Mambo a Yehoba o Omi
Bishinka Bikatampe Kufuma mu Makalata Anembejilwe Bena Kolinda
MUTUMWA Paulo waakaminwe bingi na mambo abya ubiwenga mu kipwilo kya mu Kolinda. Waumvwine amba balongo bauba bingi mapata. Baleka byubilo byatama na kubiwa. Kabiji kipwilo kyamunembejile Paulo kumwipuzha pa bintu bimo. Na mambo abino Paulo wanembele nkalata itanshi ku bena Kolinda kimye kyo ajinga mu Efisesa nobe mu 55 C.E., pa lwendo lwanji lwa busatu lwa bumishonale.
Nkalata ya bubiji yo anembele byo papichiletu bañondo bacheche kwajinga kunungapotu pa byambo biji mu nkalata itanshi. Bya ubiwenga mu kipwilo ne pangye ya kipwilo mu myaka kitota kitanshi mu Kolinda bipasha bingi mu mashinda avula ano moba. Byambo biji mu makalata a kwa Paulo o anembejile bena Kolinda byanema bingi kwi atweba.—Hebe. 4:12.
‘LABAINGA MUKENKENTENGA NE KUKOSA’
Paulo wibasashijile’mba “bonse kasa mwamba jiwi jimo jonka.” (1 Ko. 1:10) Kafwako ‘kitendekesho kingi ne, kana Yesu Kilishitu,’ po pashimikwa byubilo bya bwina Kilishitu. (1 Ko. 3:11-13) Paulo waambilepo pa muntu wa bulalelale mu kipwilo amba: “Fumyai awa mubi mukachi kenu.” (1 Ko. 5:13) Waambile’mba: “Bino mubiji kechi ye wa bulalelale ne, ye wa kwa Nkambo.”—1 Ko. 6:13.
Kwesakana na ‘mwayila abya byo bamunembejile,’ Paulo wajimwineko bena Kolinda pa mambo a masongola ne pa babula kutwela mu masongola. (1 Ko. 7:1) Panyuma ya kwamba pa bumutwe bwa bwina Kilishitu, kupwila kwa bwina Kilishitu, lusanguko, Paulo wibatundaikile’mba: “Labainga ne kukenkenta, koselai mu lwitabilo, ikalai byafwainwa banabalume, kosai.”—1 Ko. 16:13.
Mepuzho a mu Binembelo Akumbulwa:
1:21—Nanchi Yehoba wingijisha ‘bumbulwamaana’ pa kuba’mba apulushe bantu baitabila nyi? Ine, kechi bo bo engijisha ne. Bino pakuba ‘ba panopantanda kechi bayuka Lesa mu maana abo abo bene ne,’ byo apulusha bantu ke kintu kya bumbulwamaana ku ba panopantanda.—Yoa. 17:25.
5:5—‘Kumufikizha awa muntu [mubi] kuji aye Satana amba, mubiji wanji onaike, mupashi wanji akapuluke’ kyayila mwepi? Umvwe muntu walenga mambo akatampe wabula kulapila wapangiwa mu kipwilo wikala ke lubaji lwa ntanda ibi ya kwa Satana. (1 Yoa. 5:19) Ne mu jino jishinda utelwa amba wafikizhiwa kuji Satana. Kupangiwa kwa uno muntu ke kufumya mupashi watama ne kulama mupashi nangwa’mba byubilo byawama mu kipwilo.—2 Timo. 4:22.
7:33, 34—Ñanyi bintu “bya panopantanda” byatapo muchima awa wasongola nangwa kusongolwa? Paulo waambilenga pa bintu bya mu bwikalo bya pa juba pa juba byo atapo muchima mwina Kilishitu uji mu masongola. Bino byavwangamo kajo, bya kuvwala, ne nzubo, bino kechi bintu bya panopantanda byatama byafwainwa kuchinuzhuka mwina Kilishitu ne.—1 Yoa. 2:15-17.
11:26—Kyaijile mwepi kuba’mba “monse mo mukajanga” mu kuvuluka lufu lwa kwa Yesu, kabiji “poso” kimye ka? Paulo kechi waambilenga’mba lufu lwa kwa Yesu lukavulukwanga kikupu ne. Kyambo kya Kingiliki kyaingijishiwa pano kya kuba’mba “monse mo mukajanga” ke kuba’mba “umvwe” nangwa “kimye kyonse.” Onkao mambo Paulo waambilenga’mba kimye kyonse bena Kilishitu kyo babena kuja bimpashañano bya pa Kivuluko, jimo pa mwaka, pa Nisanyi 14 ‘basapwila lufu lwa Nkambo.’ Boba kino “poso waiya,” ko kuba’mba poso kimye kya kwibatambwila mwiulu inge basangulwa.—1 Tesa. 4:14-17.
