ka?

[Kipikichala pa jipa 206]

Bantu bavula balangulukapo amba ka pa kimye kyasangukile Yesu? Nga obewa ulangulukapo amba ka?