Kutambula Lutekenesho ne Kutekenesha Bakwetu
Byo tuji bantu bambulwa kulumbuluka, atweba bonse tukolwa, bamo bakolwa ne bikola bikatampe. Inge twaikala mu makatazho a uno mutundu, ki ka kyakonsha kwitukwasha kuchinchika?
Kintu kimo kyafwainwa kwitukwasha kuchinchika ke lutekenesho lwa ba mu kisemi, balunda netu ne bakwetu ba mu lwitabilo.
Byambo byawama bya balunda netu bijitu nobe manyi abukañana ne kulengela mubiji kwikala bulongo. (Mana 16:24; 18:24; 25:11) Bino bena Kilishitu ba kine kechi batatu muchima pa kwibatekenesha ne. Bebikako ‘kutekenesha bakwabo mu bya malwa bya misango ne misango na lutekenesho lo batambula kufuma kwi Lesa.’ (2 Ko. 1:4; Luka 6:31) Ba Antonio bakalama ba nkambi ku Mexico bemwenejile kino.
Byo bebataine na kikola kya kansa wa mu mashi, ba Antonio bajinga bingi na bulanda. Nangwa kya kuba bajinga na bulanda bukatampe, bebikileko kukepeshako milanguluko. Mu ñanyi jishinda? Bavulukanga nyimbo ya Bufumu ne kwimba ne kulangulukapo pa byambo bijimo. Kulomba na jiwi jasansuka ne kutanga Baibolo nako kwibatekeneshanga bingi.
Ba Antonio bataine kuba’mba bakwabo ba mu lwitabilo bo bebakwashishe bingi. Baambile’mba: “Amiwa ne benakwami inge binyenge byabaya, twaitanga mukulumpe mu kipwilo wajinga mulongo wetu kwiya na kulombela pamo ne atweba. Kuba bino kwitutekeneshanga bingi ne kwitukosesha.” Banungilepo kuba’mba: “Tusanta bingi pa bitukwashishe balongo betu ne bakwetu ba mu lwitabilo, binyenge byapwile mu kimyetu kicheche.” Uno mulongo usanta bingi balunda nanji byo bamukwashishe ne kumuta muchima.
Kintu kikwabo kyakonsha kwitukwasha mu bimye bya malwa ke mupashi wazhila ye betulaya. Mutumwa Petelo waambile’mba mupashi wazhila wa Lesa ke “wa bupetu.” (Byu. 2:38) Kino kyamwekele kimye kyashingilwe bantu bavula mupashi pa Pentekosita mu 33 C.E. Mupashi wazhila ke bupe bwa kwitukwasha atweba bonse. Buno bupe kechi kuji kuba’mba bwapwa ne, pano mambo ka akubujila kutwajijila kulomba?—Isa. 40:28-31.
TAINGA MUCHIMA BABENA KUYANDA
Mutumwa Paulo wachinchikile bya malwa byavula bingi, pa bimye bimo kwashalangatu pacheche kufwa. (2 Ko. 1:8-10) Bino Paulo kechi waakaminwe lufu ne. Kuyuka kuba’mba Lesa uji nanji kwamutekeneshanga bingi. Wanembele’mba: “Atotwe Lesa Shanja Nkambo yetu Yesu Kilishitu, Shanja bya lusa kabiji Lesa wa lutekenesho lonse, witutekenesha mu bya malwa byetu byonse.” (2 Ko. 1:3, 4) Paulo kechi walekele makatazho amupezha maana ne. Kuchinchika makatazho kwamulengejile kwikala na lusa ne kuyuka bya kutekenesha bakwabo.
Ba Antonio byo bakosele babwelele jibiji mu mwingilo wabo wa kwenda. Ne kalatu batanga bingi muchima bakwabo ba mu lwitabilo, pano panyuma ya kino bebikangako bingi kupempula ne kutekenesha bakolwa. Kimye kimo, byo bayile na kupempula mwina Kilishitu mukwabo wakolelwe, ba Antonio baishile kuyuka kuba’mba uno mulongo kechi wakebelenga kuya na kupwila ne. Ba Antonio baambile’mba: “Uno mulongo kechi walekele kupwila na mambo a kubula kutemwa Yehoba nangwa balongo ne, bino kukolwa ko kwamulengejile kwilengulula.”
Kikwabo, ba Antonio batundaikile uno mulongo byo bamwambijile kulomba pa kijiilo kya mutentamo. Nangwa kya kuba wilengulwile, uno mulongo waswile kulomba. Ba Antonio baambile’mba: “Uno mulongo walombele kufuma panshi ya muchima, kufumatu popo binyenge byapwile. Kabiji watendekele ne kwiumvwa bumuntu.”
Atweba bonse twakipitapo kala mu makatazho acheche nangwa akatampe. Byonka byaambile Paulo, makatazho etulengela kuyuka bya kutekenesha bakwetu. Onkao mambo, twayai tutenga muchima bena Kilishitu bakwetu babena kuyanda ne kulondela Lesa wetu, Yehoba, kupichila mu kutekenesha bakwetu.