13:13—Mu ñanyi jishinda butemwe mo bwaikela kintu kikatampe pa lwitabilo ne luketekelo? Umvwe bintu “byaketekelwa” byamweka ne “luketekelo lwa kine” lwafikizhiwa, lwitabilo ne luketekelo kechi lutwajijila byonka byo kyajinga bintu saka bikyangye kumweka ne. Butemwe ke bukatampe pa lwitabilo ne luketekelo mambo alo lutwajijila myaka ne myaka.
15:29—‘Kubatizwa mu lufu’ kwatala mwepi? Paulo kechi waambilenga’mba bantu bomi bafwainwa kubatizwa kwimenako boba bafwile saka bakyangye kubatizwa ne. Paulo pano ubena kwamba pa lubatizhilo lwa bena Kilishitu bashingwa na mupashi lwa kutwajijila na kulama bulumbuluke bwabo poso lufu lwibatana ne kusangulwa kuba’mba bekale bilengwa bya mupashi.
Lufunjisho Kotuji:
1:26-31; 3:3-9; 4:7. Kwikepesha ne kwitotela mwi Yehoba kulengela kipwilo kukwatankana. Kechi kwitota atweba bene ne.
2:3-5. Paulo byo asapwijilenga mu Kolinda, mwavujile buntemwamaana bwa Bangiliki ne kutemwa kufunda, waakaminwe bingi amba kampe bantu bamutelekelenga kechi bakonsha kwitabila ne. Bino kechi waswishishe makatazho onse nangwa moyo ye ajinga nanji kumulengela kubula kwingila mwingilo wamupele Lesa ne. Netuwa kechi twafwainwa kuswisha makatazho aji onse kwitulengela kubula kusapwila mambo awama a Bufumu bwa Lesa ne. Twakonsha kuketekela mu bukwasho bwa Yehoba byonka byaubile Paulo.
2:16. Kwikala na “muchima wa Kilishitu” ke kuyuka mo alangulukila ne byo alangulukila bino, kulanguluka byonka byo alanguluka, kuyuka byubilo byanji ne kulonda kya kumwenako kyanji. (1 Pe. 2:21; 4:1) Kyanema bingi kufunda bwikalo bwa kwa Yesu ne mwingilo wanji!
3:10-15; 4:17. Twafwainwa kwibenkabenka ne kuwamishako mashinda etu akufunjishishamo ne kulenga baana ba bwanga. (Mat. 28:19, 20) Umvwe ne kwibafunjisha bulongo ne, bo tufunjisha kechi bakapita lweseko lwa lwitabilo lwabo ne, kabiji kino kyakonsha kwitukozha ku muchima kuba’mba lupulukilo lukekala nobe “wapita mu mujilo.”
6:18. ‘Kuchina bulalelale’ ke kuchinuzhuka byubilo byonse bya kwilaala byabula kufwainwa (por·neiʹa), kutamba bipikichala bya bantu baji mulekese, bintu byatama, kulanguluka langulukanga pa kwilaala, kusenseka, ne kyonse kyakonsha kwitulengela kwitumpa mu bulalelale.—Mat. 5:28; Yako. 3:17.
7:29. Bantu baji mu masongola bafwainwa kujimuka pa kuba’mba kechi bateshatu muchima ku bintu bya mu bwikalo bwabo, ne kubula kuta muchima bya ku mupashi ne.
10:8-11. Bena Isalela byo banyinyichijile Mosesa ne Alona bazhingijishe Yehoba. Kyawama bingi kubula kwikala na muchima wa kunyinyita.
16:2. Mibingu yo tupana mu kukwasha kuyilako palutwe kwa bintu bya Bufumu ikatwajijilatu umvwe kyakuba saka tufuukwila jimo ne kubila monka mo twafuukwila.
‘MULUMBULUKENGA’
Paulo waambijile bena Kolinda kuba’mba bafwainwa “kumulekela mambo ne kumukwasha” ndengamambo walapila. Nangwa kya kuba nkalata yanji itanshi ibobishe bulanda, Paulo wasekejile mambo ‘bulanda bwibaletejile kulapila.’—2 Ko. 2:6, 7; 7:8, 9.
Paulo watundaikile bena Kolinda amba “byo mwavujilwa na byonse” ‘muvujilwe ne nabo pamo.’ Panyuma ya kukumbula bakajimbulushi, wajimunañene ku bonse amba: “Anwebakwetu, sekelai, mulumbuluke; mwikale bakosa mu michima yenu; mwikale ne muchima umo; ikalai mu mutende.”—2 Ko. 8:7; 13:11.
Mepuzho a mu Binembelo Akumbulwa:
2:15, 16—Twaikala byepi “bwema bwawama bwa Kilishitu”? Twaikala bino mambo akuba tulondela Baibolo ne kwivwangamo mu kusampanya mambo ajimo. Nangwa kya kuba buno “bwema” ke bwema bwatama ku bantu bambulwakoloka, ke bwema bwawama kwi Yehoba ne ku bantu bakishinka.
5:16—Bena Kilishitu bashingwa kechi ‘bayuka muntu mu buntunshi” byepi ne? Kechi bamona bantu mu mweno ya buntunshi ne, kumwesha misalululo pa mambo a bunonshi, kikoba, nangwa mushobo ne. Abo banemekako bulunda bwabo bwa ku mupashi ne balunda nabo ba mu lwitabilo.
11:1, 16; 12:11—Nanchi Paulo waalukile ke wakosama ku bena Kolinda nyi? Ine, kechi byo byo ajinga ne. Bino wafwainwa witotelenga ne kwikala wakosama mambo akuba wakanjikizhiwe kwambapo pa butumwa bwanji.
12:1-4—Ñanyi ‘washikwilwe mu Paladisa’? Pakuba Baibolo kechi watongolapo muntu mukwabo wamwene kino kimwesho ne jishimikila jaamba pa butumwa bwa kwa Paulo ne, wafwainwa waambilenga pe aye mwine. Kintu kyo aambilengapo mutumwa mu kimwesho kyanji kyafwainwa kyajinga paladisa wa ku mupashi wiyowa kipwilo kya bwina Kilishitu mu kino “kimye kya ku mpelo.”—Da. 12:4.
Lufunjisho Kotuji:
3:5. Kino kyepelo kibena kwitubula amba Yehoba ye ulengela bena Kilishitu kuba’mba bafikepo mu mwingilo kupichila mu Mambo anji, mupashi wanji wazhila, ne jibumba janji ja panopantanda. (Yoa. 16:7; 2 Timo. 3:16, 17) Tuba bingi bulongo kutanganga Baibolo ne mabuku alumbulula Baibolo, kukoselamo kulomba mupashi wazhila ne kutanwa ku kupwila kimye kyonse ne kwambapo.—Sala. 1:1-3; Luka 11:10-13; Hebe. 10:24, 25.
4:16. Yehoba byo asangula “bumuntu bwetu bwa mukachi” twafwainwa kimye kyonse kwingijisha bitunengezhezha Yehoba, kechi kulekatu juba jazhika kwakubula kutangapo bintu byakonsha kukosesha bulunda bwetu na Lesa ne.
4:17, 18. Kuvulukanga’mba “malwa etu apela, a kakimye kamotu,” kwakonsha kwitukwasha kutwajijila kwikala ku lubaji lwa Yehoba mu bukishinka mu kimye kya malwa.
5:1-5. Paulo waamba bingi bulongo kutazha ku luketekelo lwa bwikalo bwa mwiulu lwa bena Kilishitu bashingwa!
10:13. Monka mwayila muzhilo, twafwainwatu kwingijila mu nyaunda ingijilamo kipwilo kyetu, kana inge kya kuba twabulwa kuya na kwingijila kuji kukajilwa kukatampe kwa basapwishi.
13:5. ‘Kwieseka atwe bene, tumone kana tuji monka mu lwitabilo’ kukebewa kumona kuba’mba byubilo byetu biji monka mwayila byo tufunda mu Baibolo. Pa ‘kwipima atwe bene’ twafwainwa kumona byakosa bulunda bwetu na Lesa, kuvwangako ne maana alumbuluka a kupima’ bintu ne biji mwingilo wetu ye twaitabilamo. (Hebe. 5:14; Yako. 1:22-25) Umvwe saka twingijisha lujimuno lwa kwa Paulo lwawama tukendanga mu bukine.
[Kipikichala pa peja 26, 27]
Byambo bya kuba’mba “monse mo mukajanga shinkwa uno, ne kutoma katomeno kano,” byatala mwepi?—1 Ko. 11:26.